أي استفسار عن معهد ELS أو ولاية إنديانا أو عاصمتها إنديانابوليس .. أنا في الخدمة

سلآم أبو عبدالعزيز ، وأسفين لو أزعجنـآك على الخآص طآل عمرك ..

تقدر تفيدني عن هذي الجآمعه :Butler University ..

يعطيك العافيه

للأسف ما عندي معلومات عنها ،
الا انها من الجامعات الصغيرة التي تقع شمال مدينة إنديانا بوليس ،
ولا أعرف أحد من الشباب يدرس فيها ،
لو كان الموضوع يهمك بشكل كبير عطني استفسارك بشكل دقيق واتواصل لك معهم ..

مساء الخير على الجميع
اخوي ابو عبدالعزيز احتاج مساعدتك يالغالي مرررره ضروري ولكن طلبي غريب شوي
انا حاب اخذ كورس انجليزي لمدة 6 شهور فقط في ولاية انديانا حبية هذه الولاية
مدري ليش وحاب ان المعهد يكون تابع لجامعه وتدريسهم جييييد
بس (مايكون معتمد لدى الملحقية )
بتقولي ليش ؟ بقولك ليش
1- لعدم وجود السعوديين بكثرة في المعاهد الغير معتمده وهذا أهم شي عندي
2- لعدم رغبتي بالابتعاث
3- لرخص اسعارهم
والف شكر لك

ما شاء الله عليك وانا أخوك .. على وصفك ؛ طلب مرة غريب
لكن فيما أعرف ويا ليت تتأكد اكثر ان المعاهد ما تدخل في نطاق الاعتراف من عدمه في الملحقية دام المعهد معترف به لدى الجامعة المعترف بها عند الملحقية ، يعني بطريقة اخرى .. لا يوجد معهد معترف او غير معترف به الا ما يسمى بحالات الإيقاف لبعض المعاهد لوجود مخالفات فيها وهذه ما تجي الا في حالات استثنائية ، بعدين وانا أخوك انا استبعد وجود معهد يتقصد عدم قبول الملحقية لأنهم الان الرقم ( ١ ) في مصدر دخل المعاهد ، وعموما دام سؤالك عن ولاية إنديانا فالمعاهد اللي اعرفها في اندي أنابوليس وتيراهوت وبلمنقتون ولافييت وساوث بند كلها معترف بها ، ولا اعرف معهد وفق شروطك ومواصفاتك بالضبط ، لكن اللي اعرف وانا أخوك انك في كل الأحوال راح تستفيد من اي معهد تلتحق به دام طموحك الاستفادة ، وأعيد واكرر يا ليت تتأكد من غيري عن توفر معهد وفق مواصفاتك .
وأرحب جداً ان يكون بيننا تواصل لين تلاقي مطلوبك ، لأني بصراحة سويت بحث قبل ارد عليك ولا حصلت نتيجة .
وحياك الله وبياك ..

اسمحلي با بو عبدالعزيز بالمداخله
ومشكور على كل المساعدات الي تقدمها وانا من الناس الي ساعدتني كثير وجزاك الله الف خير
لكن عندي ملاحظه . عشان الناس تكون بالصورة
المدينه حلوووة وهادئه والشعب اطيب منه ما شفت
لكن المعهد للاسف 99% سعوديين .1% باقي الجنسيات
طبعاً مو عيب انه سعودين بالعكس هذا يدل على قوة المنهج .
تخيلوا بالكلاس الي انا فيه والله 20 طالب كلنا سعودين وطالب واحد صيني >>> جاته جلطه
مجرد رأي
الي يبي يتعلم يروح ريف او قريه او بلد صغير .
وسلامتكم

ما قلت الا الصحيح وانا أخوك مع اختلافي معك في تحديد النسبة فقط ،
تمر علي كلاسات افترنون ١٠٠٪ سعوديين ..!
لكن يبدو لي ان المشكلة عامة وصارت ظاهرة ،
حتى في القرى والأرياف بتواجه نفس المشكلة ،
واصبر لك كذا شهر وراح تلاحظ هالشي ..

ويا ليت كل من حضر او جرب المعهد ينورنا بوجهة نظره ،
الموضوع ما راح يكون ثري وقيم بدون تعدد وجهات النظر ،
وإضافة ( شخصية مهمة ) جداً جيدة اشكره عليها ،
يعني على بلاطة .. ترى الموضوع مو ( سكن خاص )
دمتم بخير واتمنى للجميع التوفيق ..

كفيت وفيت يابو عبدالعزيز . انت مغطي الموضوع من كل النواحي ( انديانابولس+المعهد )

لكن من باب المشاركه حبيت اضيف نقطه ويمكن تختلف معاي
طبعا الي يجي راح يسمع من الشباب انواع التحطيم من ناحية المدرسين يعني ( استقعاد للسعوديين )
طبعاً الكلام ذا والله مو صحيح >>انت تتعامل مع امريكان بالدقيقه والثانية وبينك وبينه درجات وغيرها سلام عليكم
من خلال تجربتي اشوف ان النجاح سهل جيب فل مارك في ( الحضور , الواجبات, الكوزات ,) + اخلاق وادب واحترام . وربي راح تنجح وتفرض نفسك على الجميع حتى لو جبت صفر بالنهائي
لكن الي عنده اساسيات ومستواة متطور لا يضيع وقته بكلام فاضي . الا اذا كان يبي يصل لفل 109 خلال اقصر مده .( عشان يروح للجامعه )

اعذروني على الاطاله .. والف شكر لك يابو عبدالعزيز .. وياليت تنوه لي اذا كنت مخطئ لاني توي جديد . <<<مجرد وجهة نظر.
دمتم بود

عين العقل عين العقل

وبصراحة انا ما حرصت أمدح او أذم المعهد بقدر ما اصور حالة فقط ،
لان كل شخص له تجربته .. وتجربتك تطابق وجهة نظري 100٪ وان كانت تخالف وجهة نظر بعض الزملاء ،
انا ما راح اقدر أعذر انسان مهمل كل اليوم وسيء في التعامل ثم يطلب من المعهد يكرمه ..؟!
بعض الشباب يسوي فيها فاهم ويختلي المعهد على جنب ويعزم بعض الأساتذة في بيته او مطعم يبيه يسلك له ،
لكن اذا جاء الواقع النظام والعقلية الامريكية تحاسبك وفق مجهودك انت فقط ،
يعني بطريقة اخرى .. اذا فهمت كيف يفكرون هم عرفت انت كيف تتعامل معهم وتمشي أمورك من غير منة او حاجة لاحد ،
شكري وتقديري لك ع الإضافة المتميزة كشخصك ..
دمت ومن تحب بخير ..

ههههه اول مره ادري .. من جد وصلت للعزايم .. عموما . الحمد لله على نعمة العقل
لكن نعيش ونشوف.
عموما ياليت الشباب يفكرون بتمثيل افضل صورة عن السعودية وعن اخلاقنا وعاداتنا ودينا .( مستجد بامريكا ومتحمس )
لان زي منت شايف المعهد فيه جنسيات وثقافات بصراحه متفوقين علينا من ناحية الادب واحترام النظام والانضباطية.
لكن من ناحية الذكاء >>ما عندك احد

تحياتي للجميع .. ودمتم بود