هندسة مدني تقدير مقبول و معاه 80 الف ريال ....اين أذهب

وعليكم من السلام ورحمة الله وبركاته
من وجهة نظري اخي أنصحك بألمانيا

انصح حضرتك بالطريق الى معظم الطلبة بيتخذوة ..

1- هتاخد قبول مشروط بدراسة اللغة من جامعة كلاوستال " قبول مشروط يعنى الجامعة بتديلك قبول تروح تدرس عندها لغة المانى وبعدها تدرس التخصص الى انت محتاجة الى هو فى حالتك هندسة" وخد من كلاوستال
قبول علشان امور الفيزا بس لكن لما تروح المانيا مش شرط تدرس فيها لا لغة ولا تخصص ولا اى حاجة روح اى مدينة تانية وادرس فيها براحتك مثلا برلين او درسدن او ميونخ او هانوفر براحتك يعنى "كلاوستال بيجيبوا منها قبول علشان قبولها سهل بس مش اكتر".
2- علشان تروح المانيا بتشترط عليك تفتح "بلوكد اكونت" فى اى بنك المانى اشهرهم "دويتش بنك" بقيمة 8050 يورو تقريبا 80000 جنية مصرى " اتصرف فى الباقى ههههه " متفتحش الحساب ولا تجرى التحويل
الا عن طريق التعامل الرسمى والمباشر مع البنك ولية خطوات معينة لفتح الحساب واستلام ال"IBAN" وتحويل المبلغ .
3- هتاخد قبول الجامعة "الى بيبقى متضمن قبول لغة لانة قبول مشروط" وهتاخد معاة افادة من البنك بأنك فتحت الحساب "وحولت المبلغ" ومعاة صورتين من جواز سفرك "صالح لمدة ست اشهر ع الاقل من تاريخ التقديم" ومعاة ابليكيشن هتنزلة من موقع السفارة وتملاة وتصورة صورتين ومعاة اقرار صحة بيانات هتملاة بردة من موقع السفارة وتصورة ومعاة صور شخصية وسى فى ومتفيشن ليتر وتروح السفارة للمقابلة.
4- مقابلتك فى السفارة بتبقى بناء ع مواعيد واول معاد هتلاقية ممكن يكون بعد شهرين فاعمل حساب النقطة دى واحجز من قبلها بفترة.
5- اول ما توصل المانيا هتروح بالفيزا واوراقك لمكتب شئون الهجرة والاجانب فى البلد الى انت روحتها وتطلع اقامة لمدة سنة هتدرس خلالها اللغة الالمانية وتحصل ع شهادة DSH "مع سندوتش حلاوة هتخلصها فى ست اشهر تقريبا "
6- هتاخد قبول من اى جامعة تعجبك فى اى تخصص يعجبك " لان خلاص بقى معاك لغة" وتبدأ تدرس تخصصك عادى.
7- اى استفسار انا تحت امرك فى الى اعرفة وربنا يوفقك.

الف الف شكر يا parto يعني معنى كلامك اني مش محتاج ielts و كمان بعد اتمام دراستي هل من الممكن العمل هناك و الاقامة الدائمة في المانيا ؟ و هيكون لي الاحقية في ذلك ؟
و شكرا

لا مش هتحتاج ايلتس لانك هتدرس بالالمانى ..
لكن احب اوضح نقطة لو هتسافر من مصر "يعنى مقابلتك هتبقى فى السفارة الالمانية بالقاهرة" من مصر السفارة فى الاغلب هتطلب ان يكون معاك ع الاقل فى الالمانى لحد المستوى B1 .
مستويات الالمانى كالاتى "A1 -A2 - B1 - B2 - C1 - C2 " حيث A1 مستوى مبتدء و C2 محترف .. اما لو حضرتك فى دولة عربية ممكن تطلع من غير لغة خالص وتبدأ فى المانيا من الصفر .
لكن فى نفس الوقت لو انت فى مصر هيبقى سهل انك توصل للمتسوى B1 بسهولة "سواء بالدراسة فى معهد جوتة" او سواء بالدراسة فى البيت لو عندك وقت ممكن تخلصها من 3-4 شهور.

اما بالنسبة لبعد اتمام دراستك نعم يمكنك العمل والاقامة فى المانيا كما يمكنك العمل ايضا اثناء الدراسة اذا اردت .. 20 ساعة عمل فى الاسبوع وهى كافية لتغطية مصايفك الشهرية بنسبة 80% ع الاقل

الف شكرا على مساعدتك يا parto
انا ابتديت اراسل في الجامعات هناك في المانيا خصوصا كلاوستال و انشاء الله خير و يتم القبول و هوافيك بالتطورات و شكرا على مساعدتك

بالنسبو للسفارة الالمانية ب القاهرة عادي لو طلعت من غيير ليفل معين ب الالماني عادي

@Ahmed shawky
اسف بس اعتقد صعب جدا جدا انك تطلع من مصر بدون لغة "يكاد يصل للمستحيل"
لكن فى نفس الوقت لو حضرتك اهتميت بمذاكرة الالمانى بشكل جاد هتوصل للـ B1 فى اربع شهور بالكتير اوى "الى اقصدة متحطش اللغة حاجز خصوصا لو هتقدم ع الفيزا فى القاهرة" لانك مش هتطلع من غيرها
ولا هى "اللغة" الحاجة الصعبة الى توقف مشوارك .. "ان شاء الله ربنا يوفقك ويكرم الجميع بتحقيق اهدافة

ازيك يا بارتو انا مقدم عادي علي برامج ب اللغة الانجليزية فقط و متطلبات السفارة فقط من ناحية اوراق الدراسة هي ورقة القبول اما للحصول علي الموافقة من الجامعة فدا بيختلف اما كان انجليزي يبقي يا تويفل ام ايلتس او الماني فلازم توصل ل ل b1
تقبل مروري

أستاذ احمد شوقى ..

انا كان ردى ع الخروج من مصر بدون اى ليفل بالالمانى فى حالة الدراسة بالالمانى وهى الحالة الاكثر شيوعا .. "اللغة الانجليزية تكاد تكون مش موجودة غير فى برامج الماستر .. مفيش بكالوريوس انجليزى "
طبعا زى ما حضرتك تكرمت فى حالة الدراسة انجلش بس ممكن تطلع دون الحاجة للالمانى .. بالتوفيق ان شاء الله