لكل من يفكر يروح بعثة إلى بريطانيا

بسم الله الرحمن الرحيم
السلام عليكم ورحمة الله وبركاته
اخواني واخواتي المبتعثين في بريطانيا اكتب لكم وانا كلي قهر ومعاناة ابغى اكلمكم عن المكافآت اللي نستلمها كل شهر الـ853 باوند شهرياَ!!
اسألكم بالله هل هي كافية؟؟
هل تكفي مصروف سكن واكل وشرب وفواتير وكتب ومواصلات وملابس؟؟هل تكفي؟؟
لا والله لاتكفي الشباب هنا انواع المعاناة والله, خلنا نحسبها مع بعض ونوضح للوزارة كيف احنا نعاني
انا بالنسبة لي والشباب اللي معي حنا عايشين وندرس في لندن
نبدأ بسم الله بالنسبة للسكن, اولاَ السكن اقل شي بتلقاه 400 باوند في الشهر وفي غرفة 3 متر في 1 متر ونص مع دورة مياه (الله يكرمكم) مشتركه ومطبخ مشترك هذا اذا تبي سكن الجامعة او سكن طلاب اما بالنسبة للشقق اقل شي 600 باوند في الشهر تدفعها وتكون مشارك الشقه مع واحد غير الفواتير اللي تجي على راسك وغير الديبوزيت اللي هوا التأمين ويكون تقريبا 600 باوند من وين نجيبها ال600باوند هذي!!, يعني حنا طلاب سعوديين ونفتخر اننا سعوديين وحنا نمثل السعودية في بريطانيا ورافعين راية المجد والاسلام وساكنين في اردى واوصخ وارخص الأماكن والله حرام
ثاني شي الأكل والشرب سواء من داخل البيت او من خارج البيت في 3 وجبات في اليوم فطور وغداء وعشاء والوجبة المشبعة الكافية بسعرها المعتاد 5 باوند اقل شي يعني هذي 15 باوند يوميا اقل شي مع الشرب
الفواتير وياويلي على الفواتير انا عن نفسي وعن شلة الشباب اللي اعرفهم هنا اللي هم اكثر من 30 واحد اكثرهم ساكنين في شقق عندنا فاتور ماء تجينا كل شهر 15 او 20 باوند وعندنا فاتورة كهرباء تجينا كل ثلاث شهور 130 باوند وعندنا فاتورة انترنت وتلفون ثابت جاتنا اول 3 شهور 145 باوند وشهريا 20 باوند وعندنا فواتير الجوال او رصيد الجوال بالنسبة لفواتير ورصيد الجوال اقل شي تكلفك 50 باوند في الشهر مع بطائق الإتصال بالسعودية اقل شي هذا اذا ماكانت اكثر
مصاريف الكتب طول السنة الدراسية راح تحتاج انك تشتري اقل شي 3 كتب اقل شي والكتاب سعره من 35 الى 45 باوند تقريبا يعني هذي 120 باوند مصاريف كتب غير مصاريف الطباعة وادوات الدراسة واحتياجاتها
مصروف المواصلات اقل شي من 40-50 باوند شهريا
الملابس الملابس مالها مصروف عندنا لأنه لايوجد مافي فلوس نشتري ملابس اصلا مابقت فلوس ملابسنا نشتريها من سنه الى سنه ويمكن اكثر
هذي كانت المصاريف الأساسية ومجموعها مايقارب الــ 1000 باوند يعني المصاريف الأساسية تعدت المكافأة اللي هيا 853 باوند فكيف نصرف مصاريفنا الاعتيادية!!! لا وهذي 1000 باوند مع التوفير والاقتصاد يعني منت عايش مرفه يعني هذا اقل شي يصرفه طالب!!
طيب احنا طلاب وشباب مانحتاج بريك او وقت راحه وقت لقلوبنا وقت نطلع نتمشى نغيــــــــــــر جــــــــــو نروح سينما نروح كافيه نجلس نسافر مدن قريبة مننا نروح متاحف مثلا المهم طلعات الشباب هذي مالها مصرووووووووووووووف؟؟؟ والملابس مالها مصرووووووف؟؟؟
ياناس اخر اسبوع ولا اخر اسبوعين في الشهر اقسم بالله مانلقى ناكل والله مانلقى ناكل معقووول!!؟ والله حالتنا صعبة لا ولو تجي تقارنا بأي بعثة اخرى من بعثات الدول الأخرى مثل الكويت راتبهم 1500 باوند والإمارات راتبهم 1500 باوند وقطر راتبهم 1200 باوند غير السكن سوريا اللي هيا سوريا راتبهم 1000 باوند غير السكن وغيرو وغيرو وليبيا ومصر والبحرين وبعثة ارامكو وسابك بعد 1500 باوند هذا الحد المعقول تقدر تعيش ب1500 باوند معزز مكرم
ياناس والله تعبنا انواع الديون اللي علينا وحنا طلاب حنا جايين ندرس هنا ولا نشيل هموم و ندور على لقمة عيشنا والله الحالة جدا صعبة نطلب الغوث والله
الحمدلله على النعمة اولا واخير طبعا احنا موب طمعانين والله مو طمع احنا نطلب شي يكفينا وبس حتى حياتنا الترفيهية مانبيها نبي نعيش وندرس براحتنا بس
والله تجينا ايام في اخر الشهر ناكل عيش ساده او ناكل كورن فليكس ولا هل الاندومي اللي مخزنينها من السعودية ويوم الجمعة مانصدق نرووح على السفارة نصلي وبعدها ناكل اكل مضبوط
بالله ترضون ان يكون وضع طلاب سعوديين كذا!!
انا اكلم اخوياي بأمريكا وماليزيا سعوديين يقولولي الراتب يكفينا ونجمع منه بعد وحنا مبسوطين وعايشين بعز طيب ليش احنا طلاب بريطانيا مظلومين كذا والله البلد غالية لو اقدر احول بعثتي لأي مكان كان حولتها من اليوم مو بكرة ارجو انكم توصلو اصواتنا للمسؤولين والله يعطيكم العافية
المهم انا آسف اني طولت عليكم كدرت مزاجكم بس والله انا آسف حبيت انكم تشوفو حالة ابنائكم السعوديين في بريطانيا بس, والله يرزق الجميع
اسأل الله لكم ولي التوفيق والسلام عليكم ورحمة الله وبركاته


منقول