الحمد لله وصلت مالبورن بعد ما لعنوا جدفي بالمطار

November 6th, 2008, 12:41 PM

السلام عليكم و رحمة الله و بركاته


مساء الخير جميعا



امس عند تمام الساعه 4 الفجر وصلت لمالبورن و المفروض الوصول


وحدة و نص الفجر بس تاخرت ثلاث ساعات


و انا امشي بالمطار و حطيت شنطتي ع الجهاز طلع صوت يعني في شي ممنوع



بشنطتي و سوو لي سالفة و فتشوا الشنطه و طلعوا كل اغراضي




و اخر شي ما طلع معي شي ممنوع طلع المشكه بجهازهم




و قاموا بتاسفون لي و يتفلسفون




المهم الاتفاق ان ينتظرني مندوب من المعهد حقي او العايله بالمطار

و تفاجئت ان مافي لا عايله ولا مندوب و الساعه 4 الفجر و انا لحالي


و قبل لا اكمل بقولكم نقطه . يوم انا اشيل شناطي لقيت حرمه عراقية معها ولدها تبي تشيل الشنطه


و طلعت ثقيله عليها و رحت ساعدتها و شلت اغراضها و رتبتها لها



و راحت



المهم يوم طلعت ولا لقيت احد فكرت اني اخذ تاكسي و المشكله معي 2000 دولار امريكي



ما صرفتها و الصرف مسكر و لقيت لي رجال شكله ملامحه عربية رحت له و سلمت عليه



و قلت الله جابك و قلت السالفة كذا و كذا و كذا قال عطني رقم الطواري حق المعهد



و عطيته و قالوا له خله يروح لعنوان العائله



و قال لي خلني بنتظر زوجتي و ولدي و اوديك لان انا معهدي بالسيتي و هو بيته بالسيتي




و يوم سلم على زوجته طلعت هي الي صلحت لها شنطتها و قالت لزوجها هذا ساعدني و كذا




ثم جاني قال والله لاوصلك لو اخر الدنيا



و وصلني عسى الله يوفقة يا رب


و يوم وصلنا لبيت العايلة



العالم نايمه و اخر الليل قال لي وش نسوي الحين الناس نايمه قلت له




قسم بالله لانزل و اكسر عليهم الباب لين يفتحون . زودوها ما جوني بالمطار


و هينا ما فتحوا



المهم دقيت الباب لين فتحوا و سلمنا عليهم و خليت العراقي يكلمهم بالانجليزي و قال لهم هذا طالب هينا و كذا و كذا



قالوا ايه صح عرفناه و نعتذر عن عدم الاستقبال لضروف المهم قلت قولهم مافي مشكله



و اخيرا دخلت عند العايله و تتكون من ستيف(الاب)وجون(الام)و(تونه و ميفي) البنات الصغنطوطات



و في ثلاث طلاب غيري واحد صيني ( عيونه تقول قدر عزوبيه)

و واحد روسي( راسه تقول جزر واقف)
و واحد اردني(ما يدري وين الله حاطه من يوم جيت مالي 24 ساعه و هو وراي بكل مكان)



فرحان لقى واحد عربي يحسبني بسولف معه اشوا اني بسحب عليه جاي اتعلم ولا اسولف



و اخر شي ملبورن بصراحه مالي 24 ساعه فيها بس والله حلوه و شوارعهم عكس السعوديه



و الدركسون يمين لحسه والله


و بيوتهم من برا تجيب الهم بس من جوا فخامه غير طبيعيه



و انا المعهد حقي اسمه جيوس بـ السيتي


و انا ساكن في السيتي




ملاحظة/انا اليوم طلعت شريحه جوال استراليه اوبتس


فبحط رقمي هينا عشان اي شخص في السيتي يدق علي اتقابل انا وياه و اتشرف بمعرفت



عيال ديرتي او اي خليجي


لان هينا حنا يد وحدة و جايين ناخذ شهاده و نمسك باب استراليا و نرجع



فـ الي بالسيتي او قريب من السيتي يدق علي و اتواصل معه



و اتمنى اتمنى من الادارة ما تحذف الموضوع لان بجد انا محتاج شخص يعاوني بغربتي


و يعطيكم الف عافية و انا عارف ان فلسفتي واجد بس وش اسوي



استحملوني


والله يوفقكم يا رب

• نشر عبر تويتر
• نشر عبر فيسبوك
• نشر عبر جوجل