استفسار كيف استخدام موقع rightmove ??

الموقع دا هوا عبارة عن تجميع لمكاتب العقارات وهوا مجرد وسيط يوصلك لمكتب العقار
مثلو مثل zoopla وكم موقع تتبع نفس الأسلوب

مفيد جدا إنك تاخذ فكرة عامة عن الأسعار للمنطقة اللي تبغيها وكمان بعض العقارات عليها صور فمرة كويس
فيه خصائص بحث حلوة للعقارت ولمكاتب العقارات ويبنها علخريطة إن حبيتي كمان

وكل مكتب عقار له زي بروفايل خاص بيه في الموقع ورقم هاتف
طبعا أرقام الهواتف اللي بالموقع تكلفك لأنها زي وسيط توصلك للمكتب فيعني تتصل على المكتب لكن عن طريق الموقع ويحسب عليك مكالمة كأنك متصل على أرقام 084 والأرقام دي اللي لها تعريفة خاصة
ولتجنب المصاريف الزيادة في المكالمات خذ إسم مكتب العقار ودور عليه في جوجل ويطلعلك الموقع حقهم وبأرقام هواتفهم الأرضية المباشرة اللي تقدري تتصلي عليها بتعريفات منخفضة لحد واحد بنس للدقيقة زي ما هوا في شرايح شركة لايكا موبايل أو أو تكوني مشتركة في باقات للخطوط الأرضيه عند باقي شركات الإتصالات وتطلعلك المكالمات الأرضية مجانية ^^

الخاصية المميزة فيه هيا إنك تقدر تراسل كل مكاتب العقار في المدينة اللي تبغاها بإيميل واحد تكتبو وتحط فيه كل اللي تبغاه من مواصفات وشروط تبغاها وكدا في الموقع والمكاتب ترد عليك على إيميلك الخاص

عيبو إنو في المواسم مكاتب العقار ما تحدث المعلومات بسرعة مثل هل الشقة موجودة أو أحد أخذها وزي كدا


ويفضل إنك في الشقق ما تستعجلي أبدا وتعاينيها بنفسك أفضل شئ فلو إنك قادمة جديد للمدينة فمافي مانع تسكني أول أسبوع أو أسبوعين في فندق لين تلاقي مكان مناسب أو حتى مع عيلة بشكل مؤقت بس

وبالتوفيق أختي وأي إستفسار أنا في الخدمة ^^

اهم شيء تاخذين شقة تكون قريب من المنطقة اللي تبغين ...

ولاتدفعين شيء لين تشوفينها بنفسك .

فيه خاصية ترسمين المنطقة اللي تبغينها ويطلع لك كل الخيارات الموجودة في هذه المنطقة .

حلوو جدا ..

مشكووور يا أخ Ayu ماقصرت ابدا شرح كافي ووافي ونبهتني على نقاط مهمه

مشكور يا أخ د/ عادل ردك كان مفيد جدا

الله يجزاكم خيررر