أفيدوني من خلال خبرتكم ..

وعليكم السلام والرحمه

اول شيء اللي فهمته منك انك متخرجه انقليزي هذا شيء ايجابي
بس الاختبار ما يعتمد على اللغة فقط يعتمد ايضاً على مهارات معينة مثلاً فيه كلمات دائماً تتكرر بالاختبار موجودة بالانترنت للريدنق وللرايتنق تقريباً 500 كلمة بالاضافة الى مشاهدة مقاطع في اليويتوب لاختبارات سابقة خصوصا المقاطع الخاصة باختبارات السبيكنق لانها افادتني كثير
الاختبار يحتاج اعداد جيد فيه مواقع بالانترنت فيها اختبارات تجريبيه مفيده جدا و 6 بالايلتس مهيب صعبه ابد كثير اللي جابوها من اول اختبار لهم
بس نصيحة من اخ اذا فكرتي انك تختبرين اختبري بالسعودية لان فيه مرونة بالتصحيح خصوصا بالجزء المتعلق بالرايتنق

وعليكم السلام ورحمة الله وبركاته

شوفي يا غالية
أنا ما رحت معهد، اشتريت كتاب
New Insight into IELTS
وذاكرت منه
بالإضافة لموقع simon
ومقاطع TED في اليوتيوب
والله يبارك لي ولكم جبت 6 من أول اختبار
من غير ما أدفع فلوس في معاهد وولا شي
وصحبتي دخلت معهد وجابت 5.5

في الأخير المعهد حيعلمك نفس الأساسيات اللي في الكتب
فلا تعتمدي عليه
لازم ترجعي البيت وتذاكري وتكتبي وتسمعي

وتسألي الله التوفيق أولا وآخرا
أحيانا الواحد يذاكر بس مع رهبة الاختبار يضيع
والتيسير وشرح الصدر من عند الواحد الأحد

الله يوفقك وتبشرينا بدرجة حلوة

أضيف لنصائح الاخوات والاخوة

الايلتز يعتمد في الغالب على الاستراتيجية اللي تعتمدينها في الحل.. ويساعد أكيد مدى جدارتك باللغة

بس الجدارة ما تكفي لان عامل الوقت هنا يلعب دور مهم ..

استراتيجية الوقت اللي تستخدميها راح تأثر في عدد الاسئلة اللي ان شاء الله راح تقدرين تجاوبين عليها
لان عندك حوالي 40 سؤال في الريدينج ..
والوقت للاجابة على كل سؤال ما يتعدى دقيقة وكم ثانية ؟!!

وفي الرايتنج بعد .. صحيح عدد الكلمات مو كثير بس الاهم تعرفين كيف ترتبين افكارك والمدة اللي تحتاجينها للتفكير والوقت الفعلي للكتابة ..

في مجموعة اشياء بسيطة .. تقدر تخدمك ممكن تتعلمينها من كتب او مقالات أو صفحات على اليوتيوب ..
بس ان شاء الله ما اظن انها صعبة عليك

كل اللي محتاجته تعلم الاستراتيجية دام تخصصك لغة انجليزية
وان شاء الله تبشرينا بدرجة فوق 6 ونص

طيب هل تكفيني 5 اسابيع عشان اتعلم استراتيجيات الحل ؟؟
وانا فكرت اختبر الايلتس واخذ دوره في بريطانيا .. عشان اقرر بعدها اقدم عالابتعاث ولا لا
مشكووره على النصيحه والافاده جزاك الله كل خير

للجنة حنين & سماء وطموح ..
حقيقي كلامكم رفع معنوياتي كثيرر
واكيد باستفيد من نصايحكم لياا الف شكر لكم
وجزاكم الله كل خير

...
..
.
طيب بكمل باقي استفساراتي
انا احترت جدا في تحديد المدينه او المعهد
بس نوعا ما عجبتني شيفيلد وبرمنقهام و ليدز
كيف اعرف المعاهد الموجوده فيها ؟؟
وكيف اعرف اذا المعهد معتمد من الملحقية السعوديه ولا لا ؟؟
وبالنسبة للي موجودين حاليا هناك .. اقدر اتحرك بحجابي بكل حريه ولا لا
اقدر اروح المعهد وارجع لحالي ولا لا ؟؟

عزيزتي بالنسبة لاستراتيجية الحل أظن في عدة عوامل راح تساعدك بدون معهد ..
في كتب تتكلم عن IELTS Hints
وكمان مقالات كثيرة في النت

الشيء الثاني بنصحك قبل لا تقررين تسافرين برا ..
تشوفين هالكتب المهمة مثل الكتاب اللي نصحت في الاخت فوق .. وتنزلينها من النت وتحلينها
أعطي نفسك مدة اسبوع - اسبوعين ..
دراسة مكثفة وجادة ..

من وجهة نظري المتواضعة ..
اليوتيوب ومقالات اللانترنت ..
مع بعض الكتب كافية ان شاء الله تجيب لك الدرجة ..

أهم نقطة ركزي ثم ركزي ثم ركزي..
واعطي كل قسم من الاقسام حقه ..
لان اذا اهملتي قسم ممكن يأثر على باقي الدرجة ..

اعطي كل قسم كمن يوم .. وشوفي بداية مقالات حول استراتيجية الحل لكل قسم ..
ثم اعمل تطبيق عملي
ثم جربي اختبار او نموذجين - 10
لان مو كافي تقيسين نفسك من نموذج واحد خاصة الريدينج ..

وهكذا بالنسبة للبقية ..

بعد هالاسبوعين راح تلاحظين ان مستواك ان شاء الله تعدل كثير ..

وساعتها قرري حجم حاجتك للكورس برا او لا ..
لأن في منهم يكفيهم وفي منهم لا ..


في حالة قررتي للسفر للخارج ..
أمانة الفترة اللي فاتت كنت ابحث كثير عن جامعة شيفيلد
لان التخصص اللي ابحث عنه مطروح في هالجامعة ..

ولمن قارنتها بجامعات ثانية مثل (برمينجهام - درم - ليدز - ادنبره- مانشستر - امبريل كولج لندن - ليفربول - نيوكاسل)
أغلب المقالات بالمخلص تشير الى التالي:

1- أكثر المدن أمانا .. في بريطانيا .. حتى في الكتيب (البروشور) حقهم مأكدين على هالنقطة .. وثاني شيء كنت اقرا تعليقات الطلاب سواء (الاجانب أو الخليجين) وما أنكروا هالنقطة
2- ملتي كلتشور بحكم تعدد جنسيات الطلاب اللي هناك فما تحسي بخوف او وحدة او قلق
3- مدري اذا بتدخلي في برنامج سكنهم بس اذا فكرتي تاخذين سكنهم .. فتصنف سكناتهم على عام 2012 كأفضل سكن للطلاب على مستوى جامعات بريطانيا
4- فيها خدمات كثيرة وكبنت (مو شاب )ى أعتقد انها تفي بالغرض ..
5- تصنف شيفيلد بأنها ضمن أرخص المدن البريطانية .. (هالنقطة مهمة) خاصة لو بتدرسين على حسابك ان شاء الله
6- بالنسبة للمعهد تبع جامعة شيفيلد ( فهو معترف فيه) وفيه خيارات أخرى من المعاهد الجيدة ..


ألكلام اللي فوق كله هو ما توصلت اليه من قراءتي لمقالات مختلفة .. بحكم انها كانت من الخيارات الللي ابحث عنها ..

وأتمنى أكون افدتك ..