وأخيرا صرت مبتعث!! بس بعد عنــاء!!

February 9th, 2009, 09:42 PM

الــــــــــسلام عليكم ورحمة الــــلـــــــه

هلا والله بأخواني واخواتي المبتعثيـــن . . .

اخيــــرا صرت مبتعث . . . من جد من بعد طول انتظار وتعب وقلق وتوتر استلمت قــرار الابتعاث وأمر الإركــــــاب والتذاكــــر من مكــتـب الطيار. . .

بس بعد ايش ؟ لازم شوية مرمطة على شوية تعكير مزاج بس الحمـد لله كل شئ كان ماشي...

اليوم ( الاثنيــن 9 / 2 / 2009 ) رحت وزارة التعليم العالي بحي الغديـــر. . .

طبعا رحت الرياض امــس (الاحد 8 / 2 / 2009 ) وسكنت عند واحد من الشباب وثاني يوم والله ما قصر ووصلني لوزارة التعليم العالي بحي الغدير. . . وصلت عندهــم الساعة 8:50 دخلت من الباب الرئيسي وعملت نفسي غشيم سألت الأمن ويـــن الصالة الغربية يالحبيب؟ قال لي : ســـم! قلتله :سم الله عدوك وين الصالة الغربية؟ قال لي : اطلع من برة ولف يمين وادخل من البوابة اللي هناك. المهم رحت الصالة الغربية دخلت وسألت الامن من هنا يستلموا قرار الابتعاث ؟ << أحب اتلاكع ههههه قال ايه خذ رقم . . . واخذت رقم لموظفي الابتعاث ورقم للتذاكر وانتظرت شوية بعضهم يسحبوا ارقام ومدري وين يروحوا؟ ؟ !! المهم مشي السرا سريع كان رقمي 48 واول ما دخلت كان في العشرين ربع ساعة وناداني قال الموظف آمرني يالطيب! قلتله : ابغى قرار الابتعاث قال عطني رقم الطلب . . وعطيته . . . اعطاني صــورة من قرار الابتعاث وقال لي روح للفرع الرئيسي للوزارة ادارة الميزانية وخذ منهم امر اركاب قلت في نفسي يا الله ليش كذه مو قرأت في المنتدى على طول عالطيار ما يحتاج هذه المرمطة بغيت اقول له ترى اللي بالمنتدى يقولوا بعد القرار روح عالطيار على طول ورقم امر الاركاب موجود تحت يمكن انك غلطان 0 0 بس خفت يكفخني خخخ

المهــم رحت زي الحلويــــن لوزارة التعليم العالي اللي بالناصــرية . . . ودخلت لإدارة الميزانية واخذت استمارة امر اركاب اخذتها من اول مكتب عاليسار في ادارة الميزانية وبعدين عبيتها ودخلت ثاني مكتب عاليمين قلتله هذه عندك يالطيب؟ قال والله مو عندي بس يلا هات مني رادك قلت الله يعطيك العافية . . قال لي وين المدينة اللي رايحها وطلب منـي صورة جواز السفر والفيزا وبطاقة الاحوال وصورة قرار الابتعاث (( لاتنسووا تصوروا قرار الابتعاث اول ما تستلموه)) وبعدين دبس لي الاوراق وقال روح للصادر (الاتصالات الادارية) وخلهم يعطوك رقم المعاملة. . رحت للصادر هذا اول ما تطلعوا من ادارة الميزانية ادخلوا يسار بتلاقوا بوابة وبعدها صالة اخر الصالة ممر ادخل منه يسار وعلى طووول الين يقابلكم باااب مخرج اخرجووا منه وروحوا يمين امشووا شوية بعدين يسار وعلى طول بتلاقوا مباني صغيرة عاليمين ثاني مبنى هو الاتصالات الادارية( الصادر) ادخلوا عنده واعطوه الاوراق وبيعطيكم رقم ويكتبه على امر الاركاب ( بعض الشباب اعطاهم ورقة لوحدها مدري حقت ايش) بس انا كتبلي على امر الاركاب رقم المعاملة وقال لي خلاص روح للطيار. . .

ورجعت ثاني للوزارة بحي الغدير ( انا كنت ساحب رقم للتذاكر وكان رقمي 57) رجعت لقيت الرقم 127 قلت ايييوة بسحب من جديييد والله مرة صعبة راح ادخل عرض سألت الامن قلت له كيف الوضع انا رقمي 57؟ قال اسحب رقم جديد قلتله عندي رقم قال خذ رقم وروح وجرب رحت لمكتب الطيار رحت للهندي كان يطلب رقم جديد قلتله انا رقمي 57 بس عشان رحت خلصت اوراقي << كلمته بالانجلش احسه انبسط . . . المهم اخذ مني الرقم واخذ اوراقي وقال وين الرقم اللي على قرار الابتعاث روح خذه من الموظفين قلتله هذا الرقم( اللي اخذته من الصادر) بعدين قال لي وهو معصب لييش ما كتبوه هنا ويأشر على قرار الابتعاث المهم كتب رقم المعاملة على صورة قرار الابتعاث واخذ الاوراق واعطاني امر الاركاب قلتله ( is this for me? ) قال ايوة
وقال انتظر شوية . . . . والله طولت وانا انتظر تقريبا ساعة

ونادى اسمي واعطاني التذاكر والحمـــــد لـــــلــــه . . .

جــدة - واشنطن الخطوط السعودية 15 مارس

واشنطن - دنفر United Airlines مارس 17

هذا كل اللي صـــــار معايا عند استلام قرار الابتعاث وامر الاركــاب والتذاكر

حبيت اقول لكم التفاصيل للفــــــــــــائدة . . لاني انا استفدت من هذا المنتدى وحابب اني افيد ولو بشي بسيــط. . .

يلا لاتنسونا من دعواتكم. . .

اتمنى لكم التوفيــــــــــــق

Scorpion6

• نشر عبر تويتر
• نشر عبر فيسبوك
• نشر عبر جوجل