ماهو افضل معهد للغة وافضل منطقة للسكن بمانشستر ؟

استفسار اخر

اليس معهد الجامعه لتدريس اللغة افضل من المعاهد الاخرى ؟

علماً انا مستواي في اللغة متوسط

انتظر تكرمكم بالاجابة وشكرا

بالنسبة لضريبة السكن

سمعت انهم يطالبون بضريبة رغم انه الطالب معفي منها


ياليت توضحون لي كيف التعامل مع هالامر ؟


وشكرا

اهلا اخوي صادق الود بالنسبة لافضل معهد في مانشستر اشوف ان كل معاهد اللغه زي بعض تجارية لكن افضلها هو معهد mmu اللي هو معهد جامعة مانشستر متروبوليتان هذا حسب معرفتي
وبالنسبة للسكن ابعد عن حي الروشوم لان اغلبه عرب و مو مريح لكن تستطيع ان تسكن في شارع اوكسفود روود وقريب من السنتر وقريب من الجامعهات ومن شارع الروشوم وفيه كم صالة جيم
ارجوا اني افدتك ولو بشي بسيط

جعل عمرك طويل اخوي جزاك الله خير

ودي استشيرك مابين مانشستر وبورتسموث و ساوثهامتون


اشكرك مره اخرى

حياك الله يا صادق الود
بخصوص مانشستر فهي بالنسبة لي أفضل من بورتسموث وساوثهامتون
فيها محلات كثييييرررررر حلال ومطاعم وبقالات وعرب وأسواق ... فما تشيل هم ابداً من ناحية الأكل الحلال تبي تحصله في كل مكان
المطاعم العربية والهندية والتركية كثر مرررره
لكن ابعد عن منطقة الرشوم لأنها مزعجة بالليل صراحة وما تهدئ ابداً في الويك اند يعني ماراح تنام الليل من الازعاج
عندك أكثر من منطقة هادئة في السنتر فيه مثلاً شارع ويتورث في السنتر تقريباً منطقة حلوة مرة وجمبها مجمعات وسينما وبقالات كبيرة وفيه مجمعات سكنية كثيرة فيها او حولها قريب اذا حصلت فيه شي كويس ورخيص توكل على الله

أما المعاهد فنصيحتي لك تاخذ في معهد تبع جامعة لأن دراستك في بعض المعاهد الخاصة تلزمك تدفع ضريبة سكن للحكومة يسمونها Council Tax وكثير معاهد كذا
أما معاهد الجامعات المعروفة فما تدفع هالضريبة ... انا درست في معهد خاص وماكنت اعرف عن هالموضوع ودفعت اكثر من ١٠٠ باوند كل شهر تخيل!!!!! ولمن كلمت مكتب الضرائب وخبرتهم إني طالب قالوا المعهد حقك ماهو معفي من الضرائب ..... عاد انت اسئل كل معهد تتواصل معه هل هو معفي من الضرائب او لا

وعلى فكرة عندي اثاث بيت كامل في مخزن اذا كنت تبغاه الصدق ودي ابيعه انا في لندن وما احتاجه ..
الاثاث كامل والكمال لله ونظيف جداً .. كنبات للصالة وتلفزيون وسرير نفرين وسرير اطفال وطاولات وتسريحة ومكرويف وعفش كااااامل وكثير
راسلني على الخاص اذا مهتم فيه ....

أي سؤال ثاني انا بالخدمة حياك الله يا أخوي ^^

اخوي عبدالعزيز الفريدي


جعل والديك بالجنة .. اشكر لك اجابتك الوافية والشافيه

انا جيتي بحول الله في ابريل فلا ترتبط فيني بخصوص الاثاث

واشكر لك عرضك.

طيب تنصحني بمعهد اللغة حق الجامعه اللي في الرشوم؟

وأليس هو اكاديمي بحت ؟

وكيف احصل قبول فيه؟


وشكرا لك

ارجو التكرم بالاجابه لمن لديه خبرة


وشكرا

هلا صادق الود...
اعتذر منك يا اخي على التأخير في الرد...

بخصوص المعهد فالأفضل والأضمن إنك تدرس في معهد تبع جامعة وليس معهد مستقل او خاص ....
وناس كثير يمدحون دراسة اللغة في معهد الجامعة أكثر من الخاص .. اسلوبهم في التدريس والتعامل والخبرة الطويلة في المجال يخليهم اكثر خبرة ومعرفة من المعاهد الخاصة

معهد اللغة اللي في الرشم الصدق ما اعرفه..
لكن زوجتي درست في معهد جامعة مانشستر امتداد طريق اكسفورد .. قريب من الرشم ممكن يكون هو نفسه..
وتمدح فيه كثير ... فإذا قدرت تجيب منه قبول توكل على الله لأن مستواه قوي جداً

المعاهد عندهم كورسات كثيرة ... اغلب معاهد الجامعات تكون كورساتهم اكاديمية لأن الطلاب يدرسون بالجامعة أصلاً!!
لكن ممكن تحصل كورسات عامة او حصص صغيرة جانبية في معاهد الجامعات تدرسك حاجات ثانية غير الأكاديمي
زوجتي كانت تدرس مقرر اكاديمي ومقرر مهارات الآيلتس في معهد جامعة مانشستر

أما المعاهد الخاصة الخارجية بتحصل فيها مقررات كثيرة غير الأكاديمي.

بالتوفيق ان شاء الله لك .. اتمنى جاوبت عليك بشكل واضح

اشكرك اخي الفريدي


انت قلت معهد جامعة مانشستر صح؟

لانه في جامعتين مانشستر ومتروبلويتون !!

والله ودي بمعهد الجامعه للاسباب اللي ذكرتها انت فوق وانه ايضا بيعطوني بطاقة طالب عشان اكون معفي من رسوم السكن.

بس هل اقدر اختار كورس انجليزي عام .. يعني جينرال ؟

لانه مستواي جيد ولا ابي تكون دراستي اكاديميه لحد ممكن نقول دروس مكثفه وتعقيد

وشكرا لك اخوي