تجمع الامهات المبتعثات في بورتلاند......اطرحي تجربتك....

اضم صوتي مع صوتك
وياليت تفيدونا عن الحضانات وانواعها واسعارها

حياك الله اختي ....وان شاء الله نكون جيران هناك...انا عندي استفسار عن توقيت المدارس....احنا ان شاء الله جايين بنصف مارس...ما ادري كيف يكون وضع الاطفال مع الدراسة...ياريت احد يعطينا تواقيت الفصول الدراسية للمدارس الحكومية....

اخواني الامهات وين تفاعلكم ومساعدتكم لنا.....
عندي استفسار عن ترتيب الشنط والاغراظ ايش اخذ وايش اجيب معايا من ملابس واكل واجهزة واغراض....
ياليت تشاركونا تجاربكم...

انا ماني ام ولا حاجه بس لقافه خشيت و حجاوب على اللي اعرفه

الحضانات اولا غاليه شوي احيانا يكونو فيه بنات سعوديات مرافقات مايدرسو و يفتحو بيوتهم حضانه باسعار حلوه .. انا باتلانتا فيه واحد سعودي متزوج مغربيه و الاجنبيه ماتصرف عليها الدوله مكافئه مرافق .. فصارت زوجته تستقبل حضانه مو رسميه فقط تعامل بينك و بينها و فيه بنت سعوديه برضو مرافقه نفس الحاله اسعار الحضانات الحكوميه والتجاريه تقريبا من 500 الى 1000 دولار ع حسب المميزات وللاسف فيه سعوديين اضطرو يدخلو اولادهم حضانات في كنائس لانها رخيصه نسبيا تقريبا بـ 200 دولار فانتم رتبو الموضوع هذا وسافرو قبل بداية الدراسه تبعكم بفتره تساعدكم بالبحث للافضل و بتلاقو حريم كثير يساعدونكم بس مايدخلو المنتدى ... انا هنا مبتعث انا وزوجتي و فيه تجمع للبنات كل يوم سبت في بيت وحده و يتناقشون و يسولفون و تقابلين كل السعوديات اشكال و الوان ..

اما للي بتاخذونه معاكم للسفر اولا الاجهزه الالكترونيه الاستشوار و خرابيطه حقتكم ذي ماتشتغل هنا لان كهربتهم هنا 110 عكس عندنا بالسعوديه .. اما الاكل لاتاخذون ولا شي فيه كل شي هنا و سوبر ماركات عربيه و اسلاميه و كل اللي تبونه حتى مطاعم بتلاقونه بموقع ذبيحه يعطيكم اقرب سوبر ماركت و مطعم اسلامي قريب منكم .. اما اغراض النضافه برضو ماحتحتاجون شي كلو موجود هنا ... لاتسون زي وحده جابت حتى التايد من السعوديه .. اما العلاجات هنا المشكله لانها هنا ماتصرف الا بوصفه و نادرا تلاقي سوبر ماركت يبيعها بدون وصفه مع انو موجود بدون وصفه بس قليل .. فالاحسن و الاحتياط خذي ادويه جديده غير مستعمله من السعوديه لاولادكم و لكم مضادات و خرابيطها و ادويه معده و خرابيطها و بنادول و انواعها وحطوها بالشنطه اللي بتدخل بالشحن لاتخلوها بيدكم و شنطكم اللي بتدخلون فيها الطياره .. اما الملابس خذي لك كميه جيده و احسبي كل شخص مسموح له بشنطتين كل وحده وزنها على ما اعتقد 24 كيلو و غلفيها للامان من مطاركم لان اوقات كثير تنفتح و تنسرق لكن اذا غلفتيها بيعرفون انك راح تعرفين انها افتحت و يخافون وهذا اللي سويته انا .. شوفي اجواء المدينه اللي بتروحين لها درجات الحراره كم بتكون و احسبي عليها وش تحتاجي ملابس برد او حر او معتدل و اهم شششششي اكياس الضغط تلاقوها تنباع بالهرم او شبرا او ساكو بتفيدكم كثيييييييير بدال ماتعبي الشنطه 20 بدله تضغطيها و تشيل 40 بدله و تريحك اكثر ..

وقبل ماتسافرون تسو نسخ لك شي و تحطوه ع فلاش وخليهم اثنين واحد عندك و الثاني عند زوجك لاسمح الله ممكن يضيع واحد .. كل شي يخطر ببالك سوي له سكان حتى الاوراق اللي تشوفيها مو مهمه لانو هنا صعب تلاقي احد يسوي لك سكان ..

وشنطه الطياره لاتحطي فيها اي عطور او كريمات و حتى شنطه يدك .. عندهم شرط اذا العطر او الكريم اكثر من 50 ملم يتصادر وحليب الاطفال عاد اوقات يخليكم تجربونه او تشربونه قدامهم عشان يتاكدون بس ..

وبالنسبه للي يقول لك يفتشون اللاب توب و هالخرابيط انا و شباب كثير هنا سوينا سوفت وير للجهاز ولا احد فتحها اصلا عشان يشوفو ايش فيها والجوال اللي فيه جيلبريك برضو ماشلته والله و شوفيني استخدمه هنا عادي ..

بس للاحتياط سوي سوفت وير ولا ابغى افتي لك لان نضام البلد ذا مشدد شوي في النسخ .. فانتي سوي سوفت وير ونزلي ويندز اصلي اما المايكروسفت اول ماتوصلي هنا نزليه من هنا ارخص تقريبا للطلاب عليه خصم بـ 110 دولار ..

كل الماركات اللي بالسعوديه من عطور و لوشنات بتلاقيها هنا حتى بودي شوب بس نكتار مافيه ..

من المواقف اللي صارت لي بالمطار قدامي واحد الماني معاه تفاحتين و حاطها بالشنطه و بكيس فتحو الشنطه كل ابوها و فشفشو العفش عشان يطلعون التفاحتين هذي و صادروها عليه .. يعني انتبهو من الاكل كل شي بتلاقونه هنا ..

وانتي بالمطار فيه استكرات يعطيك اياها الموضف اكتبي عليها رقم جوال و عنوان بالسعوديه و اسمك بالانجليزي واذا فيه احد تعرفونه هناك برضو سجلو رقمه .. لانو اوقات لاسمح الله يضيع العفش ..


واللي يبغا يجيب شي من السعوديه ترو فيدكس عندهم عرض تكلم اي احد مناك يزبط لك مقاضي و يرسلها لك فيدكس اريح لك واحسن و اامن ..

اما بالنسبه للمدارس هنا ..

مدارسهم بالولايه اللي انا فيها من الساعه 8 الى الساعه 2 مع فتره راحة الساعه 11 الى الساعه 12 غدا .. ولاتقلقو كل شي هنا سهل بكثيييير بعكس اوربا المعقدين ..

واللي برضو يبي يشتري سياره رخصتك السعوديه اذا مترجمه انجليزي تمشيك زي العسل هنا و تنفعك كثييييييييير ..
واللي عنده اطفال كثير انصحه انه يستاجر سياره اوفر له بكثييير

لان التكاسي هنا غاليه مشوار من المطار الى البيت بـ 50 دولار .. و ايجار السياره يوميا بـ 30 دولار طبعا سياره صغيره كورولا او تيدا نيسان ..

الشقق فيه عندهم انواع كثيره لها والافضل لكم انكم تاخذو ورقه و قلم وتفتشو بالنت عن الشقق و الهوم تاون اول ماتوصلو هنا تبدئو تتمشون بينها و تشوفون مميزات كل وحده و لو لقيتم عربي بالسكن اسالوه .. لاتستاجرو شي من النت ترو بالنت عكس الحقيقه تماما .. لكن سجلو بورقه و قلم و ابدئو فرو عليها و تنقو بينها و اوقات تلاقون بطريقكم شي ماسجلتوه ويكون افضل لكم زي اللي حصل لي ...

و طبعا زور الجامعه وشوف بعدها عن السكن و المواصلات المتوفره .. في شقق توفر لك كل شي و تحسب الايجار بالفرد يعطونك مويه و نت و كهرباء و غاز و مواصلات مجانا بس الفرد يكون تقريبا بـ 700 دولار و هذي حلوه للي مايفكر يشتري سياره فيه عائله اعرفها ساكنين بسكن زي كذا باصات السكن ماتوقف توصلهم حوالين المدينه اي مكان يخطر ببالك ماعدا السبت و الاحد مو شغالين طبعا .. ويوصلون للجامعه و المولات ..

اما الجوال بنص دقيقه تطلعونه سهل ... و مو معقد

البنك يطلبون I-20 و جوازك و تعطيهم كم معلومه يعني كم بيكون في حسابك شهريا تقريبا .. والباقي كله اجرائات روتينه انا خلصت البنك تقريبا بنص ساعه و عطوني بطاقه مؤقته لحين اصدار الاساسيه .. واهم شي تطلبه من البنك انه يطبع لك شيك يكون مكتوب فيه اسمك زي ماهو بالجواز و رقم حسابك عشان ترفعه للملحقيه و يبدؤ يصرفو لك المكافئات ..



وفيه شي مهم مطفش كثير من الطلاب هنا وفيه اثنين رجعو السعوديه عشان هالشي فتح حساب بالملحقيه لازم تفتحوا اول ماتوصلو وبتلاقو مواضيع كثيره هنا بالمنتدى تفيدكم و حلوه .. افتحو الحساب اول ماتوصلو و اطلبو الضمان المالي اللي تعطونه المعهد و افتحو حساب مرافق و اطلبو ضمانه المالي لانه اوقات يتاخر و اوقات بسرعه فانتم خليكم احرص منهم ..

جزاك الله خير اخ مازن
<< بما ان لا يوجد امهات من بورتلاند هنا خلاص انا اذا رحت هناك اعطيكم تجربتي ان شاء الله XD

اخوي مازن....ماقصرت وكفيت ووفيت الله يكتب لك بكل حرف اجر وحسنة ويرفع فيها عنك كل سيئة....الحقيقة نصائح بماء الذهب...
اختي توميتو....متى موعد سفرك ان شاء الله؟؟؟؟

دراستي 18 مارس ان شاء الله
لكن لسه ما حجزت الطيران يمكن على تاريخ 10 او 11 طالعة

وين الامهات تفاعلو
احنا كاباء يهمنا موضوع الاطفال ودراستهم ياليت من سبق لهم التجربة يعطونا المعلومات

انا اب ولستم عموما
الحضانات في بورتلاند غالية جدا جدا تصل الى 1200 دولار تعبت في البحث في اول الامر وتنقلت من 3 حضانات
لكن الحمد لله طفلتي الان في حضانة ال psu ب 600 دولار