كامبريدج أو أكسفورد؟

أختي الغالية...

السلام عليكم ورحمة الله وبركاته

أكسفورد ممتازه جداً إذا أخذنا بالإعتبار أن المدينتين على مستوى واحد في الغلاء المعيشي...ولكن هذا مو يعني أنه مو ممكن العيش فيها....ولكن قصدي أنه صعب التوفير للي حاب يوفر..طيب!

أكسفورد أهدأ وأطيب ناس وفيها طلاب من جميع أنحاء العالم وخاصة الأوربيين..

ولكن المشكله عندك في المعهد....يعني كابلن أسبكت....ماعندك أحد...وعشان كذا لازم تشوفين لك مكان أحسن تتعلمين فيه اللغة...مثل King's School Oxford أو Oxford international School أو Embassy CES

ومع هذا ما أنسى أعطيك خبر ممكن يناسبك...

فيه مدينة صغيرة اسمها Norwich فيها أحد الأخوان الطيبين كان عندنا في أكسفورد ونقل هالمدينة...

والحقيقه ان الرجل حمسني جدا على أني أنقل هناك...

بعض من كلامه يقول: أن المدينة هذي أهلها ناس طيبين جداً ويراعون عاداتنا بشكل مو طبيعي...

تعاقد الطلاب المتزوجين مع أحد شركات الباص على أن يأخذوا زوجاتهم ويمشوهم في المدينه أتوقع بشكل أسبوعي أو حسب الطلب...الحقيقه ماأعرف عن الفترات اللي يستأجرون الباص فيها....ولكن راح اتصل عليه ان شاء الله وأرجع لك في رد ثاني بالخبر....
ولكن الموهيم في الموضوع....أنو السواق حق البنات وحده بريطانيه....يعني سواقه مو سواق...
والبنات مآخذات راحتهم...وين مايبغوا يروحوا...يروحوا..
هذا غير الأنشطة النسائية الكثيرة
والمجتمع هناك...خاصه السعودي....متعاونين بشكل طيب جداً

يعني البنات فالينها على الآخر...والله يهنيهم..

والحقيقه اني جالس أرتب للنقل هناك إذا الله يسر أمري...

على العموم...راح أأكد على كلامي هذا بعد ماأتصل على الطيب اللي علمني...ممكن تقولي ليه ماتصل الآن وبلغني قبل مايكتب الرد...
والحقيقه اني في السعوديه الآن....وأنتظر لما يخلص الرجل دوامه وأتصل عليه ...يعني في الليل..

الله يحفظك ويوفقك في دينك ودنياك..

لا انصح بكنج سكول لان ادارته عنصرية بالاضافة لعدم وجود منهج متبع كل مدرس يشرح اللي يعجبه والتغير المربك والمستمر للمدرسين

اما ايمبسي يعاب عليه جمع الطلاب في صالات

اكسفورد انترناشونال اسمع بعض المدح عنه

من واقع تجربة في اكثر من معهد انصحك بمعهد امبيسي في اكسفورد والقبول عندهم سهل

اختي اولا لابد تقدرين مستوى اللغة عندك.. اذا مستوى اللغة عندك ضعيف فاي معهد راح يكون مفيد اما اذا مستوى اللغة جيد يعني عندك مبادئ المحادثة والكتابة والاستماع فنصيحة اخوية شوفي لك معهد جامعي وحاولي تبدأين باللغة الاكاديمية لانها اهم شيء تحتاجينه في تحصيل الايلس وقبول الجامعة واللي هو من شروط استمرار البعثة .. اللغة العامة راح تجي مع الممارسة اليومية ومع زملائك بالفصل اللي تقدرين تسألينهم وتستفسرين منهم..

يبقى اختيار المدينة.. بالنسبة لي انا درست في كامبردج وفي معهد كابلن اسبكت شهر واحد.. المعهد جيد.. ما فيه مقررات كله تصوير اوراق لكن مفيد..

فيه مشكلتين.. الاولى الطلبة السعوديين كثير يعني اكثر من 50 بالمية سعوديين فضلا عن بقية العرب وعلى خبري فيه بالصيف ما فيه ولا طالبة سعودية..

معهد السيلي ببرمنقهام من افضل المعاهد في بريطانيا لكن مشكلة المعاهد القوية تطلب مستوى لغة متوسط يعني 3 بالايلس

بالتوفيق