اسأل عن ديكالب Dekalb ويجيبك المحاسبي،

اممممم،، الا في اشخاص عدوا من المعهد بدون رسوب،، بس قليل،
اول شي خلي ببالك ان المعهد جديد، فتح من سبتمبر الماضي وماكمل سنة الى الان،
فعدد الطلاب اللي وصلوا ل المرحلة الاخيرة اصلا لايتجاوز الخمسة اشخاص!

هو تكدس السعودين من جهة ادى الى نزول مستواهم لان ماعندهم فرصة تطبيق اللغة مع غيرهم!
ومن الجهة الثانية، اعتماد المعهد على الملحقية بشكل كبير يقلل تحفيز ادارته على الابداع
النقطة الثالثة، ان اغلب المدرسين في المعهد بدوام جزئي، وهذي الفترة صيف، فيصعب استقطاب المؤهلات القوية لانهم مؤجزين!
النقطة الرابعة، هم الطلاب انفسهم! فمثلا تقييم الطلاب هو العامل الاساسي لفصل المدرس او استمراره! ويلاحظ ان المدرسين الجيدين يتم فصلهم لمن يدرسوا فصول السعوديين في المراحل الاولية، لان الشباب يخسفوا بالمدرسين الجيديين في الدرجات فما يستمر! انا درسني كم مدرس ممتاز جدا" ولمن درس الشباب، صرت اسمعهم يتذمروا منه ليل ونهار! والعجيب لمن تسمع طالب في لفل 1 او 2 يقلك المدرس اصلا يغلط في الجرامر! ومايعرف يتكلم انجليزي كويس! صح يالشكسبير!! والمدرس امريكي المولد والمنشأ! لذلك فقدنا الكثيير من المدرسين الجيدين، واظن المعهد ماعاد قادر يوظف مدرسين جيدين لان صارت سمعته انه كل شهر يفصل المدرسين!

فانتي اذا حصلتي معهد الكل يمدح فيه! ويقولوا ان مافيه تكدس سعوديين ويمدحوا مدرسيه،، ففكري!
لكن للاسف اغلب معاهد امريكا على نفس الحال!! وخصوصا التجارية،، ومعاهد المدن الكبيرة اسوأ واسوأ

الى الان طالب واحد عدى من المعهد بدون رسوب، بس كان جاي ولغته قوية!
غيره في طلاب وصلوا لآخر لفل، لكن بنشروا في الاختبار النهائي


ورغم هذا كله، الاخوان ترى مو كلهم متفقين على ان المعهد رديء، ولو انهم كلهم معترضين على بعض السياسات اللي ينتهجها،

احترم وجهتك اخ خالد، لكن المعهد حاليا لايبحث عن المدرس الافضل، بل يبحث عن المدرس الارخص او المدرس اللذي يتبع لاوامر الادارة
هذا كله بحكم تجربتي فيه
بالنسبة للتقييم فبكل امانه عن نفسي اعطي كل ذي حق حقه، والمدرس اللي يبحث عن مصلحة الطالب في العلم، ياخذ حقه كامل
اما المدرس اللي مايهمة مصلحة الطالب وهدفه الوحيد ارضاء الادارة من اجل راتب اخر الشهر! ياخذ حقه في التقييم دون نقص او زيادة
وللمعلومية ان هذا التقييم اللي يقدم للطلاب لايعتمد عليه بنسبة ٨٠٪ من قبل الادارة، لان ادارة معهد ديكالب لها تقييمها ايضا، مدرسين انا متأكد تماما بان الطلاب اعطوهم تقييم سيء جدا وانا منهم، لكن لازالوا يسرحون ويمرحون في كل شهر في هذا المعهد
ومدرسين اخذو تقييم معتدل لكن رجفوا من المعهد!!
ومدرسين لم يعجبهم المعهد بسبب النصب والاحتيال على الطلاب استقالوا منه، وعلى سبيل المثال الاستاذه هولند، تقول ما استطيع ان استمر في معهد يكذب على الطلاب بالشكل هذا!
ايضا نقطه مهمه حول استاذة كانت موجودة في الشهر الاخير واسمها ( مس بي) والكل يعرفها، كانت جيدة في الشرح مع ان لها عيوبها في التشدد من ناحية صعوبة اختباراتها واستحالة اخذ الدرجات كاملة في واجباتها واسلوبها حاد، لكن في اخر المستوى قالت كلام بشكل غير مباشر عن المعهد بانه هو سبب تشددها معنا، واذا سالناها بشكل مباشر تقول ما استطيع الرد عليكم لانه لو رديت راح ادخل في مشاكل، والان تركت المعهد ولا اعتقد راح ترجع للاسف

بالنسبة لموضوع الشباب اللي في المستويات الاخيره كثير منهم بنشروا في الاختبار النهائي لكن بعضهم مابنشورا بالتوفل!!!!!
وشباب في مستويات اقل بنشروا في اختباراتهم النهائية وايضا مشوا في التوفل!!!!
واحد من الشباب لما دخل المعهد وسووله اختبار تحديد المستوى حطوه في مستوى ٦
ولغته جيدة، حس بالقهر وتحطم لكن دخل اختبار ايليتس علشان يقيم نفسه صدق
لكن المصيبة انه اخذ الدرجة المطلوبة من اول محاولة!

واظن الشي هذا مايحتاجله تفسير اكثر.


وغير عن هذا كله، واحد معنا عنده شهادة لمستوى عالي في نفس هذا المعهد تماما في ديكالب، طلع السعودية وغير فيزته من مرافق الا طالب
لما رجع قالوا ماتكمل دراستك على الشهادة اللي اخذتها، لازم تسوي اختبار تحديد مستوى من جديد!!!
والحين هو يدرس في مستوى اقل من المستوى اللي معديه من اول!!
وش تقول اكثر من كذا؟

واللي يزيد الطين بلة حول خربطت هذا المعهد الخايس، الان في كلاسات الافترنون دامجين مستوى ٦ و ٧ و ٨ مع بعض!!!!!
وكلاس الحاسب الالي دامجين مستوى ٥ و ٦ مع بعض!!!!!
واعتقد مستوى ٣ و ٤ و٥ دامجينهم في الافترنون مع بعض!!!!!
والسبب ان ماعندهم مدرسين وغرف تكفي بان يكون كل مستوى لحاله
ويدرسونهم مناهج جزء منها مكرر ودارسينه في مستويات سابقة
اي تخلف وصل له هذا المعهد!!!!!!
شر البلية مايضحك، يقولون الكتاب ترجعه بعد ماتنتهي من الكلاس لا تاخذه معك البيت ولاتكتب عليه!
وعدد الكتب دائما اقل من عدد الطلاب ولازم كل واحد يذب وجهه على الثاني علشان يتابع معه الدرس.

والاعظم من هذا وذاك ان المعهد يلزم الطالب الدارس على حسابه الخاص ويلزم الملحقية على المبتعث بدفع ٧٠ دولار لكل طالب لاجل توفير المواد التعليمية!!!!!!
وفي النهاية يقولون لك رجعها بعد الدرس ويستخدمون نفس الكتب كل شهر!!!
حسبنا الله ونعم الوكيل.




نصيحتي للطلاب والطالبات الجدد، اتمنى ان يكون تفكيركم الكامل حول اختبار التوفل او الايليتس، لاتبنوا الامال على شهادة المعهد ابدا!
لان شهادة المعهد ما بتاخذها الا بعد ماتدرس فيه لاجل غير مسمى!

حاول تطور لغتك بنفسك، مارس اللغة ولو لوحدك، ادخل مواقع تعليم اللغة في الانترنت واتعلم منها واسمتر عليها حتى بعد وصولك لامريكا، طور قدراتك في قواعد اللغة، خذلك دورات في معاهد جيدة في المملكة، لازم تخلي امريكا مكان لممارسة اللغه وتطويرها مو لبنايتها او تاسيسها
حضر نفسك للتوفل او الايليتس واستغل الوقت اللي انت فيه قبل وصولك، لان المعهد في وضعة المزري الان مستحيل تطور لغتك عنده

الملحقية فاتحه المجال بالكامل للطلاب بتسديد تكاليف اختبارات التوفل او الايليتس لكل طالب مهما وصل عدد المحاولات
استغل الفرصه اللي بين يديك.

اعتذر عن الاطالة مجددا، واللي حاب يستفسر عن اي شيء بحاول اجاوبه قد ما اقدر


الله يوفق الجميع،، اخوكم مبتعث

السلام عليكم و رحمة الله و بركاته

الاخوه و الاخوات الاعزاء :

ياليت اللي يحط تجربه او تنبيه او تحذير من المعهد او المدينه يحط معاها حلول او اسماء معاهد افضل او او او .. لا تخلونا نحوس على عمانا بلييييز ..

و بالنسبه لي انا شخصيا قايل لكم اني جاي الاسبوع الجاي على ديكالب و دراستي تبدأ على July 18 /2011 و باقي ما سويت اي شي غير تذاكر الطيران و الفيزا , لا سكن و لا مواصلاات حتى الملحقيه ما عطيتهم خبر فياليت اللي يقدر يساعدني او يفيدني بشي اكون له من الشاكرين ..

اذا فيه احد ياليت يرسل لي ايميله ع شان اتواصل معاه و شكراً .

والله انا من ناحيتي كل واحد ورائيه الحمد لله انا يادي من لفل 1 والان لفل 6 ولله الحمد ما قد رسبت ولا مره

والصراحه والصراحه واقولها اللي موجودين واللي ما جوا واقولها لكل طالب

20% على المعهد والباقي عليك كل واحد يشوف نفسه ويهتم فيها قبل لا يشوف مستوى المعهد انا المعهد مرة علي شهور والله اتوقع انه ما في معهد في امريكا يكون مثله كانت شهور ولا اروع تدريس بمعنى تدريس ومرت شهور والله اني كرهت اللغه وانتوا ملاحظين التجدد في المدرسين لدرجه انه لو يشتكي 3 طلاب على شرح مدرسه انه سيء والله انها ما تكمل معنا الشهر اللي بعده مطروده ويجيبوا غيرها
لانه لو الواحد شاف مصيبت غيره تهون عليه مصيبته انا شفت معاهد ثانيه روح شيكاغو شوف معاهدها وقارن وانت راح تشوف الفرق التكدس والله فيكم فيكم والله ما يروح انا اعرف معهد قريب من مدينتي فكرت اني انقل له ولكن الحين مسحت الفكره قبل كان عدد السعوديين يمكن 30 فقط
السمستر هذا نزل عليهم 30 واحد زياده كيف الله واعلم عاد شوف السمستر اللي بعده كيف كم راح ينزل
والله الواحد اذا ما اعتمد على نفسه وشاف دروسه والله لينام في الفل اللي هو عليه اللي السنه الجايه

هذي وجهت نظري انا وباقي الشباب احترم وجهت نظركم وبتوفيق للجميع

انا اوافقك في كلامك كثييير، المعهد يتغير باستمرار، واشوف ان من اسباب هذا التغير المستمر في مستواه، الشباب واعتراضهم على كل شي، وبيني وبينك انا واحد منهم واحس اني تسببت في غياب واحد من افضل المدرسين!! بسبب اني اشتكيت خطأ اخطأه، وتسبب في ترسيب طلاب،
الطلاب نجحوا بعدها، والمدرس ترك المعهد!

هو الصراحة انا ماكان ودي يمشي لان المدرس تدريسه ممتاز! بس كانت مصلحة الطلاب انهم ينجحوا

الصراحة والحق، اني ما سمعت عن معهد في امريكا مافيه تكدس سعوديين!! وكل المعاهد تعاني من نفس المشاكل،
الآن في امريكا في اربعين الف مبتعث سعودي، واتوقع ان اكثر من نصهم في مرحلة اللغة! يعني تتكلم عن ابو عشرين الف شخص

والمعاهد المعتمدة من الملحقية مهي كثيرة، فانت لو قسمت عدد الطلاب على عدد المعاهد، حتحصل ان التكدس حاصل حاصل!

مر علي معهد واحد مافيه تكدس! لكن الملحقية ترفض النقل له لانه في كلفورنيا! والملحقية ترفض النقل لكلفورنيا بشكل عام

وانا حاط على جروب المدينة تقييم المعهد وسائل الشباب، في اربعة قايلين جيد ثلاثة قايلين ضعيف، وخمسة مقبول وواحد ممتاز وواحد جيد جداً
اخوي مبتعث، بيني وبينك ان من اهمام الاسباب الطلاب انفسهم!

الآن لو تذكر ايام المدرسة الهندية اللي رسبت اكثر الطلاب! ومشت! كنت اتكلم مع الاخوان يقولوا ان السبب ان الشباب كانوا ماخذينها مهزلة! ويتريقوا عليها باستمرار! فخلوها حاقدة عليهم ورسبت الكل!
جيت كتبت خطاب للشباب، قلتلهم وقعوا عليه كلكم انكم تطالبوا باعادة التقييم وان المدرسة ماكانت عادلة،
تصدق ايش؟ ولا واحد من الطلاب وافق يوقع! قلتلهم هذا الخطاب رح نعطيه ادارة المعهد ونرسله للمشرفين في ELS
الشباب كلهم يقلك مانبغى الادارة تحطنا في بالهم!

وبيني وبينك انا اعرف مدرسيين كثر حريصين على مصلحة الطالب، وممتازيين جداً ومنهم Reck
درسني ثلاثة اشهر، واشوفه من افضل المدرسين، اول ما درس الشباب كلهم قاموا يقولولك الرجال مايعرف يتكلم انجليزي! ومدري ايش! واتفقوا عليه في التقييم، والرجال مشى! الرجال معاه خبرة عشرين سنة تعليم في الجامعات! ومتقاعد وجا يشتغل في اي ال اس يسلي نفسه وهذولي جوا يقلك مايعرف يتكلم انجليزي وهم في لفل 2 و3! وقطعوا رزقه وحرموا المعهد منه وفي غيره امثله كثير

وبالنسبة لهولند، هي قالت لزوجتي انها تبغى تتفرغ وتشتغل على رسالة الدكتوراة حقتها! وترى رسالتها عن القرآن

وبالنسبة للشباب اللي تقول انهم بنشروا في الاختبار النهائي ومابنشروا في التوفل! اظن معلومتك مغلوطة،
لانهم مايتجاوزوا اصابع اليد! وعارفينهم واخبارهم عندي باستمرار وآخر اخبارهم عندي!

وبالنسبة لاختبار تحديد المستوى، فما فيها كلام ان المعهد نصاب فيها، ودايماً يحط الشباب في مستويات منخفضة عن مستواهم، انا جايب في التوفل درجة عالية جداً وحطوني في لفل 9! هم في تحديد المستوى يلعبوا لعبتهم عشان يترزقوا وللأسف، بس مهما حطوا الشخص الكويس في لفل منخفض، بيستفيد وماعليه الا يختبر التوفل برة ويرتاح

وبالنسبة لموضوع المرافقين، لان المرافقين بيكونوا على برنامج اللغة الغير المكثف، فلمن يرجعوا على المكثف يعاد تقييمهم،

ودمج المستويات ترى انا ماشوف انها فيها شي! اذا ماكرروا المناهج، بس للأسف سمعنا انهم هذا الشهر عادوا المناهج على بعض الشباب!!

والكتب وللأسف معاك حق واحس احياناً ينجحوا ويقييموا ويحددوا المستوى بناء على توفر الكتب! مو على المستوى الحقيقي!

ومزبوط المطلوب ان الطالب يحط باله على التوفل والايلتس، وشهادة المعهد هذي يخليها ثانوية، اذا ماقدر يجيب درجة التوفل والايلتس،

وبيني وبينك من اهم وسائل تطوير اللغة بينك وبين نفسك المسلسلات الامريكية، وبدون ترجمة
ومزبوط المعهد مايبدأ من الصفر، ما يبدأ يعلم الحروف واللكلام هذا من الصفر، في اعتبار المعهد ان الطالب على الاقل عنده المبدائ وهو يبني عليها فالطالب يبغاله يبني الاسس على الاقل ويجي هنا يطور اللغة

ونصيحتك في محلها، لازم كل طالب يخلي في باله انه يختبر التوفل والايلتس باستمرار وهذا اصلا الزامي على نظام الملحقية ان الطالب يختبر هذي الاختبارات بعد مرور ستة اشهر من دخول امريكا

وبالتوفيق لك وللجميع يارب،

توني متصل على واحد من الاخوان في المراحل المتقدمة وكان بمعهد في ولاية ثانية، وسألته عن رأيه في المعهد ومقارنة بالمعهد اللي كان فيه
يقول ان المعهد قواه وفاده كثييير في المحادثة ويقول انه افضل من المعهد اللي كان فيه وان الادارة في هذا المعهد هي اكبر ميزة فيه!

سألته كم يقيم المعهد من 5 فعطاه 3.5

اقوول الله يوفقني بدراستي انا دراستي تبدى في يوم ١٨ \٦ عموما اتمنئ اللي دراسته بنفس ميعادي يتكلم معاي خلونا نتعرف ونسولف سوا بطياره وكذا

بالتوفيق ان شاء الله،، كأن التاريخ اللي كتبته قبل خمسة ايام؟
الله يسهلك ان شاء الله

الأخ WanTed111

ممكن تشرح طريقتك في دراستك وتقوية لغتك ؟؟؟؟؟؟

يعني الـ 80% اللي عليك ؟؟؟؟؟؟؟ ايش تسوي فيها ؟؟؟؟؟؟؟

الحقيقه فيه اشياء كثير منها القراءه ممتازه جداااااااااااااااااااااا لانك اذا قريت كثير راح يعلمك الكتابه
والاستماع راح يعلمك التحدث هذي قاعده

انا اشوف افلام بعض الاحيان السبتايتل حقها انجليزي اذا وصلت لكلمات ما اعرفها جنبي المترجم اترجمها احاول اني كل كلمه جديده تحطها في جمله لانك لو تجلس تحفظ الكلمه لحالها راح تنساها
ومن اهم الاشياء اطلع روح شوف الناس حاول تتعرف على العالم اهم شي لا يكونوا عرب اختلط معاهم خل وقتك كله معهم بس اكيد في البدايات بيكون صعب عليك تتعرف على امريكان
يعني البدايه خليك على القراءة والافلام

اما ان يومك كله مع عرب وتقولي ليه ما تعلم هذي المصيبه

هذي طريقتي في اللغه وانا اشوف انها ممتازه طبعا هذا شي والمعهد و كلاسات شي ثاني لان المعهد يهيئك للجامعه كيف تكتب هذي اللغه الاكاديميه والخربيط حقتها
مثلا كيف تكتب بحث باسلوب اكاديمي مو بالاسلوب العامي وهذا شي مهم لازم تتعلمه

هذا اللي في بالي في الوقت الحالي وبس

ارجوا تقبل وجهت نظري