سؤال مهم جدااااااا لكل من هو متواجد في ألمانيا

على حسب علمي ان الضمان المالي ممكن يكون ورقه انك تدرس على حساب الدوله وايضا راتب الطالب المبتعث .

ترا انا حياتي اغلبها كانت في سويسرا
وكنت بروح المانيا باعتبا انه ساكنين على حدودها
صراحه في فرق بين السويسريين والالمان
الالمان شويه عنصريين
فيهم دم العنصريه وحب التميز
بس خلينا صريحين كل محل في زي كده
واي بلد اجنبي لو رحتيه وانتي محجبه بيكون عليكي النظر اكتر من غيرك
بس مو لدرجه التخوف صراحه
انا افكر اروح المانيا
وادا ربنا اراد بحاول الاقي قبول فيها

مرحبا اختي ايلاف:
انا طالبة مبتعثة في المانيا صار لي سنتين وكم شهر,, وعندي كم معلومه يمكن تنفع!! بس يارب مايكون كلامي محبط..
بالنسبة للعنصرية موجودة,, لكنها مجرد تخوف من العرب والمسلمين.. يعني لو قدرتي توصلين للناس وتفهمينهم احنا ايش بتلقين منهم كل الترحيب.. بس هذا "لو" قدرتي!!
شي ثاني الحجاب: انا رحت اول سنه فترة تعلم اللغه وماكنت متحجبة,, ووقتها كان كل اختلاطنا بطلاب اجانب وكانت من احلى التجارب في حياتي,, ماشفت الا كل احترام وتقدير واهتمام لاني كنت البنت السعودية الوحيدة في المعهد وقتها!!
لكن السنه اللي بعدها وقت الكلية التحضيرية تحجبت,, صح ان اختلاطنا كان بعده بطلاب اجانب لكن لاحظت الفرق بصراحة.. شي ابدا غير مريح!! بدايتها في الصيف لانهم متعودين عالسياح كنت جدا مبسوطه بالوضع,, لكن في وسط الدراسه كان شي ماينطاق!! حسيت اني منبوذة بشكل مقزز,, وكرهت نفسي وكل اللي حولي.. وما ارتحت لحد ما فكيت الحجاب بعد سنه!!
والحين انا في الجامعه,, الوضع احسن بكثير بس يبقى تعصب الالمان وتخوفهم شي نسبي حسب المدينة اللي انتي فيها وكمية الطلاب الاجانب الموجودين.. في مدينتي ولسوء حظي الغالبيه المان وماعندهم اي تقبل للاجانب.. ونفسيا ماني مرتاحه ابدا معاهم وعشان كذا افكر جديا اني اطلع من المانيا!!
لكن ارجع اقول اذا رايحه مع احد او عارفة ان المدينة اللي بتروحينها فيها طلاب عرب او غير المانيين خلي الاحتكاك معاهم قوي والعلاقة بالالمان سطحية وباحترام.. وانشالله ترتاحين!!
هذي خلاصة تجربتي وانشالله ما اكون احبطتك!!

عفوا حبيبتي ماسوينا شي,,امممم شوفي بالنسبه لتجربتي انا اشوف ان احسن المدن كبداية هي المدن الصغيرة.. ماتحسين انج ضايعه في بلد جديدة ووسط ناس ماتعرفينهم.. انا المدينة اللي درست فيها اللغه اسمها قوتينقن,, وهذي اكثر مدينة حبيتها في المانيا,, قعدت فيها 10 شهور لكن خلال السنه والنص اللي بعدها كنت تقريبا اسبوعيا ازورها.. هي مدينه صغيرة وفيها جامعه كبييييرة ومعهد اللغه وفيها اكبر مكتبة جامعيه في اوروبا,, وعلى هالاساس كلها طلاب وطبعا اكثرهم اجانب,, واهل البلد متعودين على وجودهم وهم اطيب ناس تعايشت معاهم بصراحه.. وغير كذا جو المدينه حلو,, كل شي فيها يدل على انها مدينة طلاب.. بصراحه انصح الكل فيها!!
بالنسبه لبرلين هي مدينه رووووعه,, يعني تحسين انها العاصمه بكبرها وهيبتها وجمالها.. لكن الدراسه فيها والله ما ادري.. انا ما افضل الدراسه في مدن كبيرة لانها تضيع. والمواصلات كلها بالاندرقراوند يعني تقعدين في اليوم عالاقل ساعتين تحت الارض عشان تنتقلين من مكان للثاني!! وبعدين ماني متأكدة لهالنقطة بس يقولون في جزء منها كله نازيين وممكن يسببون مضايقات كثيرة!!
برأيي المدن الصغيرة والمتوسطه دائما احلى وجوها انظف,, وانتي توكلي على الله وشوفي ايش اللي ترتاحين له.. واي استفسار ثاني لا تترددين,, مبسوطه اني اساعد

الله يعطيك العافية صراحة معلومات طيبة وشكرا للاهتمام صح انو الجواب مو لي لكن انشالله كلنا نستفيد من بعض .

بالتوفيق للجميع

ايوا تفكيرج صح,, المدن الصغيرة كبداية وبعدين الكبيرة في الجامعه.. بالنسبه لهامبورغ نفس حكاية برلين مدينة كبيرة وحلوة للسفر.. اعرف ان جامعتها قوية لكن ما اعرف احد يدرس فيها!! دريسدن وبريمن من المدن المتوسطه واللي الحياة فيها حلوة,, من السنه الماضيه كان في دفعات درسوا فيها اللغه وعجبتهم كثير,, ودريسدن مع انها في شرق المانيا اللي الكل يتخوف منه لكن واحد من اولاد عماتي درس فيها اللغه والكلية التحضيرية وناوي يكمل فيها الجامعه.. وتقريبا اكثر اللي معاه مبسوطين فيها.. بس نفس الشي ماعندي علم عن جامعاتهم.. انا برايي لا تشيلون هم الجامعه الحين,, ولا تفكرون وين تبون تدرسون الجامعه من الحين لان المشوار قدامكم طويييل!! احنا ما احتجنا نفكر بالجامعه وين ندرسها وبأي تخصص الا بعد ماخلصنا الكلية التحضيريه يعني تقريبا بعد سنه ونص من روحتنا المانيا.. والقبول احنا كنا لازم نجيبه وهذا شي ابدا مو زين!! ياليت من الاول تتكاتفون وتتكلمون كلكم مع بعض وتطلبون منهم يجيبونه لكم.. لان في كل ولاية وكل مدينه وكل جامعه تختلف مسميات التخصصات وطريقة دراستها,, فصعب على الواحد انه يقرر بنفسه! بس بيعطونكم اكيد كتب واوراق تساعدكم في التسجيل فالسالفه مو مرررررررة صعبه!! بس زي ماقلت رحنا بقبول اللغه بس وبعدها جابولنا قبول الكلية التحضيرية على حسب اختيارنا ومستوياتنا وبعدها طبعا الجامعه علينا!
اعتذر ان ماعندي معلومات كافيه عن الجامعات لكن اللي اعرفه شي واحد: الجامعات في المانيا كلها متقاربة في المستويات,, يعني ماحد يقدر يقول هذي الجامعه احسن من هذي عكس امريكا.. فأي جامعه تختارينها وترتاحين فيها وفي المدينه توكلي على الله وفي النهاية لما ترجعين السعودية ماحد بيسأل عن اسم الجامعه.. كل اللي بيهم انج متخرجه من المانيا,, ولا؟؟