اختكم تبغى استشارتكم ياخبرائنا وخبيراتنا المبتعثين ممكن ولا لا

أول شي الله يوفقك وزوجك ويكتب لكم اللي فيه الخير .

نصيحتي لك أنتي وزوجك تسوون كل إجراءاتكم بشكل رسمي ، كيف؟

خلي زوجك يدخل ع العنقري " له جلسه يوميه الساعه 7 الصباح ماعدى يوم الأثنين "

ويكتب في المعروض حقه كل شي تبونه ، حتى لو كنتم واثقين أنه ماراح يقبل لكن أعلمك وش بيصير بعدين ،

راح يشرح ع المعروض ، وضروري يحط رقم جواله في المعروض ، بنفس اليوم راح تجيه رساله برقم المعامله

خلال أسبوع بالكثير راح يتصل عليكم موظف بالوزاره ويقول لكم وش الخيارات المفتوحه أمامكم ، إذا أتصل عليكم نشفوه بالأسئله تنشيف

كل اللي في خاطركم تستفسرون عنه أكتبوه بورقه وخلوه معكم ، وإذا أتصل عليكم أسألوه ، راح يقولكم وش تسوون بالضبط

أتوقع راح يقول أطلعوا ع حسابكم وبعدين تلتحقون ، أسألوه عن المده وعن التخصصات اللي تبينها أنتي وزوجك ، كل شي كل شي تبونه أسألوه ولا تتحرجون أو تخافون من شي .

إذا عطاكم الرد ، أشتغلوا على القبولات وشغلتها ، أتذكر قبول الجامعه لي قعد شهر ونص ماجاء وبعدها غيّرنا الجامعه وقعد أسبوع وجاء ، طبعاً جامعه معترف فيها وبولايه غير ولايتي

لكن مخليها طقطقه لين أنضم للبعثه وأنقّي الجامعه اللي أبيها وأشتغل ع القبول بنفسي .

أمم وش بعد ، أيه ...

القبول أريح لكم تروحون مكتب وهو يشتغل عليه عشان ماتتعبون منه ، خصوصاً أن بعض المكاتب تتعامل مع جامعات والقبول منها مايطول .

بخصوص اللغه ، أنا أشوف أنها متعبه مره تجيبون توفل من السعوديه ، خلوا شغلكم كله بالسليم وبالطريقه الأضمن ، خذوا لغه من هنا من أمريكا ،

تعلم اللغه هنا أسرع وأحسن ، هنا تتعلمون البراكتس " الممارسه " تتعلمون كيف تنطقون الكلمه ومتى ، الوضع ترا غير عن اللي تتصورونه في السعوديه

وأتوقع كثير من المبتعثين مافهموا تعلم اللغه إلا بعد ماجو أمريكا .

أي خدمه أنا حاضر لأني تعبت من الكتابه والكابوتشينو حقي خلص والدخان خلص بعد

إذا تبون معلومات أكثر أو أي خدمه أقدر عليها خلي زوجك يكلمني وبساعده باللي أقدر عليه وما أبي إلا دعوه بظهر الغيب ، محتاجها كثير والله ...

أهم شي الكلام اللي قلته فوق بخصوص الأجراءات تراه أفضل الموجود ، أسمعوا نصيحتي . بالتوفيق إن شاء الله