استفسار شنو افضل معهد لغة في برايتون brighton

من العايدين الفايزين ..

الله يوفقنا وياك يارب يا كريم ..

وان شالله يكون اختيارنا الاختيار المنااااسب ..

الصراحه انا احس بقلق من ناحية السكن والعايله .. عشان كذا طلبتها موقت لمدة اسبوعين لو حبيناهم وحبونا كملنا معهم ماحبيناهم راح ندور لنا شقه ..

العايله اطلب المعهد يوفرها لك وخلها مده قصيره جازلك كان بها مدد ماجاز لك اطلع ..

بصراحة حلو القى احد بنفس المكان اعرف منه معلومات اكثر عن الاشياء الصح اللي ممكن نسويها .. لان كل واحد يبحث من جهه وكل واحد يجي فباله اشياء ماتخطر عالشخص الثاني

بس ليه ابتعدت عن مانشستر مع ان الجامعه قويه ؟

انا افكر اقدم على ساسكس عشان كذا رجحت كفة برايتون عن اكسفورد ..

يارب انك توفقنا اجمعين .. وتيسر بعثتك يارب

فكرة روعة اسبوعين تجربة... ما شاء الله عليج جبتيها. لأن والله صعبة 7 شهور مع عايلة ممكن تنقص عليج حياتج
انا بطبقها وبدعيلج :
بس شوفي اشرطي عليهم من الآن طبيعة الغرفة وخدماتها. حسب رغبتج من غرفة خاصة مع حمامها الخاصة من تنظيفهم ومن غسيل الملابس وكي ومن خدمة نت ومن وجبات وان تكون العائلة بريطانية مو هنود او عرب يحملون الجنسية البريطانية علشان تستفيدين من الأكسنت

ومن ناحية الشقة .. شفتي اسعار الشقق؟
السكن في برايتون اغلى من مانشستر بكثير. وهذا احد عيوبها الشرعية
يمدحون موقع rightmove اذا تحبين تأخذين فكرة.

انتي معج حق كثير بأختيار برايتون على اوكسفورد الجامعتين الـ Rank مالهم عالي بس منطقة اكسفورد مملة حيل وبرايتون افضل بكثير
اخياراتج من وجهة نظري ذكية فالله يوفقج

اما بالنسبة لتفضيلي لبرايتون على مانشستر هو قربها من لندن 70كم يعني بالويك اند ممكن الواحد يقضيه في لندن او باريس، ووقوعها على البحر حق الأكل البحري . ونسبياً ادفى، لكن يعيبها تقلب جوها في اليوم الواحد فهالله هالله بحبوب Echinacea لتقوية المناعة. وكذلك كل من سألت من طلاب بريطانيا يقولون لي اللغة في برايتون ومانشستر مو منطقة لغة! وبالفعل معاهد برايتون اكثر والاختيارات متنوعة عكس مانشستر. وغير ذلك معهد جامعة مانشستر ما يعطي دورات مكثفة ولا يعطي one by one وانا عندي بس ثلاث اشهر باستفيد منها قدر المستطاع.
وانا دورتي هذه على حسابي الخاصة لثلاث اشهر كتجربة قبل البعثة اللي موعود فيها على خطة 2012 والهدف منها تقوية اللغة بالدرجة الأولى والمقارنة بين مناطق بريطانيا من خلال نصائح الطلاب والاستفادة من خبرتهم بجامعات بريطانيا وبعدها اخذ قبول لتقديمه للبعثة علشان ابدأ بأذن الله صح. فمانشستر راح تبقى بالقائمة الى أن تتضح الرؤيا اكثر.

والله يجزاج خير على المعلومات القيمة وعلى الدعاء لنا بهذه الايام الفضيلة.
والله يوفقج بحياتج العلمية والعملية

حياك ابو حمد ..

ايه اشترطت عليهم غرفه بحمام خاص مع النت و وجبتان وان تكون قريب من محطة باصات لا تنسى هالنقطه ,, لانك ماتضمن العايله تكون قريبه من المعهد او لا !

ما اخفي عليك بصراحه مددت الطلب اليوم من اسبوعين لشهر ,, خفت نطول مانلاقي سكن لان مريت ع اسعار الشقق لقيتها نار .. فأكيد يبي لنا وقت نبحث عن الانسب ..

تبي الجد انا للان محتارة بين ستفورد هاوس بكنت وبين امبسي ببرايتون !! من فتره حسمت الموقف .. لكن الحين اقول بنفسي ( اخاف اتحسف ) !

مع ان سمعة امبسي و تأييد الكل له شي طيب ولصالح اختياري ,, لكن بعد احس بخوف .. كلمت المكتب اليوم وطلبت منهم يروحون يشوفون بنفسهم كيف كل شي ويطمنوني ..

واي خبر يجيني راح اخبرك عنه ..

الله يعين ع الجو امطرت يومين عندنا ومرضنا كيف هناك .. الصراحه يبي لنا حليب زنجبيل و درابيل ههههههه جيب كميه معك وبيعها علينا .. كيف جو المدينه عموما ايام الشتاء والصيف ؟ عشان احط فبالي نوع الملابس اللي اخذها

بصراحه اسبابك مقنعه وفعلا حتى انا قالوا لي فصاحة اللغه دوري عليها باقصى الجنوب وبعدها روحي وين ما تبين .. بس لو ارتحت راح ابقى ببرايتون وادرس الماستر فيها ..

دامك على حسابك هذا المعهد كم بيكلفك بالشهر ؟؟ واي دورة سجلت ؟؟

بالنسبه للسكن انا بحثت هنا : Property and Homes Search by Nestoria وعنوان معهدنا هذا Brighton BN1 4LF دخله ويطلع لك الاماكن القريبه على حسب نطاق بحثك

بس موقعك مانفع معه هذا العنوان .. اعتقد يحتاج العنوان كتابه للمعهد .. انت وش كتبت .. ؟

معلومات عن المدينة قريتها من احد المواضيع المثبته وحبيت انقلها لك للاطلاع















المصدر: http://www.mbt3th.us/vb/forum66/thre...#ixzz1d4Lzq6zF

الله يحيج ويبجيج
انا مرتب اموري مع مكتب في برايتون واليوم كلمته وقال انه أكد على المعهد طلباتي. ومنها قرب العائلة من المعهد.
برايتون فيها ندرة شقق مقارنة مع مدن ثانية. واكثر الطلاب العرب يسكنون في منطقة هوف لكنها نسبياً بعيدة. انا افضل السكن قرب المعهد. وامبيسي قريب من برايتون ستيشن واعتقد ان فيه الخدمات اللي نحتاجها مثل مطاعم وخلافه.
لقيت شقة بغرفة سعرها بحدود 800 باوند شهرياً قريبة من المعهد وهذه خريطة توضح الشقق للايجار على الخريطة وانتي اختاري قربها من المعهد وقارني الاسعار والنظافة ولا تنسين التدفئة... اذكرج مرة ثانية بالتدفئة المركزية.
وبالنسبة لي أنا اختار على الخريطة واستخدم جوجل ايرث لحساب مسافة المشي من الشقة الى المعهد او الخدمات. حطي عنوان المعهد في جوجل ايرث او اكتبي Embassy Brighton في خانة بحث جوجل ايرث وراح يطلع لج المعهد وخزنية في البرنامج واستخدمي موقعي واكتبي Brighton واختاري الخريطة وشوفي القريب من المعهد.
بالنسبة لتغير النية وتبديل المعهد ما انصحج ترا الوقت ما عاد يمدي. يالله تلحقين تفيزين وترتبين امورج خاصةً ان عطل الكرسمس على الابواب. انا اليوم نصحني المكتب ان دورتي اخليها تبدأ 9 يناير بدل 3 يناير بسبب عطلهم.
وبخصوص الفيزة سألت المكتب وقال في نوعين من الفيزا student visa ما تحتاج أيلتس ولكن لازم الواحد يرجع لبلده لاخذ فيزا ثانية في حال حصوله على قبول في الجامعة. والفيزا الثانية هي general visa وهذه تحتاج 4 نقاط بالايلتس وميزتها الواحد ما يحتاج يرجع ديرته لاخذ فيزا ثانية للجامعة ويتم تجديدها في بريطانيا. وقال ان في قوانين جديدة راح يزودني فيها.
وانا انصحج تأخذين فيزا متعددة الدخول لبريطانيا وفيزا متعددة الدخول "شينجن" لاوربا لأن احتمال المعهد يسوي رحلات. لأن حصل معي في امريكيا الجامعة عملت رحلات لكندا وكثير من الطلاب ما قدروا يروحون معنا بسبب الفيزا.
الجو..؛ جهزي شمسيتج وجهزي كوتج ويفضل جلد او انه ضد الماي لان جاكيتات الخام ممكن تشرب الماي وما تسوى عليج. وما ادري اذا عندهم كفر نايلون مثل تايلند يلبس فوق الملابس. لأن المطر بمعدل 14 يوم في شهر يناير و10 ايام بفبراير ومثلهم بمارس. ودرجة الحرارة تحت 10 وفوق الصفر كمعدل عام. وسرعة الرياح معدلها 21 كم/ساعة. يعني اخذ معي فروة طفيلي وشماغ جدي J سجلي في صور جوجل brighton in winter وشوفي نوعية ملابس شعبها. لكن لي صديق درس هناك يقول فجأة يقلب عليك الجو وانا والله محتار مثلج لكن بأستعد لاسوء الاحتمالات.
انا سجلت على intensive English course كلفتني 3456 باوند لـ 12 اسبوع 28 حصة بالاسبوع والدرس الخصوصي الواحد يكلفني 50 باوند راح اقرر هناك حاجتي لهم لان المكتب نصحني بانه راح يكون علي ضغط وممكن تضيع الفايدة. والسكن 1716 باوند غرفة وحمام خاص ووجبتين يومياً. وطبعاً في تأمين صحي ورسوم تسجل يعني الاجمالي ممكن بحدود 5500 باوند. وبعد العيد عندي دورة لغة في المركز الثقافي البريطاني لمدة 40 يوم.
شنو لج خاطر تغيرين لدورة مكثفة؟ على فكرة انتي متى تبدأ دورتج؟
اخيراً خوش معلومات عن برايتون وهذا يطمن الواحد ولو كانت المنطقة اشوي غالية لكن في المقابل كلها خدمة لنا واحنا بالكويت اسعرنا صارت تقريبا قريبة من اسعارهم. اما قصة الطبخ اشوي صعبة علي فالله يعني على المطاعم.
وانا اكثر شيء عجبني هو ان اهلها منفتحين وهذا يساعد على تقوية اللغة. والاسواق ميزة زينة. على الاقل اخذ ايفون 4 اس ارخص من الكويت.. اما البند الثاني هو مو مشكلة كبيرة إلا اذا كانت المشكلة هذه موجودة في العايلة اللي بتسكن معهم

طيب عندج فكرة عن خطوط الهاتف وخدمة النت ولا ما بحثتي فيها؟

التدفئة المركزيه
بحثت ولقيت وحده بنظام التدفئة التقليديه لكن مو مفروشه بـ 1000 ووحده ثانيه مفروشه بـ950 غرفتين وغرفة جلوس ومطبخ وحمام ابعد من الاولى بثلاث شوارع تقريبا .. بس مافيها تدفئة مركزية !
الاولى الغير مفروشه راقيه صراحه ونظيفه .. والثانيه بعد من الصور اشوفها نظيفه .. برايك ان عدم وجود التدفئة مشكله ! لاني اشوف سعرها وهي مفروشه يعتبر اكثر من ممتاز نفتك من حوسه التأثيث .
والدفايات ممكن نشتريها لانها فتره من السنه مانحتاجها على طول . والا لك راي ثاني ؟

بالنسبه لشقتك الله يهنيك فيها يارب .. وكني اشوفها غاليه حبتين مقارنه بالشقق اللي مريت عليهم وانا ابحث لقيت ارخص من كذا بكثير .. لقيت بـ 400 باوند اذا ماخاب ظني نظام ستديو .. في Hove
برايي انه المفروض مايهمك القرب كثير دامك متواجد فيها لمده 3 شهور ممطره ماراح تقدر توصل المعهد مشي اتمنى ماتكون فاتتك هالنقطة ..

ماقدرت احسب مسافة المشي ,, بس انا اشوفها صراحه بعيده نوعا ما ينمشي له ابدا لازم باص لاني لقيتها بـ Hove وقريب من السكن 3 محطات باااص لكن ماادري ان كانت توقف في البرايتون ستيشن او لا !! هذا الموقع فيه المواعيد كل شي Brighton & Hove Bus and Coach Company ومحطات الوقوف لكن ماعرفت الرموز للمحطات عشان اعرف وين توقف يبي له جلسه وانا مريت مستعجله اذا انت عارف الطريقه ياليت تنورني ..

ايه حتى انا بدايه السمستر عندي بـ 9 يناير .. الله يوفقنا طلعنا بنبدا بنفس اليوم ..

الله يستر من هالقوانين الجديده ..بالنسبه للفيزا مالي خيار غير الستيودنت او اختبر ايلتس ومالي مزاج اختبر بصراحه , الشنقن مالها علاقه بفيزة الطالب صح ؟


الله يعين وهي بحكم انها قريبه من البحر اكيد بتكون برودتها زايده شويتين زي ماهو عندنا وعندكم .. انا شريت ملابس كثيره شتويه وثقيله بس عملية اما بالنسبه للجلود اخذت واحد بس وعموما مادام المظله موجوده فما يهم جلد او لا .. و صيفي وربيعي اخذت بعد ..
ههههه فروه وشماغ صعبة .. بجايم داخليه كفايه وانتو موديلات ملابسكم بالشتاء جدا جدا حلوه ولا يفوتك موسم التخفيضات الافينوس وقت التخفيضات خطير و السرداب تبع ماركس اند سبنسر في شارع المطاعم بعد اشتريت منهم بالصيف ملابس شتوية بسعر تراب وربي وكانت روعه بس يبي لها احد رايق يدور في كومة الملابس

والله غالي الله يعينك عالتكاليف صراحه .. 1716 هذا للسكن مع عايله اسبوعين !!!!! المدرس الخصوصي مااحس له لزمه حاليا .. لو احتجته بعدين يصير خير .. بس تضغط ع نفسك من البدايه مو حلو راح تمل ..
أعتقد standard قالو لي جينرال وبس ,, نستنى القبول ونشوف التفاصيل ..
بالنسبه للمطاعم فما انصحك صراحه لاباس بوجبتين بالاسبوع من باب التغيير .. الحين النت مايقول شي اكتب اللي تبي وتجيك المقادير بالطريقه خطوه خطوه
بكذا يكون اكلك صحي ومنها تتعرف ع اسماء مكونات الطبخه بالانجليزي لما تروح تشتريها ..
ومدام شقتك فيها مطبخ استغله ..

بالنسبه للخط الارضي .. ماادري والله .. بس الجوال ( ليبارا )International Calls | Pay As You Go | Low Cost Calls | Lebara Mobile كثير يمدحها لانها رخيصه لمكالمات الخليج وممكن تكون مجانا بين ليبارا وليبارا فيه لها طريقه لو لقيتها راح اجيبها لك هنا .. بس عيبها ما عندهم خدمة بلاك بيري ..
خدمه البلاك بيري عند شركة اورنج بـ 5 باوند

موضوعنا صار مرجع للبرايتونيين الجدد

التدفئة المركزية وصوني عليها ربعي اللي درسوا في مانشستر. راح تتأذين من التدفئة التقليدية. وهذا على ذمتهم. وما ادري هل تفرق برودة الجو بين برايتون ومانشستر؟
انا ما عزمت اسكن بشقة. وهذه مو شقتي لكنها عينة. والبحث للاستأناس بالاسعار في حال عدم رغبتي التكملة مع العائلة. اللي راح يكلفني السكن عندهم 1716 باوند لمدة 12 اسبوع عن طريق المعهد.. واما بالنسبة للسكن في هوف فأنا افضله لما استقر، ولما استقر بأذن الله راح اشتري سيارة وهني المسافة ما راح تأثر كثير. وعموماً ترا اقصى هوف الى المعهد من 10 الى 15 دقيقة بالسيارة. في خدمة بجوجل ايرث تختارين فيها نوع النقل وتختارين من اي مكان الى اي مكان وهو يعطيج الوصف وتقدير لوقت الوصول. امكانيات جوجل ايرث قوية وكثيرة تقديرين تستفيدين منها.
اما المشي تحت المطر فهذا فينا فينا ومو هو اللي مزعجني بس الا السفرة كلها من حجوزات وفيز وسكن كلها مزعجتني. لكن انا قصدي القرب من المعهد ومن الخدمات وهذه ميزة معهدنا لأنه قريب من الستيشن واكيد فيه البقالات والمقاهي والمطاعم ومحلات الهاتف وبالنسبة لج لا تهتمين فأكيد الباصات راح توصلج للستيشين وبالتالي المعهد. والمعروف في بريطانيا النقل الجماعي جداً قوي. وبالنسبة للمطر مرة ثانية انا سويت مقارنة بين معدل الامطار في الكويت وفي برايتون بشهر يناير
الكويت 53 مم برايتون 42 مم
الكويت 8 ايام برايتون 14 يوم
لكن برايتون ابرد واحتمالات نزول الثلج قوية.
والفرق اننا سياراتنا معنا وما نعاني من الامطار وغالباً الامطار عندنا بالليل. واما عندهم تنقلنا بالباصات ومشي والجو ابرد والهوا اقوى والاهم اننا مو متعودين على طريقة حياتهم فأكيد راح نتبهدل لين ما نتأقلم على طريقة حياتهم. واحتمال ان الامور سهالات واحنا متوترين زيادة

الطبخ اذكر في امريكيا اني عزمت صحابي بالصف علي الغدا كبسة ورحنا السيفواى وشرينا البهارات والدجاج والرز وفي الشقة الشولة على الكهرباء وشوفي المعاناة والفشيلة.. هي ضبطت بس عشى مو غدا

اما الفيزا اذا انتي بعد اللغة بترجعين لديرتج او ان مالج خلق اختبار الايلتس فالأفضل فيزا طالب وانا من ناحيتي راح اخذ فيزا طالب لاني برجع اكمل اجراءات الابتعاث وارجع بالصيف. والشينجن ما لها علاقة بفيزا الطالب وهي اذا حبيتي تسافرين لاوروبا من هناك او اذا المعهد سوى رحلة وحبيتي تروحين معهم وهذا الامر يعود لرغبتج.

خطوط الجوال انا يهمني اشتراكات نت. واما الاتصال الدولي مو مشكلة كبيرة عندي لاني اتسخدم برامج الـ VOIP بس لازم النت قوي. واسعارهم جداً مناسبة والاتصال صافي اذا النت قوي وميزتها انج تقدرين تتصلين على اي خط الجوال او الارضي. وفي عندج الفايبر وغيرهم من البرامج الاتصال المجاني.


البركة فيج انتي اثريتي الموضوع بمشاركاتج القيمة

السلام عليكم

اتأسف ع المقاطعة لقيتكم ماشاء الله عليكم عندكم معلومات حلوة عن بريطانيا
وانا طالب جامعي لساعي ما تخرجت ناوي اخذ كورس لغة لمدة شهرين
وميزانيتي حوالي 20.000 الف ريال سعودي
- حبيت اسألكم ايش تنصحوني اخذ لغة في بريطانية ؟؟
- هل الميزانية راح تسعفني لمدة شهرين معهد + عائلة + مصاريف ( من غير التذكرة )
مجموعة من الشباب نصحوني اروح لنيوزلندا ايش رايكم ؟؟؟ وايش تنصحووني ؟؟؟
يعطيكم العافية

شوف معهد امبيسي كورس ستاندر وغرفة خاصة مع وجبتين عند عائلة في نوزلندا لشهرين يكلف تقريبا بحدود 22 الف ريال سعودي ونفس المعهد ونفس المميزات في كامبريدج في بريطانيا نفس التكلفة وبرايتون اقل بألف ريال تقريباً لكن المعيش اغلى اما امبيسي هاستينغس تقريبا 18 الف ريال. وكله يعتمد على سعر الصرف
هذا موقع يحسب لك التكلفة في معاهد امبيسي حول العالم https://www.embassyces.com/prices/all_prices.aspx جرب وقارن الاسعار والخدمات حسب رغبتك ونفس الطريقة استخدمها مع المعاهد الموجودة باول الموضوع وان شاء الله ربي يوفقك بمعهد زين

ابو حمد ,, تخيل اني لقيت سكن بينها وبين المعهد 10 دقايق مشي بالتمام بـ 750 بس .. يارب الله يكتبه من نصيبي .. راسلت المالك من البارح الفجر ونقول يارب يرد علي ..

اما بالنسبه للتدفئة المركزيه راح تطوق علينا البحث وتوهقنا بخيارات اقل .. عشان كذا راح اعتمد على التدفئة الكهربائية .. وفي حاجه حلوه شفتها بالتلفزيون عباره عن بطانيه تنلبس مثل الملابس في البيت .. افكر اطلبها للحاجة

صادق برامج الاتصال المجانية بالايفون مو مقصررة والفيس تايم بعد .. بحثت عن شركات انترنت .. لقيت هذي Internet on the go with Mobile Broadband from 3 *' وتقدر تبحث عن مكاتبهم في برايتون من هنا مو بعيده علينا Store locator - Support - Three#

والاسعار حلوووه بصراحة .. افكر اخذ برودباند ..

بالنسبه لـ دورتي غيروها لي المكتب الى intensive English course لان كانت الساعه قليله جدا 3 ساعات باليوم بس وارسلوا لي القبول اليوم

اما بالنسبه للتوتر الله يعين مابقى شي ويارب يارب يكون كل توترنا ع الفاااضي ونروح هناك نرتاح ..

لو ماتوفر السكن مومشكله بعد ماتخلص مدتنا مع العايله خبروني ان المعهد يساعد طلابه وممكن يتعاون مع بعض المكاتب العقاريه .. وكثير نصحوني مااحجز اي شي الحين ..

بس في حاجه ابي اتاكد منها هل المطار فيه مكان للامانات ؟ بحثت عن هالشغله مالقيت لها اثر .. أحد عنده خلفيه ؟