محتارة بين كتم الامور او التحث بها ؟

والله شوفي أختي كل انسان يعرف نفسه ومن حوله ويعرف نفسيته ونفسيت من حوله

أنا من ناحيتي الى يعز على وأدري في نفسي انه يحب لى الخير أبادر وأقوله وانتظر نصيحته والى مايحب ليا الخير أحاول قدر المستطاع ابتعد عنه في هاذي اللحظه والمشكله انو في كل وقت من عمرنا ومن حياتنا يجون ناس ماتعرفي ايش في خاطرهم عليك هم يحبو لك الخير أو العكس فأنا أقول مع العينه هاذي حاولى تحطي لهم خط أحمر مايتعدوه يعني كمية معلومات تحيرهم عشان مايعرفوا انتي طالعه ولا باقيه توك وبيني وبين كل انسان وله شخصيته وحسب المجتمع الى حوله


ولا تخافي أولاً وأخيراً الا من الله

شوفي ياغاليه الرسول صلى الله عليه وسلم قال (استعينوا على قضاء حوائجكم بالكتمان)
يعني الحكاية مو حكاية لؤم او خبث او عدم محبة الخير للغير
لكن اي شئ تطلع ريحته من بدري كل الانظار تصير عليه وسبحان الله يتعكس الامر لأن الناس تتناقل الاخبار وماتدري الخبر يوصل لحد فين
فأنتي قولي لأسرتك فقط وإن كان احد مرررة يعز عليك وعارفة انه مايتكلم وينقل كلام
إنت ماتسوي شئ غلط علشان ماتتكلمي لكن في نفس الوقت (من كتم سره حكم أمره)
بس إن جاكي قبول وقبل السفر بأسبوعين تقريبا اتصلي على أقاربك وخبريهم وسلمي عليهم واتسامحي منهم الواحد مايدري عن عمره او عمر غيره يصير حتى لو سافرتي يفتكرونك بالخير مايشيلوا في نفسهم عليك او يقولوا خايفة على نفسها من الحسد ليه إحنا مو حسوديين ومن هالكلام
إحنا لما اخوي سافر كانت العائلة كلها عارفة من شهور بس مايدروا موعد السفر متى
ولما قرب يسافر زارهم في بيوتهم وسلم على عماته وخالاته ومن يعز عليه وعملنا له عزومة في استراحة وعزمنا فيها الاهل والحبايب وماسافر إلا كله يدعي له ماشاء الله تبارك الله
الله يوفقه ويسهل اموره
إنت استعيني بالله ووكلي امرك له
ورددي اللهم هب لي من لدنك سلطانا نصيرا وادعي وربنا يجيب لك الخير من كل مكان بحوله وقوته

اختك يسر

هلا اختي العزيزه

شوفي من الافضل انك تعملي وتنجزي في خفاء وقبل لاتسافري بيوم اتصلي على اهلك واقاربك وصاحباتك او زوريهم وقوليلهم انا مسافره رايحه ادرس

وانتبهي لايصير معاكي زي ماصار معايا قمة الاحراج

انا اللي حصل معايا سافرت وماكلمت احد عشان عارف ان في ناس حسوديه في المحيط ودا طبعا عرفته من تجربه سابقه
اذكر قبل كم سنه تقريبا اشتريت سياره جديده وحلوه وكانت موديل السنه بي ام

المهم في ناس لما شافو السياره وجهوههم انقلبت وبان عليهم الحسد المهم السياره والله غاليه مو رخيصه شوفي ماركبتها الاسنه واثنين بس والين اليوم وهيا مرميه في الورشه

المهم انا سافرت وطبعا ماكلمت احد قبل لا اسافر
وماقلت لاحد مو عشان شي بس ماحصل وان احد سألني ولا انفتح الموضوع
المهم صرت كل ما اكلم احد من اخواني يقلي فلان يسلم عليك وفلان يسأل عنك واخدو رقمي واتصلو عليا
وقمة الاحراج
يقولولي كدا تسافر ولاتسلم ولاتقلنا
اتصلو عليا عماني الكبار وعماتي وخالاتي واقاربي كلهم و زعلانين مني ايش دا ياعلاء كدا تسافر وماتسلم ولا تودعنا
ورجعت بعد فترة البلد المهم كنت كل ما اقابل احد يعاتبني
حسيت نفسي ااتورط معاهم
بس عاد انا ماينخاف عليا اصرف اموري كويس واخارج نفسي
عشان كدا لايصير معاكي زي ماصار معايا

يا اختاه اسكتي ولاتقعدي تبيني لكل واحد الين ماتخلصي امورك مره ويبقالك يومين ولا تلاته على السفر عاد قولي للكل ولاتنسي تسلمي عليهم وتودعيهم عشان كمان يدعولك

وربنا يحميكي ويحفظك من العين ومن كل سوء

وكل عام وانتي بخير

وكل عام والجميع بخير



اللهم صلي وسلم وبارك على سيدنا محمد وعلى اله وصحبه اجمعين