استفسار عن جآمعة Blake College .!

مساالخير اختي نؤطه
Blake College تقع في لندن وهذي الكليه متخصصه فقط في التصميم والفنون الجميله والديكور والازياء والتصوير
طبعا هي كليه صغيره عباره عن 3 طوابق في مبنى في وسط لدن. انا ماني متاكد بصراحه هل هي معترفه من الملحقيه ام لا
لكن حطي في بالك اختي العزيزه انه حتى لوكنتي تدرسين على حسابك في جامعه غير معترفه ماراح تصادق على شهادتك وزارة التعليم العالي لما ترجعين السعوديه وهذا الشي بحد ذاته راح يخليك تحسين بالاحراج من الناس وبالتحطيم لانه اي واحد او اي مكان عمل راح يتساالون ويقولون اكيد انها شاريه الشهاده والا كان صادقتها واعترفت فيها الوزارة وانتي لك حرية الاختيار طبعا لكن اتمنى تفكرين في النقطه هذي..
بالنسبه لدراسة اللغة فانا اشوف اذا لغتك كويسه و وصلتي مثلا الى مستوى ابر انترميدييت فراح تكفيك دراسة 6 شهور قبل دخول الجامعه
باذن الله.. انصحك برضو انك تختبرين الايلس لانه مهم جدا وراح تطلبه منك الجامعات عند التسجيل..
نظام دراسة الباكالوريوس في الجامعات البريطانيه عباره عن 4 سنوات والسنه الاولى سنه تحضيريه عامه وبعدها 3 سنوات في التخصص المحدد.. للمعلوميه لو حصلتي الان على درجه 6 في الايلس بعض الجامعات تعفيك من السنه التحضيريه وتبدين من السنه
الاولى اللي بعد السنه التحضيريه اذا كنتي تبين تختصرين الوقت شوي.. دراسه المواد في الجامعات البريطانيه تعتمد في الاساس على كتابة البحوث والمقالات والمشاريع الكتابيه البحثيه ومايركزون كثير على الاختبارات النهائيه وغالبا الاختبارات النهائيه مايكون عليها درجات كثيره مثل البحث .. برضو يركزون على الجانب العملي والتطبيقي مثل الدراسات الميدانيه و ورش العمل والمؤتمرات وحلقات النقاش اللي يسوونها للطلاب في الجامعه و في احيان كثيره الطالب لازم يسوي درس ويلقيه امام الطلاب في القاعه ويستخدم الباوربوينت وغيره من الوسائل المساعده لتوضيح وتوصيل الافكار بشكل مناسب وهذا العمل يسمونه ( presentation ) ..
اخيرا يا اختي نؤطه يوجد الكثير في بريطانيا من الجامعات المتميزه في تخصص التصوير والتصميم والجرافيك و وفي مدن مختلفه
و افضل بكثير من الكليه اللي ذكرتيها واكثر جديه واهتماما في الجوانب الاكاديميه واذا بغيتي اي مساعده في البحث عن جامعه ثانيه
انا حاضر.. فقط حبيت اذكرك ان الكليه اللي ذكرتيها تقع في اغلى مكان في لندن والله يكون في عون اللي بيدرس او بيسكن هناك
لذلك فكري زين في النقطه هذي واتمنى لك التوفيق وحاضر لاي اي استفسار

مرحبا اختي نؤطه ولا شكر على واجب
بالنسبة للجامعات فمعظمها عندهم التخصص اللي تبينه ولاتشيلين هم النقطه ذي..
فقط ابي منك تحددين لي مواصفات المدينه اللي تبغينها ومكانها عشان اختارلك جامعه فيها ..
بالنسبة لدراسة الدبلوم اذا كنتي ماتبين الباكالوريوس اجل ادرسي فقط السنه التحضيريه واذا عديتيها بنجاح في جميع
المواد تعتبر شهادة دبلوم معترف بها من قبل وزارة التعليم العالي..
اتمنى لك التوفيق وحاضر لاي استفسار

مرحبا نؤطه
خلاص ابشري ولايهمك راح اشوفلك جامعه مناسبه لتخصصك ان شاالله
وباختارلك مدينه حلوه واسعار المعيشه فيها معقوله..
اتمنى لك التوفيق

مساالخير نؤطه
انا لقيتلك كورسات في التصوير في جامعة برايتون في مدينة برايتون والجامعه كويسه ومرنه مع الطلاب
والمدينه روعه جدا وعلى البحر وامنه وملينانه طلاب..
ابي منك الان تعلميني كم مدة الكورس اللي تين تدرسينه و وش الشهادة اللي تبين تحصلين عليها
هل هي دبلوم؟ وللمعلوميه فيه دبلومات مدتها سنه وفيه دبلومات مدتها سنتين.. ياليت تحدديلي بالظبط..
الشي الثاني بالنسبة لدراسة اللغة هل راح تدرسين لغه وكم المده اللي تبين تدرسينها؟
ياليت توضحين لي المعلومات هذي ؟
بالتوفيق نؤطه