حيرة و تردد - مرافقك هو والدك - أحتاج نصيحتك

الأخت الكريمة

دعواتنا لك بالتوفيق وخير من تمثل أباها ودينها ووطنها.

أختي الكريمة/

يختلف أب عن أب وفكر عن فكر والناس مثل ما يقولون أجناس.

وقد يكون قلب الأب وشفقته نظرا لظروف وطموح فلذة كبده صرح بخلاف ما يضمر.
لذا أرى أن يكون على علم واطلاع ودراية بكل صغيرة وكبيرة عن هذا البلد والمدينة التي سوف تكون دراستك بها وسوف يساعدك الانترنت بكل معلومة لإيصالها لوالدك.

وإن كانت وجهة دراستك في مانشستر أو كان لك أي محاولة لتحويل دراستك في مانشستر فوالله كلنا أبناء لوالدك ولن يشعر بيوم غربة او تفكير لأن هنا اجتماعات ولقاءات ومساجد كثيرة وتواجد للعرب وخصوصا السعوديين بشكل كبير.وهناك مثل أبيك كبار بالسن وعايشين ومبسوطين.. وهناك مدن اخرى مثل ليستر وبرمنجهام فيها تواجد للعرب لكن احكي عن ما أعرفه.

والله كان لي جار الله يذكره بالخير كان كبير بالسن تجاوز 75 من عمره معاه بنتين..ما كان متصور الوضع لكن شهر وهو متأقلم وجلس ثلاث سنوات ورجعوا الله يستر عليهم.

وبشأن الأخت اللي تقول متفاهمة انا وأبوي أحترم والله وجهة نظرها..لكن وجود المحرم مهم ليس كما يظنه الكثير أن يكون ملازمها ملازمة مريض..المهم أن يكون هناك محرم
فالتي لديها محرم تشعر بالأمان وتنسى مسألة الخوف بخلاف من ليس لديها محرم.

يا اختي انتي انسانه نبيله
الله يكثر من امثالك ..
ويرزقك ويحقق مرادك .. ياللي تراعين وضع ابوك
ولا همتك نفسك مقابل راحة ابوك ..

اجابتي لك بتكون واقعيه جداً ..
وراح اقولك ماتكنه نفسي لو كنت مكانك

انتي ابخص في ابوك ..
ولا تقارنين ( وضع ابوك ) مع غيره ..
الظروف الاجتماعيه مختلفه

اذا ابوك كبير سن ..
ومن الناس اللي محافظين ..
يعني بالمختصر مثل شيبانا اللي نعرفهم .. على سجيتهم الاوله
فالديره ماهي عاجبته .. وبيضيق صدره بعد اسبوعين
وراح يضيق صدرك كل ماشفتيه قاعد لحاله في هالديره
لا ونيس ولا جليس .. .. ويمكن حتى مايقدر يطلع من شقته

الشارع مختلف .. البشر مختلفين .. اللبس مختلف .. التبرج موجود
التنقل بالمواصلات صعب على ابوك .. التفاهم مع الاخرين معدوم
حتى العرب اللي هناك .. ممكن يستغلونه .. ولا تفكرين انهم اهل فزعه .
.

اما اذا هو من الشيبان اللي متفتحين شوي
وحقين روحات وجيات من يومهم .. وقادرين على التكيف
فهذولا يمكن يتحملون الغربه . ويصبرون عليها ..


الحين شباب في العشرينات تضيق عليهم الوسيعه
ويرجعون .. وهم مهيأ لهم كل شي ..
روحات وجيات واصدقاء وزملاء ..
فبما بالك برجل كبير السن سيعاني .. غربه .. و .. وحده !!



تكفين ثم تكفين
اذا انتي حاسه ان ابوك مهوب متأقلم .. وانتي ابخص في ابوك
وتعرفينه اكثر من غيرك ..
اتركي هالابتعاث ... وبيعوضك الله بخير منه
وانشاء الله مانتي ندمانه .. ولا راح يفوتك شي لو ماسافرتي

الظروف مهيأه في الداخل لو هدفك دراسه ..
وبيحقق الله كل طموحاتك

.

اولا الله يوفقك ويسر امرك ويكتب لك مافيه الخير
وان يرزقك بر والدك
ثانيا اختي الامور سهله واسهل مما تتصورين
شيبانا جو هناك وانبسطو ولا بغو يرجعون ههههه
اهم شي تروحين لمدينه فيها مطاعم عربيه ومساجد
وانصحك باحدى المدن التاليه
مانشستر
كاردف
لستر
نوتنقهام
وصدقيني يبي ينبسط
الشي الثاني لو طفش وضاق خلقه يرجع لسعوديه يغير جو ثمن يرجع لك
يعني اسبوع بالسعوديه وشهر عندك
المسافه قريبه والامور طيبه

وان كنتي حريصه عليه مره وشايفه ماهو متاقلم مع الحياه هناك
شوفي لك بديل وكملي بالسعوديه ترى جامعاتنا بها خير

وفقك الله

أختي الفاضله .. انا مثل حالتك وانتي احسن بعد ع الاقل لغتك جيده وتقدري تدبري امورك وامور والدك ..
لكن محسوبتك بتطلع مع ابوها عمره 65 ومن الشيبان المتحفظين جدااا ولاله في الروحه ولا الجيه وليس لدي لغه ع الاطلاق سفري باذن الله بعد 3 اسابيع وهموم الدنيا طايحه على راسي لكن انا مضطره لها البعثه حسب طبيعه عملي فتوكلت على الله بخوض التجربه الي اعتبرها مغامره
انتي اذا مافي شي يجبرك لسفر ادرسي بمملكتنا جامعتنا فيها البركه .. وربي بيعوضك

..

ماشاءالله ، الكل كفي و وفى
كلامهم عين العقل
نصيحتي البسيطه لك ( استخيري ) صدقيني ربي يوريك الانسب
و يفتح لك ابواب الخير و تتسهل باذنه.
..
الله يوفقنا جميع