ما هي شروط القبول في جامعة كامبردج في بريطانيا ؟ هل الشروط صعبة ؟

نعم تعتبر شروط متقدمة مقارنة بمثيلاتها من الجامعات ..

مثلاً لبكالوريوس اللغة الإنجليزية تحتاجين آيلس ٧.٥ بحيث لا تنزل درجة أي مهارة عن ٧ ولابد تكون درجتك في الثانوية باللغة الإنجليزية متميزة والعديد من الشروط هنا

Entrance requirements

اختي الله يوفقك ان شاءالله ..

لكن اسمحيلي أوجهلك بعض النصائح ..

اولا جامعه كامبرج من الجامعات الأقوى والاعرق بالعالم .. القبول فيها صعب جداً لكن ممكن ..

فكره ان هدفك هو الدراسه في جامعه كامبرج فكان من المفترض ان تدخلي على موقع الجامعه وتقرأي الشروط بتروي ..

اما ان هدفك الدراسه بكامبرج و تسألي عن شروط القبول فالاحظ ان طموحك كبير لكن لم تبذلي الجهد اللازم ..

موفقه ،،

صحسح صعبة لكن في البداية رحم الله امرىء عرف قدر نفسة..
ميزتها لو تتخرجي منها الف وظيف تنتظرك

اشكركم جميعا من كل أعماق قلبي اخواني واخواتي الكرام
ولكن عندي طلب من الاخ Abo Eyad ... ممكن تضع لي شروط القبول في جامعة كامبردج باللغة العربية ؟؟
لانه الرابط الذي وضعته بصراحة لم افهم منه شيئا واشعر انه ليس له علاقة بقبول الجامعة
وعندي سؤال آخر من فضلكم اخواني واخواتي الكرام .... هل صحيح انه يجب علي الإلتحاق ببلدي بدورة الآيلتس لاثبات انني اعرف اللغة الانجليزية ؟؟؟
وكم كورس يجب ان اخذه في دورة الآيلتس ؟؟؟
وكم يجب ان تكون نسبتي بالثانوية للقسم الأدبي لدخول جامعة كامبردج لقسم آداب اللغة الانجليزية ؟
واسفة جدا تعبتكم معاي بالاسئلة اخواني واخواتي الكرام ... ولكن ماذا افعل ليس لدي احد سواكم لكي يجيبني ويفيدني بالاجابات هنا بهذا المنتدى الرائع

وشكرا

اختكم Hope Soon

^^^
السؤال هو لماذا الأدب الإنجليزي!

أعتقد إنه من الأفضل لك هو دراسة تخصص الترجمة مباشرة!!

بما إن هدفك النهائي هو العمل في مجال الترجمة سواء عملية أو إكاديمية!!!

وفقك الله لما فيه الخير لمستقبلك العلمي والعملي،، تحياتي وأفضل تمنياتي.

--------

http://www.mbt3th.us/vb/forum66/thread347094-94.html

Good luck sis

أحد الردود في المنتدى تكلم عن هالموضوع .. وفصل ومن واقع تجربة ..

http://www.mbt3th.us/vb/forum66/thre...ml#post1540584

جداً قريب للي في الروابط ، مع بعض الاختلافات البسيطة مثل درجة الآيلس تحتاجينها ٧.٥ وليست ٧ ، فالأخ كان يذكر شروط تخصص آخر، لكن كلها متقاربة..

شوفيها في البداية .. وأتفق مع الأخ إننا ما نركز على جامعة بعينها ، فمن الممكن أن نقدم على ١٠ جامعات ونأخذ القبولات الممكنة ونقارن بينها، فربما لا يقبلك من هذه الجامعات إلا ٥ أو ٤ فيكون لديك خيارات كثيرة

عزيزتي
مثل ما ذكر الاخ احمد .. وحابة اضيف ..

كل شيء ممكن ما في شيء مستحيل .. الا ان المستحيل في الغالب يحتاج وقت أطول لتحقيقه ..
كنت من ضمن الناس اللي سجلت في جامعة كامبريدج واكسفورد .. (الدفعة اللي تسجيلها انتهى بتاريخ 10/1)
وانقبلت مؤخرا للمقابلة في أكسفورد وعملتها قبل مدة قصيرة جدا .. خلال هذا الشهر ..

راح اعرض تجربتي واتمنى تفيدك وتفيد أي شخص حاب يسجل في هالجامعات..
كان خط طويل جدا ومشوار الحصول على قبول مو هين ..
يحتاج له صدق وعزيمة واصرار ورسم ثابت للطريق بدون توتر أو تلخبط وكل يوم برأي ..
لكن قبل لا اسجل ومن قرابة 7 سنوات وانا احضر للتسجيل نفسه ..
حتى اختصر على نفسي القائمة التنافسية.. وبخبرك ليه وكيف ؟؟

في البداية :
كنت اسمع عن هالجامعات وقوتها وكنت مهتمة ادخل تحدي وانقبل في افضل الجامعات..
الحمدلله الجو اللي معي مشجع يعني الكل نصحني بالدراسة في هالجامعتين وفي ناس نصحوني بهارفارد
(ما عدا ثلة قليلة جدا) بحجة الصعب ومستحيل وما يناسب وغربة وشقى وتعب ..

لكن لان طموحي كان عالي وهدفي ماله حدود .. قررت اني اغامر واجازف واضحي بكثير اشياء
واستشرت ناس من اول ما تخرجت من الثانوية وكان مجموعي 96.7
كان عندي معدل +نشاطات طلابية واشياء خفيفة + لغة ..
لكن كنت مؤمنة ان انجازاتي ما تستحق اني اضيع وقتي لاجل ادخل في قبول وانا مو مأهله له ..
يعني مثل اللي عنده 10 ريال وشاف قطعة حلوى ب 100 ريال ومو قادر يوصل لها ..

قررت أدرس البكالوريوس في اي جامعة يكون مستواها ممتاز لكن استثنيت جامعتي اكسفورد وكامبريدج وطبعا هارفارد
( وحلمي معلٌق حتى اشعار آخر) ما نسيته ولا راح عن بالي

في هالفترة : نقدر نقول 3 أو 4 سنوات البكالوريوس
كنت احاول اخترع اي شيء / ابتكر / افكر / ركزت على اللغة الانجلزية ودرست الالماني خلال سنتين وعقبها فرنسي
وكان اي مؤتمر مهتم بتخصصي احضره لدرجة سافرت مؤتمر بامريكا بثاني سنة من دراسة البكالوريوس
حاولت أكتب كتاب (صحيح ما نشرته لكن على وشك انه يجهز)..
المهم مع السعي والمواصلة واخلصت لدراستي تخرجت بمعدل امتياز 3.68 الحمدلله صحيح مو عالي لكن هذا اللي قدرت عليه والجامعة صعبة جدا.. المميز اني كنت الاولى على الدفعة وثاني شخص كان 3.2 ..

بفسر لك ليه سويت كل هالاشياء بالبكالوريوس :-
حسب الدكاترة ونصائح بعض المتخرجين من هالجامعات القبول باحد هذي الجامعات مو مطلوب منك معدل مرتفع ولغة انجليزية قوية وبس مطلوب منك تكوني انجزتي شيء مميز ومهم سواء اكملتيه او لساتك في نص الطريق
في الغالب اصحاب الاختراعات واصحاب الملكيات الفكرية لاشياء غريبة ومهمة أو لهم سبق في مجال ما
ما تهم نسبتهم بالثانوية او اللغة لان هالجامعات هي اللي تركض لهم وتعرض قبولها حتى مع سقوط الشرطين اللي فوق ..
تدرين ليه :
لان الجامعة ودها تفتخر فيك عقب التخرج مثل ما انتي حابة تفتخري فيها بعد التخرج ..
يعني قيمة مضافة لهم .. مو عبء وبس..

عقب البكالوريوس حاولت اطور مهاراتي ودخلت على دورات مهمة وفيها شهادات دولية + حاولت اعمل مشروع ثقافي يخدم البلد وحصلت فيه على موافقة وقبول وشهادة ملكية معترف فيها .. ومختومة بختم الدولة ..

حاولت بكل الوسائل ان السيرة الذاتية تكون مليانة انجازات واشياء فيها كلمة: اول _ ابتكرت _ ... الخ من الكلمات اللي تدل على السبق أو التميز والانفراد في شيء يخص التخصص .. عملت ماستر .. ودرست سنة .. وكملت لغة فرنسي وحاليا ادرس كوري..

ولا تنسي شيء اسمه رسائل التزكية .. تكون من شخص مهم أو بروفيسور كان يدرس فيها سابقا او له علاقه في القسم اللي ناوية تدرسين فيه ... ولو جات من شخص له فضل او كراسي علميه عندهم يكون افضل .. مثلا تشوفين شيخ من شيوخكم له كرسي علمي او عمل لهالجامعة شيء واخذي منه رسالة تزكية ..
بما يفيد انك potential scholar

جانب اخر .. شيء اسمه personal statement
في جانب يتعلق بالحديث عن توجهاتك المستقبيلة .. انتي الحين ووين ناوية توصلين وكيف مؤسستهم راح تكون مثل الجسر يوصلك لهدفك المستقبلي (مو اي هدف ) هدف عظيم ونبيل ما راح يخدمك انتي وبس يخدم الانسانية بشكل عام ..

في النهاية نصيحة:
الجامعة صحيح راح تضيف لك قيمة في سيرتك الذاتية .. بس تعلمت مع الوقت ان الانسان هو اللي يخلد اسمه بالتاريخ .. الانسان هو اللي يضيف لنفسه من خلال انجازاته اسم .. لان في كثير ناس تخرجت من هالجامعات وما لها صيت ولا اسم .. بينما ناس صارت عالمية تخرجت من جامعات عادية جدا .. وصارت جامعات مثل هارفارد وكامبريدج واكسفورد تطلب انهم يدرسون عندها ..
وفي ثلاث عبارات خليهم بين عيونك ..
1- توقعك هو واقعك
2- كما تفكر تكون
3- المرء حيث يضع نفسه ..

التخصص اللي تحبينه ترجمه .. مجالاته واسعة ممكن تبدعين فيها ..
اللغة والمعدل شيء مفروغ منه ..
لكن الباقي دوري على شيء مميز مثل : حضور المؤتمرات – حاولي تترجمي بنفسك .. اقراي كثير في الترجمة .
تعلمي اساسيات الترجمة .. خذي هالسنة سنة للعمل وترجمي رواية لاي دار نشر ..
لان هالعمل ممكن يفتح لك باب لهالجامعة ..
المهم التركيز وارسمي خط واصل وواضح ..
الطريق مو سهل .. يحتاج لك تضحي بوقتك وطلعاتك ويمكن ما راح تشوفين الشمس بالايام ..
وتذكري (ان لم تخلص فلا تتعب نفسك)

بالتوفيق لك ولكل اللي حابين يدرسون في هالجامعات العريقة والمميزة

ها ايش سويتي؟؟ حققتي هدفك ؟؟