هل يوجد وضايف بعد البعثات؟؟؟ياليت الجميع يشارك

كلامك صحيح ياخوي وانا شخصيا حضرت اجتماع للموسى مع المبتعثين وقال فيها بالحرف الواحد نحن غير مسؤلين في توظيفكم؟

ونبي منكم وقت ترجعون الى السعودية انكم توظفون ناس وتفتحون مشاريع وليس العكس؟

نعم وزارة التعليم العالي غير مسوؤلة عن التوظيف

الطالب المبتعث عن طريق التعليم العالي مثله مثل خريج اي جامعة سعودية

يتخرج الطالب و يدور وظيفة بنفسه

لكن يا اخوان لو نروح نسأل اي واجد متخرج من امريكا راح يقولكم روحوا درسوا في امريكا احسن لكم

يعني احسب حسابك بعد 10 الى 15 سنه ... سلاحك راح يكون شهادتك في كل مكان
وتذكر ان احنا نعيش في اغنى دوله في العالم ولله الحمد

يعني ان شالله ماحد بيضيع

واكيد في فرق كبير بينك وبين الي يتخرج من الجامعات السعوديه
من ناحيه المناهج
اسلوب التعليم
الاجواء الدراسيه
التطور الذاتي
الاختلاط ومعرفه الشعوب الاخرى
الالغه الانجليزيه
و و و و و و و و و ........... الخ

ولكن برجع ونقول التوفيق بيد الله سبحانه وتعالى .

كل شي بيد ربك سبحانه
لكن بقولك شي اتوقع انا الدوله ماخسرت عليك هالخساير الا انه تبي تتهم لموضوعك

يشباب كيف ما في وضائف

يعني يروح ها التعب كله بلاش مو صحيح

يعني ترجع بشهاده قويه ولا تحصل وضيفه ......>>>>>>>>>>ما تدش الاعقل


الا فيه وضائف عاليه ان شاء الله

مشكورين ع المرور الجميع
بس اتمنى اننا نخرج من الموضوع بفايده
يعني انا سبق وقلت طرحت الموضوع من باب التحفيز مو من باب التحطيم
مثلا الرد يكون انا صاحبي يشتغل في ارامكو شهادته بكارليوس يستلم راتب 7الف درس في بريطانيا تخصصه علوم حاسب يشتغل في نفس تخصصه
انا ماطرحت هذا الموضوع الا بعد ماسمعته يوم الخميس بعد الظهر قام الامام يتكلم عن السفر والدراسه بالخارج قال اعرف ناس رجعت مالقيت وظايف وانتحرت مع اني معارض للكلام هذا وماقد سمعت احد انتحر لكن مثلا انا لما واحد يرد يقولي ترى فلان تخصصه كذا وشغال براتب كذا اتشجع واعرف ان التخصص ذا مطلوب من الشركات
وقبل كل شي انا عارف ان كل شي باارداة الله اذا اراد بتلقى واذا مااراد حتى لو معك دكتوراه ماحتلقى لكن الواحد يعمل بالاسباب نبغى نخرج بفايده نعرف ايش التخصصات المطلوبه وشاكر للجميع

اكيد الوظيفة حسب اجتهادك الشخصي الوزارة مالها اي دخل

قبل اسبوع سألت شخص يشتغل في الموارد البشرية في احدى الشركات

يقول ان خريج البكلريوس في التخصصات الادارية يستلم نفس راتب ومزايا خريج الجامعات السعودية ولا يفرق عليه بشئ

يعني يا صاحب التخصص الاداري وضعك مو افضل من خريجين الجامعات الملك سعود

والبنوك الان اغلبها صارت تطلب ماجستير


والله يوفق الجميع

والله يا شباب اتركوا عنكم كلام الوظايف دولتكم دوله وسطات

ولد عمي متخرج محاسبه من امريكا ومعادله 2.5 من 4 ومن جامعه مو قويه والكلام له الان سنتين من تخرجه رجع السعوديه ومعه شهادته ومكالمه بس من عمي الله يطول بعمره توظف في شركه اسمها شركه التصنبع ويستلم راتب 10 الف ريال غير بدلات.

يا شباب 80 بالميه الوظائف كلها وسطات . ولا اجل يجيك البنوك تروح تقدم عندهم يطرودونك من الباب حتى لو معك مجاستير ويجيك واحد شهادته تخصص الرسم من كليه المعلمين ويتوظف عندهم ليه يابن الحلال السالفه اطلعت انه ابوه او عمه عنده مبلغ 9 او 10 مليون ريال على ساس كذا يقدر يوظف اي واحد على اساس افلوسه .


لا احد يخاف ترى دولتكم دوله خير تدرون الاي بيتخرج بعد 4 او 5 سنين ويرجع ايش يحصل بيحصل . بيحصل مشاريع وشركات يبقون وظايف مثل الجبيل الثانيه الجديده طالبين 55 الف وظيفه. لا احد ينسى مدينه الملك عبدالله اقتصاديه طالبين نصف مليون وظيفه واغلب الوظائف بتصير من خريجين الاداره.

السلام عليكم
أخوي فعلا نقطة نحتاج للوقوف عندها
هو التوظيف راح يكون مفتوح على مصراعية من وجهة نظري لأن السعودية أنشأت أكثر من مدينة صناعية وراح يبدأ العمل والتوظيف فيها من 3 سنوات إلى 6 سنوات
والي مايخطط من بدري ماراح تمشي أموره بالنسبة لي أنا والله وبصراحه كنت غافل عن الشي هذا
وجلست يوم كامل أفكر ليش أنا سويت كذا
بس بعدها خططت وحددت لنفسي أهداف أوصلها وبأذن الله وبتوفيقة يقدرني على وصولها
وبعدين حتى لو ماظموني
راح أرجع وأشتغل لو أمسح حمامات وأنتم بكرامه ماراح أحد يثنيني عن طموحي وتخطيطي
والي يبي نصيحه من أخوه تخطيطك أكتبه على ورق لا تخليه مجرد فكرة براسك حتى لو كانت تافهه راح تقلب الأوراق وتلقى أن لها أهميه
شباب أقسم بالله مره كنت أكتب أشياء أحلم أني أحققها
ولما مرة فترة ولقيت أوراقي بالصدفة لقيت أني محقق أحلامي الي كتبتها على أنها كانت صغيرة وبسيطه إلا أن حققتها وأنا ما أدري
لذلك كبرت براسي وخططت ويارب يجيب الي فيه الخير