ولاية يوتا - مدينة لوقن

مساؤكم ورد وياسمين


انا في مدينة لوغان ليا شهر تقريبا وما حبيت اعطيكم اي رد قبل ما اكون اخذت فكرة كافية ووافية عن المدينة بالخصوص والولاية بشكل عام

ساذكر ملاحظاتي في نقاط لكي يسهل سردها وملاحظتها وسؤالي لاحقا عن اي نقطة بعينها

1: ولاية يوتاه من الولايات الباردة اغلب ايام السنة (حوالي 7.5 اشهر) سنويا .. والبرد يعني جو بارد وهواء بارد .. اما الثلوج فهي فقط في الشتاء .. الان احنا في سبتمبر ودرجة الحرارة في الليل توصل 9 درجات مئوية في نص الليل.

2: مدينة Logan نالت لقب كثر المدن الامريكية أمنا لعام 2007. وولاية يوتاه عموما تعتبر ارخص ولاية امريكية على الاطلاق ولكن طبعا اغلى من السعودية.

3: اغلب المراكز والاسواق واماكن الترفيه موجودة في Salt Lake City عاصمة الولاية .. اما Logan فلا يوجد فيها الا مول واحد و3 اسواق سوبرمركت ومطاعم متعددة من بينها جميع انواع الـFast Food والبيتزا وغيرها من الماركات المعروفة في السعودية.

4: اهل المدينة حبوبين ومبتسمين دائما (كغالبية الشعب الامريكي) وحالهم حال نفسهم .. لا يهمهم كونك عربي او مسلم او سعودي .. اهم شي تكون محترم وتعامل الكل باتسامة صدقوني تاخدوا كل اللي تبغوه واكثر

5: من ناحية الترفيه لا يوجد في لوغان الا بحيرة صغيرة خارج نطاق الجامعة وكم مركز للسينما ولكن صغار.

6: متوفر باص ياخذك من والى اي مكان في لوغان (من تقريبا مكان سكنك حتى لو في الجامعة الى كل اماكن لوغان) مجاااااااااانا .. الباصات تمر كل نصف ساعة. ولكن عيبها ان دوامها من 6 صباحا الى 8 الليل. 8 الليل يكونوا الناس في بيوتهم خلاص يعني .. ولو احد كان في سوق وبغى يرجع البيت بتاكسي تطلبوه بالتليفون ويجيكم وياخد اقل شي من المول الى السكن حوالي 6$ لو مرة قريب .. (غالون البنزين في امريكا سعره 6$ مقارنة بليتر البنزين في السعودية سعره اقل من ريال) .. للي يفهموا في اسعار بنزين السعودية (تعبئة اي سيارة عادية مثل الكامري او المكسيما يكون مثلا باقل من 40 ريال .. في امريكا نفس السيارة تعبأ ب60$ وعليكم الحساب) عشان كذا المواصلات هنا ناااااااااااااااااااار

7: المدينة كما قلت لا تتوفر فيها كل التجهيزات مثل المدن الكبرى .. مثال:

- مسجد صغير جدا
- مول واحد
- لا يوجد في لوغان اختبار الـGMAT وانما فقط الـGRE والـTOEFL.
- طبعا امريكا مثل السعودية الحياة بدون السيارة شبه مستحيلة
- المحلات العربية والاسلامية موجودة ولكن في Salt Lake City اما لوغان انسوا الموضوع
- امريكا كلها اهلها دجاج .. الساعة 10 الليل الدنيا كلها منتهية خلاص وميته ومافي احد في الشارع.

8: نصيحة بشكل عام لكل المبتعثين لامريكا والعالم: الـMeat لا يعني لحم (خروف او بقر) وانما يعني لحم بشكل عام (ويشمل الخنزير Pork) .. وموجود الPork في اغلب الماكولات بما فيها البيتزا (الببروني والسلامي والهوت دوغ والبيكن) .. فصرت اخد بيتزا نباتيه .. وحتى هارديز وجباته 70% فيها خنزير (شريحة بيكن) .. فانا اخد الوجبة الاصلية لحم + جبن + خس وطماطم والحمدلله.

9: ولاية يوتاه لا تنتشر فيها المراقص ولا الخمور نظرا لتدين اهل الولاية وهم من طائفة المورمون (لا جنس قبل الزواج - تعدد الزوجات ممكن - لا يشربون الخمر - لا يدخنون - لا يشربون الببسي كثير ولا يشربون الشاي ولا القهوة اطلاقا لوجود الكافيين وهو محرم في مذهبهم) .. ولكنهم عاديين من ناحية الملابس بل احيان كثيرة يكونوا غير محتشمين اطلاقا في لبسهم لانهم مو عرب.

10: نظرا لمذهبهم الديني فإن اغلب الشباب والبنات متزوجين من اعمار صغيرة .. طبيعي جدا يكون الولد عمره 22 ومتزوج وعنده ولد.





اتمنى اكون افدتكم على قد ما اقدر .. واللي عنده سؤال عن اي نقطة انا مستعد اجاوبه بشكل خاص عن يوتاه ولوغان او بشكل عام عن امريكا




ماجد