الهجوم على الجامعات .. (طريقتي للحصول على قبول)

May 13th, 2010, 11:08 PM

مكرٍ مفرٍ مقبلٍ مدبر ٍ معاً ... كجلمود صخر حطه السيل من علي

وش دخل امرو القيس مدري عنتر هنا !

هذا البيت من الشعر فيه حكمه تحصل من خلالها على قبول من الجامعات البريطانيه .... (الله يعوض اهلك بس خخخخخخ

طيب شوفوا ما طول عليكم

هذي طريقة بديت فيها لي اسبوعين وان شاء الله تنفع وممكن بعضكم سواها قبلي بس حبيت اقولها ..

الخطة : الهجوم على الجامعات البريطانية

الهدف : قبول غير مشروط او مشروط

مكان المعركة : الانترنت و الاتصالات

الاسلحة : شهاداتي وستيتمنت متعوب عليه ومرتب واخر اختبار ايلس


اللحين الطريقة :

اول شي انا واضع طريقتين في حال ان شاء الله تضبط احد الطريقتين .

الاولى بالنت عبر التسجيل الاون لاين او apply online من موقع الجامعه

الثانية بارسال اوراقي الى ايميل احد الناس اللي يجيبون قبولات

في الطريقة الاولى امشيها على الخطوات التاليه :

1 - اروح لموقع الوزارة وادخل قسم الجامعات الموصى بها وادخل التخصص اللي ابغاها والدولة واشوف الجامعات المعتمدة في هذا التخصص وغالبا تكون كثيرة بس انا افرزها على حسب المناطق اللي حاب ادرس فيها يعني فيه جامعات في اسكتلندا استبعدتها لاني ماودي ابعد كثير عن لندن وفيه مدن اخرى مادخلت مزاجي استبعدتها المهم طلع عندي حوالي 10 الى 15 جامعه كتبتها في قائمة عندي على اساس انها الجامعات المستهدفه من الهجوم اللي ابي اشنه عليهم ... ويا يجيبون لي قبول او اقل شي يحفظون اسمي واشتهر عند موظفينهم


2 - اسوي scan لشهاداتي وارفعها وارسلها الى ايميلي واخليها مخزنه بالايميل .. كل اوراقي الشهادة والكومديشن والستيتمنت والايلس والجواز حتى شهادة الابتدائية ... خخخخخخخ اما عاد
وهذا عشان وين ماروح معي لو بغرفة الكمبيوتر بالمعهد او كمبيوترات مكتبة الجامعه ومعي عفشي انزل من ايميلي وارفع لموقع الجامعه علي طول

3 ابدأ بقائمة الجامعات اللي ودي بقبول منها واستلمها وحدة وحدة وادخل موقع اول جامعه
واسوي apply online واسجل واذا انهيت التسجيل اسوي نسخ ولصق للستيتمنت وupload للشهادة واوراقي المطلوبة

وكل يومين اقدم على جامعه او كل ثلاث ايام اذا خلصت تقديم على جامعه استلمت اللي بعدها واغلبهم اذا سويت submit للطلب يرسلون لي بالايميل ان الرد بعد 20 يوم عمل وبعضهم مايحدد
بالنسبة للايلس حاليا ادرس كورس وعندي اختبار بعد شهر وكل ماقدمت على جامعه اعطيهم اخر اختبار ودرجته ماهي المطلوبة بس اسم اني اختبرت ايلس

وهذا توي ماخلصت القائمة كلها بس ان شاء الله لاامر عليهم كلهم وبصراحه اعجبتني هالطريقه وشكلي بصير مدمن عليها يمكن احصل قبولي اللي ابيه واقدم على الجامعات بس استهبال خخخخ


الطريقه الثانيه وهي اسهل بكثير كل اللي سويته اني ارسلت اوراقي لبعض الناس اللي يجيبون قبولات للطلاب بس مشكلتهم انهم مايخلونك تختار الجامعه اللي ترغبها يعني كذا مرة اذا كلمت احد منهم يقول انه يجيب قبول من الجامعه الفلانيه او العلانيه وبس هذا حده يعني تبغى والا لا تتشرط .. مرة ضحكت من واحد يقول تخصصك هذا احسن شي في جامعة كذا يسويلهم دعايه قلت طيب وش غير وقام يكذب لو اني توي جديد كان الان مسجل بالجامعه المخيسه اللي يسوي لها دعايه


وهذي شغلتي هاليومين تقديم على الجامعات ومذاكرة ايلس


ودعواتكم لجميع المبتعثين والمبتعثات بالتوفيق






*

• نشر عبر تويتر
• نشر عبر فيسبوك
• نشر عبر جوجل