ماذا تنصحوني بالسكن ؟؟

نصيحة من القلب للقلب

انك تسكني في شقة لحالك ؟
لتجنب بعض الاشكاليات وخاصة بانك جديدة
بس لاكن لو تعرفي احد توثقي فيه جرب سكن في سكن الجامعة نفسها في لندن او سكن في عائلة معينة وينصحك انك تسكني فيها ,,, ممكن اقولك اسكني في هذه العائلة المعينة ,,,
لاكن اذا انت جاية زي ما يقول بالعامية " جاية على وجهك " يعني ما تعرفي شي جديدة ,,,, اسكني سكن خاص

يا لزندقية


شاكرة لج من الاعماااااااق والله .. عطيتين تفاصيل ما اعرفها

بالنسبة لاشعة الصدر سالت قالوا ما يطلبون؟؟ او بالاصح ما طلبوا من الطلاب الي راحوا قبل .... فهل ضروري اسويه او احتمال

لغوه ؟

المعلومات الثانية جدا مهمة راح اكتبها ... عشان اعرف وين خطواتي هناك

شاكرة مرة ثانية


و على اللغة انا خريجة لغة انجليزية فما عندي صعوبات من هالناحية

كل الشكر واثق الخطوة ع النصح .. و الارشاد ...

الاشعه والله الافضل تاخذينها + خطاب خلو من الدرن = وخليها مع الاوراق واذا طلبها مكتب الـهيلث كنترول تكون جاهره معك ولا تاخذين انتظار ساعتين حتى يتم الكشف عليك وهي على العموم تكون معك للاحتياط

اذا عديتي اول مره بفيزة الطالب من الجوازات فخلاص الزيارات الاخرى ما تطالبين فيها إلا اذا انتقلتي لمرحلة اخرى مثال = من ماستر الى دكتره

نصيحتي لك ادخلي على الموقع اللي حطته لك فوق وشيك على السكن المناسب لك, وحتى تقدر تأخذ لك موعد معهم ويمكن تلاقين شئ مناسب الان وتحجزينه ( الافضل تشوفين سكن مؤثث وجاهز )

كمان خل معك 15 صورة ملونه مقاس 4 × 6 = البوليس راح ياخذ حوالي 4 او 5 صور لك, الجامعة يمكن 3 صور الملحقيه مدري عندكم كم بياخذ صورة

باقي الكماليات مثل الجوال و الانترنت

الجوال خذي لك فره في الستي سنتر ولو حصل شوفي شركة فيرجن اذكر اخذت منهم عرض في شهر 2 الماضي وهو عباره عن 700 دقيقه مجانيه على جميع الشركات + 3500 رساله نصيه مجانيه +انترنت مجاناً = بقيمة 20 او 25 باوند شهرياً والله ناسي لان اخوي هو اللي جاب لي الشريحه

وDSL انصحك بـشركة TALKTALK او انت شوف عروض الشركات ولا تنسى تسألهم لو الغيت الخط قبل نهاية العقد كم الغرامه اللي راح تدفعها ( شركة TALK اذكر كانت اقلها واظن كان 70 باوند )

قبل ما اختم ردي بعض مكاتب العقار راح تطلب منك مبلغ 200 باوند تزيد او تنقص وهو قيمة الابلكيشن تبع السكن واعتقد افضل المكاتب هي هارت Haart الاسم قريب منه

نقطه مهمه : في حال انك حصلتي سكن مناسب لك واكيد انتي راح تقعدين مدة طويله فانصحك بالتالي:

زي ما احنا عارفين ونسمع بان الضريبه راح تزاد الى 17 او 20 % في القريب, وراح يأثر على اسعار العقار وسوف تزيد فخليكي مفتحه

1- اقري العقد زين قبل التوقيع, ممكن يكتب من ضمن البنود في حال ارتفاع الضريبه فإن الايجار يرتفع عليك, وش تسوين في هذه الحاله يبغالك تخلين المكتب يوثق العقد التالي: وتقولين لهم انا راح استأجر عقد طويل المدى وتحددين المده على حسب مدة دراستك وابغاكم تكتبون بالعقد ان السعر هو ( مثلا 500 باوند الى نهاية العقد بدون اي زيادة ) وبكذا راح تضمنين نفسك من الـنــصــب والزيادة, وخذي صورة من العقد بعد ذلك.

قبل ما تسكنين سجلي قراءة العداد تبع الكهرب عشان اذا جتك اول فاتورة ما تتورطين فيها وتسددين استهلاك المستأجر اللي كان قبلك وكذلك سجلي تاريخ اليوم اللي سكنتي فيه حتى تقدرين تعرفين الاستهلاك تبعك كم هو لو كان هناك مستأجر سابق

وكذلك يمكن تجيك شركة تحاول تضحك عليك وتعطيك عروض تأمين على مستلزمات البيت فاسحب عليهم سيفون.

وكذلك انتبهي لو شريتي تلفزيون فيبغالك تشترين ترخيص لشغيله وقيمته 120 باوند في السنه ( طبعا لمن تشترين التلفاز راح تكتبين عنوانك وتفاصيلك غصب من البائع تبع التلفاز وهو بطبيعة الحال بيرسل بياناتك الى مصلحة الضرائب عشان يطبون عليك فجأة لتحقق من شراء رخصة التلفاز ( اسألي عن كيفية الحصول على الترخيص من المحل.

والله ما ادري ان كنت اعطيتك فكره عامه او لا, فعموما ما سبق ذكره كانت بعضها عباره عن تجارب سيئه مريت فيها ولا حبيت اخوض في تفاصيلها اكثر واردت ان انقلها لكم لعل وعسى حد يستفيد منها, ويدعو لي بظهر الغيب بان اطلع بعثه على حساب الدوله او حتى على حساب برويز مشرف رئيس مصر خخخخخاااااايييي

تذكرت شئ مهم, اياك ثم اياك ثم اياك ( 3 اياكات تأكيديه ) تسوي مثلي اذا جاك احد يشحد منك ويقول انه اخوك في الاسلام وهم الهنود بكثره فاسحب عليه ولا تعطيه اي شئ, ممكن تعطيه من هنا وشوي تدخل في شارع فرعي وبعدها يجيك ما جاء لأحد اصحابنا

إلا سؤال يا بنت قطر ما ادري الجامعات القطريه هل فيها انتساب للخلايجه يعني هل بالامكان احصل لي مؤطئ قدم عندكم؟ علما بان شهادتي الثانويه لها اكثر من 10 سنوات والجامعات اللي هنا كرشتني والبعثه ولا جتني ورجعت حافي القدمين إلا اللهم من التجارب اللي فوق هي اللي طلعت فيها بفايده