أي استفسار عن معهد ELS أو ولاية إنديانا أو عاصمتها إنديانابوليس .. أنا في الخدمة

السلام عليكم ..

انا سمعت عن معهد ELS بأنديانا .. وسمعت جوانبة الأيجابية والسلبيه وحقيقة ما أختلف معاكم أن توجه الطلبة السعوديين لمعاهد ELS أو غيرها بكثرة ..
وأنا بصراحه ودي أجي أدرس على حسابي .. وأخذت خلفية كافية من مكتب القبولات عن ELS ، وبالصدفة لقيت هالموضوع وحبيت أسألكم جزاكم الله خير عن بعض الأسئلة زيادة في التأكيد ..

أبي أسأل عن الأمان في المدينه .. هل المدينه آمنه أو فيها مشاكل أو خوف ؟

هل المدرسين على مستوى من الكفاءة الي يخليهم يعطوني الطريقة المناسبة لتطوير لغتي ؟ مع أني أدي أنه 70% من المجهود على الطالب ! بس أبي أعرف هل مستوى المدرسيين يأهل ؟

بما أنكم ذكرتم أنه السعوديين في المعهد بكثرة ، فحبيت أسأل هل هالموضوع مسبب مشكلة بالمعهد ؟ لأنكم ذكرتم أنه تغيير المعهد أفضل بسبب كثرة السعوديين؟ وأذا فيه مشاكل .. وش هيا المشاكل الي ممكن تواجهني ؟



بصراحه أنا جداً محتارة وحبيت أخذ فكره عن المعهد بما أنكم فيه .. وماتدرون معلوماتكم راح تحدد مصيري بهالمكان ..
وجزاكم الله خيرر ..

هذا الحاصل

لكن الحق عاملهم بكل أخلاق واصبر على زعلهم شوي وما راح تلاقي الا كل خير ،

وشخصيا ما طلبتهم في شي وردوني لأني ماشي معهم بكل احترام ..

مثلا .. طالب يدخل ويتهجم ويرفع صوته ويقل أدبه وفي كل كلاس غش وتريقه ؛

هذا ممكن ان المعهد يداريه ..؟!!

وعليكم السلام وحياك الله وانا أخوك ..
كل استفساراتك جوابت انا والشباب عليها وما يمنع نعيدها باختصار ؛

١. معاهد ELS تقوم على فكرة التعليم المكثف للطالب بنسبة ٦ ساعات يوميا على مدار ١٣ شهر ، تبدأ من المستوى ١٠٠ وتنتهي بالمستوى ١١٢ بنسبة ٤ اسابيع لكل مستوى ، والمعهد مقبول لدى ٦٠٠ جامعة لمرحلة البكالوريوس ويقل العدد تدريجيا لمرحلة الماستر والدكتوراه والتخصصات الصعبة والنادرة مثل الطب ، والطالب اول ما يجي يخضع لاختبار تحديد مستوى يتكون من فقرات كتابة واختبار تحريري ومقابلة وعلى اثرها يتم تحديد مستواه وتأهيله للمستوى المناسب له ، وشخصيا .. أشوف المعهد صعب للي ما عنده اي خلفية في اللغة ، يعني لا تقبل عليه الا وعندك أساسيات ع الاقل حتى لو كنت راح تبدأ من المستوى ١٠٠ والنسبة اللي ذكرتيها ٧٠/٣٠ بين الطالب والمعهد صحيحة جدا .

٢. الولاية والمدينة تعتبر من اكثر الولايات أمانا في كل امريكا من واقع نسبة الجرائم مع السكان والمساحة ، والقانون حاضر فيها بقوة إعلاميا وثقافيا بل وتعليميا ، والأجهزة الأمنية متواجدة بشكل مطمئن للغاية ، مثلا .. هنا ممكن الواحد يسهر للفجر ويرجع للبيت بسيارته براحته ، وكثير من الولايات ما نسمع فيها بمثل هذا الشيء ، وللاحتياط .. عند السكن ابتعدي عن غرب المدينة لتعدد الاعراق هناك وأمورك بخير ان شاء الله .

٣. تخصصات المدرسين اغلبها خارج نطاق تعليم اللغة لغير الناطقين بها ، لكن للأمانة عندهم طرق ووسائل متميزة وفريدة في التعليم خصوصا لفئة الشباب منهم ، يعني فيه استمتاع في التعليم عندهم جميل وجذاب وهذا من وجهة نظري ، لذلك أشوف ان المعهد قادر وبقوة على تحصيل اللغة للطالب بشكل متميز *.

٤. كثرة السعوديين الان مشكلة في كل المعاهد والجامعات في كل امريكا ، يعني ما كو فكه ، لكن ما للطالب الا انه يساير الوضع العام ويعوض هذا النقص بالممارسة خارج المعهد مثل السكن مع عائلة ، او يقلل احتكاكه بـ السعوديين داخل المعهد ، وبصراحة .. مع إيماني بان قلتهم تساعد على اكتساب اللغة سريعا الا انني ما أشوف ذيك المشكلة الكبيرة اللي تمنع اكتسابها لمن لديه إرادة قوية ، بل بالعكس.. في كثرتهم جانب آخر حلو يشعرك انك بين اهلك واخوانك واخواتك ، يعني لا يصير عندك حساسية من هذا الموضوع .

وخلاصة الكلام والكلام الاخير .. شخصيا مرتاح جدا مع إدارة المعهد وغالبية مدرسيه ، وموقع المعهد في الداون تاون معطيه مذاق اخر وقت البريكات وفترة الغداء ، ولا افكر نهائيا أغير المعهد *،*والولاية متميزة في موقعها السياحي والترفيهي وتوفر المساكن والخدمات ومناسبة أسعار المعيشة مقارنة بغيرها من الولايات ، بالاضافة الى وجود الكثير من الجامعات التي تحوي غالبية التخصصات الدراسية المرغوبة ، لذلك دائماً الولاية تأخذ ترتيب العشرة الأوائل في رغبة واختيار الطلاب المبتعثين من بين كل الولايات منذ خمسين عام ..!!

دعواتي لك ،

سجل عندك ثنين
انا بعد مرتاح ولله الحمد . لكن مستقبلا رايح كولومبس نشالله
المعهد الموقع السياحه والاجواء ولا اروع جوء دراسه
وبالنسبة لي ساكن مع عائله ولا احلى والامان والخصوصية فوق ذلك .
وحتى والجيران تكفيك الابتسامه " تشوف ضرس العقل من قوة الابتسامه "
ومتقبلين ثقافتنانا وعادتنا .
تقبلوا تحياتي ودمتم بود

هههههههههههههه
اهم شي ضرس العقل بائن ،
الله يوفقك ويكتب لك ما فيه الخير ..

تصحيح : لاحظت عند مراجعة الموضوع إني نصحت بعدم السكن في ( الغرب ) من إنديانابوليس لاعتبرها الأقل في نسبة الأمن ،

( وأرجو أن لا يفهم منه أنها خطيرة أو مريعة ) ولكن مقارنة بغيرها ،

والصحيح إنني أعني ( الشرق ) لأن الغرب من المواقع المتميزة في المدينة وبالذات منطقة SpeedWay التي تعد من الضواحي الملتصقة بالمدينة ،

خصوصاً للطلاب الأجانب لقرب المنطقة من الجامعة والداون تاون وتوفر الكثير من المناطق التجارية والترفيهية والأسواق أكثر من غيرها ..

لذا لزم التوضيح والتصحيح ..

سلام ابو عبد العزيز
اولا : ابغا اعرف اسعار المعهد و تكفى لا تحطلي روابط لموقعهم يعني قلي اسعارهم لا هنت لشهرين او ثلاثه او اربعة شهور حسب نظامهم.
ثانيا : ابغى اعرف متوسط اسعار السكن بصراحه السكن مع عايلة غالي علي بس ايش رايك في السكن مع روميت اجنبي اقل في السعر و تستفيد من لغته و هل ممكن تحصلي روميت امريكي.
شاكر و مقدر لك مجهودك ....

حياك الله ..
الأسعار تبدأ من $1290 الى $1730 حسب نوع الدراسة المطلوبة عن كل شهر ،
ابلكيشن التسجيل : $155
الدورم $1350 لكل شهر
السكن مع عائلة $850 عن كل شهر
وفيه نثريات اخرى مثل التامين وشحن القبول وغيرها ..

من حيث السكن .. انا ما جربت الخيارات المقترحة منك ،
لكن لاحظت الشباب يرتاحون للسكن مع عائلة اكثر ،
لان البحث عن روميت مناسب شاق ومتعب ،
صحيح انه اسرع في تعلم اللغة .. لكن الاستقرار مع العائلة أريح بكثير .
وفي كل الأحوال .. اقترح الترتيب مع المعهد .

ملاحظة :
لما اقترح مراجعة موقع المعهد فذلك لسبب الاطلاع على كل التفاصيل والخيارات المناسبة لك ،
والا بالإمكان انسخ والصق هنا بكل سهولة ..
لكن احيانا تحديد الرغبة لا يكون الا بعد الاطلاع على كامل التفاصيل ليكون الاختيار بقناعة .

وحياك الله وانا أخوك في اي وقت ..

بالنسبة لاسعار المعهد الي ذكرتها هل هي شهرية ولا كل كم شهر يعني طريقة الدفع للمعهد كل سمستر ولا.
وتقصد ان سعر الدورم يتقسم ع اربعة انا ما عندي مشكلة احد يشاركني الغرفة.
و يا ريت تحطلي رابط المعهد للتسجيل و اشوف خياراتهم و اسف ع كثرة الاساله بس انت اكيد مقدر ظروفي لاني ناوي اجيكم انشاءالله

الله يحييك وهذا واجبي ..
المبلغ عن كل مستوى ، والمستوى الواحد مدته اربعة أسابيع ،
والدفع لهم يجب ان يكون بداية الشهر كأقصى حد .. ولو رغبت بالدفع لعدة اشهر فهذا بإمكانك ،
بالنسبة للدورم ما عندي فكرة دقيقة عنه .. لكن يبدو لي كما ذكرت ،
وارجع أنصحك بالسكن مع عائلة عن طريق المعهد ،
الكثير من الزملاء مرتاحين .. لكن المهم تضع المواصفات المطلوبة قبل تتعاقد معهم ،
وبالنسبة لرابط المعهد راح تلاقيه في البحث في موقع قوقل باسم ELS INDIANAPOLIS
المعذرة ما قدرت اترك الرابط هنا لأني اكتب بالايباد وإمكانية النسخ واللصق متعثرة معي حاليا ..
دمت بخير وفي الخدمة دوما ..