مساعدة بعض الاستفسارات اتمنى الاجابه عليها

عزيزي لا يهمك تهويل الناس للأمر

بالنسبه للشرطة اول ماتوصل وتداوم بالمعهد تطلب منهم ورقة تقول ابي اخذها لمركز الشرطة وتطلب منهم يوصفون لك المركز والاوقات اللي يفتح فيها, عادة من 9 الى 12 اربع ايام بالاسبوع. تروح لهم وتخش وتقول ابي اسجل. مايحتاج مواعيد ولا يحزنون
وحتى لو تأخرت لنفترض عشر ايام قل لهم ماكنت اعرف القوانين, ترى الامور سهالات

بالنسبه للأشعة اذكر قبل 3 سنوات اخذتها معي وطلبوها, لكن صاحبي استقبلته الشهر اللي راح وكنت موصيه على الاشعة والتقرير الطبي, وسألته قلت طلبوه منك, قال لي: لا ماطلبوه. لكن ترى ماياخذ شي رح لأقرب مستوصف واطلب اشعة وخذ تقرير علشان تريح راسك, وخلها معك بالشنطة اليدوية بالطائره مش بالشحن علشان لو طلبوها تعطيها لهم.

بالنسبه للملحقية اذا كنت تبي تفتح ملف لازم تاخذ ورقة مباشرة من المعهد وبعدين تفتح ملف عن طريق النت وتدخل كل البيانات وكل الاوراق المطلوبة, مايحتاج تروح للملحقية بنفسك زي اول.

لاتاخذ معك كاش كثير تحسبا للأوضاع, خل معك 200 باوند والباقي ببطاقة الصراف, وأول ماتوصل المعهد اطلب منهم ورقة تعريف للبنك وروح اقرب بنك HSBC وعطهم الورقة وقل لهم انك طالب وتبي تفتح حساب ((أمانه)) وقل كلمة امانه بالعربي لأن الكلمة عربية. يفتحون لك حساب اسلامي بدون فوائد. وراح توصلك البطاقة بعد اسبوع واذا فعلتها حول كل فلوسك على البنك البريطاني عن طريق حوالة من بنك السعودي الى البريطاني

بالنسبة للتسجيل بالعيادة ترى جلست سنتين مافتحت لي ملف كل يوم اقول بكره هههههههههههه, لكن اذا كنت ناوي تدرس هنا وتطول يعني تدرس لغه وجامعة, اول ماتوصل المعهد قل لهم ابي ورقة لـ GB بيعطونك ورقة وبيعلمونك اقرب جي بي لمكان سكنك. تروح لهم وتعطيهم الورقة وتفتح ملف.

طبعا اذا غيرت عنوانك لازم تغير العنوان بالشرطة والبنك والجي بي وشركة الموبايل برضوا

الشركات حلوه. انا شركتي T-Mobile لي معاهم 3 سنوات زي الحلاوة الحمدالله. صاحبي اخذته لشركتي واخذته لشركة اسمها 3 ولقينى عندهم عرض حلو جدا جدا جدا احسن من عرض شركتي الصراحة واشترك فيه. أهم نقطة هي انك تاخذ شريحة بس بدون موبايل وبرضوا تطلب يكون العقد شهري يعني تقدر تلغيه بأي وقت. لأنك لو اخذت عقد سنوي يمكن تظطر انك تغير الشركة فـ في هالحاله راح يطالبونك بدفع كل مبلغ السنه.

الوزن المسموح فيه موجود على التذكرة. اذا كانت التذكرة من الوزارة اتوقع يعطونك 50 كيلو واذا على حساب اتوقع يعطونك 30

لاتسوي زحمه على نفسك وتتعب نفسك ترى الامور سهالات. اهم شي جيب بهارات طبخ معك اذا انك راعي كبسه وطبخ, وغيره كل شي موجود

اي خدمة راسلني وانا حاضر, قبولات او اي شي