تجمع طلاب معهد UCLA في ويستوود ( لوس انجلوس)

بالنسبة لخدمة النقل من المطار فهناك شركة تعاملت معها اكثر من ٧ مرات .. تقييمي لها جيد جدا .. اسمها super shuttle وهذا رابطهم ..

SuperShuttle Los Angeles Online Reservations | Shuttle to LAX | LAX Shuttle Service | LAX Shuttle to Disney

الخدمة على راحتك اذا تبي سيارة صغيرة او فان كبيرة .. مشتركة مع ناس او خاصة ..

لكن كنت استخدم كل مرة الفان مشترك مع ناس .. سعره للشخص الواحد ٢٥ دولار وكل شخص اضافي يكون معاك ٩ دولار ..

بعد الخروج من بوابة المطار بيكون فيه لهم مواقف خاصة يمين ويسار كل بوابة خروج ..

عيوبها : الانتظار فترة بسبب التخطيط لمسار السيارة .. فممكن ناس يجوا بعدك ويركبوا قبلك لأن مسار طريقهم يتماشى مع السيارة الموجودة .. فنظامهم تنتظر دورك حتى تجي سيارة يكون مسارها نفس مسار سكنك..
النقطة الثانية .. ممكن مكان سكنك يكون قريب لكن كثرة الاشخاص المتواجدين معك بالفان وتوصيلهم ياخذ وقت اكبر اذا كان مكانهم اقرب من مكانك ..

وكل هذي العيوب انت وحظك .. انا مرة ما انتظرت اكثر من ٥ دقايق ووصلوني ثاني وحدة .. ومرة انتظرت ثلث ساعة ووصلوني خامس وحدة ..
لكن بشكل عام انصح فيها ..

واللي عنده اي استفسار عن طريقة الحجز اون لاين انا جاهزه ..

حياتي ممكن تحوطي الرابط اللي حجزتي منو للسكن ضروري الله يسعدك

هلا حبيبتي السكن اللي ساكنة فيه حصلته يوم رحت هناك .. ومايملك موقع او رابط للأسف .. انا قبل ما اروح كنت مثلكم اتوقع كل حاجة موجودة بالنت لكن المفاجآة كانت انو كثير من الشقق هناك ما لها موقع ولا يكتبون في مواقع السكن .. وخصوصا الرخيصة منها .. هذي تجيك بالحظ ..

طيب يا عسل ممكن تساعديني في سكن

وكمان حابه اسالك لما نزلتي ع مطار لوس انجلوس فين روحتي ؟؟؟ وكم تبعد ويست وود عن المطار ؟؟؟

أيوا ممكن .. متى جاية ؟؟

مافهمت سؤالك فين رحت .. إذا قصدك سكن فأنا سكنت في الشيراتون اللي بجنب المطار .. واخذنا باص الفندق ووصلنا هناك ..
أول الايام تبهدلت لان صرت اروح المعهد و اجي بالباص من الفندق .. المسافة اللي كنت اخذها من الفندق اللي بالمطار كانت ساعة الا ربع بالباص .. بالسيارة تقريبا ٢٠ دقيقة اقصد الهاي وي طبعا على حسب الزحمة اقصد ب ٢٠ إذا كان الطريق سالك لأن لوس انجلس مشهورة بالزحممممة ..

بعد ٤ ايام من البهدلة سكنت بكليرمونت هوتيل جنب المعهد .. طبعا حاجة صعبة تنتقلي من فندق 5 ستار إلى فندق 2 ستار .. لكن و لا تعب الطريق .. ورحت كل يوم ادور على سكن .. وربي فرجها بعد ١٠ ايام من المعاناة في هذا الفندق وحصلت شقة ..
ناس تحصل شقق بسرعة وناس ممكن تظل بهذا الفندق شهر او شهرين .. مثل ما حصل مع بعض زميلاتي ..

البحث والتخطيط قبل الجية راح يوفر مشوار كبير ..
انا كنت اتصل على الشقق بنفسي من السعودية واسال .. كنت اتجول على الحي بقوقل ايرث تجول افتراضي واشوف عمارة عمارة واخذ رقمها من لوحاتها واعلاناتها بالشوارع من قوقل ماب ..
وبالرغم من كل هذا يوم جيت مالقيت وتبهدلت .. لان الشقة اللي متوفرة اليوم مو بالضرورة تكون متاحة بكرا .. الشقق بسرعة تروح .. فانت اخذي فكرة وجمعي ارقام واتصلي عليهم قبل جيتك باسبوع إلى يوم او يومين عشان تضمني بعض الخيارات وقت جيتك

أتأسف لعدم وضوح سؤالي

انا جاية 23 او 22 مارش

اقصد لما نزلتي في المطار هل قابلك احد من السفاره ؟؟ او الملحقيه ؟؟ اذا نعم كيف قابلكم اتواصلتي معاهم قبل ولا لا ؟؟؟


كم كلفك معهد الشيراتون في اليوم ؟؟

اهااا .. حبيبتي السفارة ما ظنيت تستقبل احد يمكن هالكلام بواشنطن وقديم برضو .. قلت لك انا اول ما جيت رحت من باص الشيراتون اللي كان بالمطار وسكنت عندهم لمدة ٤ ايام وكان عندهم عرض النيو يير وقتها فكان تحت ١٠٠ دولار اتوقع .. طبعا الشيراتون اقصد فيه الفندق وهو مو معهد ..

يوم جيت انقل للويستوود واسكن بكليرمونت هوتيل كان معاي عفشي وشنطي .. فصعبة اشيلهم بالباص كنت محتاجة لتاكسي .. لكن جدا غالي .. ففكرت انو يرجعنا باص الشيراتون للمطار ومن هناك استفيد من سيارات النقل اللي بالمطار ..
فحجزت بموقع super shuttle واللي شرحت عنه بردودي السابقة وهو اللي وصلني للويستوود ..

الشركة هذي تكون حاجزة لك مقعد بسياراتها و مستحيل تنكبك وتوصلك للعنوان اللي حطيتيه بموقعهم اثناء التسجيل .. تلاقينهم اول ما تطلعي من بوابة المطار برااا .. لهم مواقف مخصصة على جنب الرصيف .. تمشي لها مسافة خمس دقايق تقريبا .. بيكون فيه مرشد هناك ماسك قلم ودفتر تروحي له تعطيه اسمك ورقم حجزك اللي بالنت ويطلب منك تنتظري .. اذا جات سيارتك بيعطيك خبر ويشيلوا لك اغراضك ويحطوها بالسيارة ويوصلونك للمكان اللي انتي حددتيه..

ربي يسعدك

انا جاية 23 او 22 مارش ياليت تساعديني في سكن احتاج غرفتين لي وللوالد


وكيف اعرف اماكن الاتصالات اللي اخد منهم الشريحه واشتراك النت ؟؟


وايش هوا البنك اللي فتحتي فيلو حساب ؟؟


سامحيني حياتي كثرت الاسئلة بس حتي اخد فكره عامه وما اتورط وبرضوا لانو مرافقي والدي واخاف يتعب من المشاوير

بالنسبة للسكن انا برضو جيت مع الوالد .. ونظامنا في لوس انجلوس اللي تجي مع ابوها او اخوها تاخذ شقة من غرفة وصالة .. تنامي انتي بالغرفة والصالة تكون غرفة نوم ثانية ما يحتاج تحطي فيها كنبة .. لان الشقق غالية كثييير .. الا اذا عندك استعداد تصرفي اغلب مكافاتك على سكن غالي .. او عندك مصدر دخل ثاني غير المكافاة .. الشقق اللي من غرفتين اسعارها ٢٠٠٠ دولار وطالع .. قولي لي عن وضعك عشان اعرف ايش اللي ح يناسبك ..

انا اشتركت ب t-mobile شركة الاتصال هذي تغطيتها سيىة لكن ارخص وممشية وضعها معاي .. مكاتب الاتصالات تحصليها كلها بالويستوود .. ومقابل المعهد .. والنت الثابت اشتركت مع TWC .. كل عمارة الاعدادات تكون جاهزة بس تكلميهم وتشتركي و تطلبي منهم مودم وهم يثبتوه لك ..

البنك فتحت في بنك اوف اميركا .. وفي بنك شيس .. افضل بنك شيس لانه راقي وسريع في خدمة العملاء ..

ارجع واكرر ما اقدر ابحث لك عن سكن الا قبل جيتك باسبوع لان اللي متوفر اليوم مو شرط يكون موجود بفترة جيتك.. لان الشقق ترووووح بسرعة ما تجلس اكثر من اسبوعين ..

طيب مو مشكله شوفي قبل اسبوع او اسبوعين زي ما قولتي شقة من غرفه وصاله

طيب كيف اتواصل معاكي ؟