مساعده حول الدراسه في بريطانيا المعيشه + ثقافه + انسجام + مستوى الدراسه

كنت أشتغل على أحد بحوثي قلت أغير جو وأدخل أرد عليك أساعدك بس يوم شفت قصة حياتك حسيت أني راح أقضي ساعة علشان أجاوبك لكن إن شاء الله بأرجع لك بإذن الله.

وعليكم السلام ورحمة الله وبركاته

اول شيء انت مرافق كل شيء مجانا تعليم صحة معيشة الحياة افضل مليون مرة من السعودية هم بدون اسلام لكن أخلاقهم أسلاميه
السعودية البشر مسلمين لكن كذب ونقض عهود وأخلاق غير صحيحه الا من رحم الله

ادعوا لخالاتكم لأنهم أعطوكم هالفرصة ماهو تضيعونها وأتوقع خالتك فاهمه كل شيء انت خلك معها وهي تدبر لك قبول لغه وبكالوريوس


أظن والله اعلم أني عرفت خالتك ^_^ بروح اخبرها وش كاتب بالمنتدى

بالعكس المفروض تفرح لانك بتروح تدرس برا

انت راح تكون مرافق يعني معيشتك كلها ع الملحقية ..المملحقية راح تتكفل بك وبدراستك

وراح تصرف لك راتب شهري نفس راتب المبتعث بعد تبدا دراسة

والمبتعثين بالخارج كلهم عايشن حياتهم ومافي صعوبات ان شاء الله

اتوكل على الله وبالتوفيق

السلام عليكم ورحمة الله وبركاته


انت مقبل على تجربة عظيمة جدا وفرصة ما تتفوت وانا انصحك تطلع من غير اي تفكير


وبحاول ان شاء الله ارد على اللي اقدر عليه

انا هنا باتكلم عن تجربتي في (بريطانيا) وتقريبا الوضع في امريكا وكندا واستراليا مشابه لها لحد كبير مع اختلاف في بعض الجزئيات



انا تقريبا مشابه لوضعك اختي جاها فرصة ابتعاث وكان الامل في اثنين اخوالي لكن لظروفهم ما قدر احد يطلع مع اختي وانا كنت طالب في جامعة سعود تخصص علوم طبية المستوى الرابع

بعد ما اعتذرو اخوالي اقترحت اني اطلع مع اختي لحد ما يفظى واحد منهم وخلال هالفتره اذا قدرت احصل قبول في جامعه هناك خلاص بكمل والله يعوضني باللي فات وفعلا هذا اللي حصل لحد الان

انا الان قاعد ادرس لغه عشان بقدم عالجامعه ان شاء الله( دعواتكم )

بالنسبة لأسلتك:

١-المعيشه وطبيعه الناس كيف هناك ؟
كل مكان له سلبيات وايجابيات واتوقع مع العولمه اللي نعيشها ذا الايام الروتين العم يشبه بعضه في كل مكان والناس في بريطانيا نوعا ما انطوائيين - باستثناء اسكتلندا- لكن صدقني نظرتهم للطلاب الخليجيين محترمه جدا وهذا الكلام سمعته من كذا شخص بريطاني وطبيعي فالبداية بتحس باختلاف بس مع الوقت بتتعود.



٢-هل التكلفه المعيشيه غاليه جدا ؟
والله في نوعا ما غلاء بس انت انسى الريال وشيله من حساباتك وبعرف تدبر امرك وفيه مدن ارخص من الثانية طبعا



٣-انا راح اروح مرافق معها كيف يضموني وكم اقعد فتره عشان ابتدي في دراستي ؟
انت تقدر تجيب قبول للغة من قبل ما تسافر وترفعه للملحقية الثقافية بلندن وهم يتكفلون بجميع التكاليف ولو عندك قبول من الجامعة ترفعه لهم وتطلب انك تصير مرافق مبتعث وكل هذي الاشياء عن طريق النت يعني ما يحتاج تقعد تراجع عندهم



٤-ومن الي راح يتكفل بالمصاريف الدراسه كلها هل الجامعه ولا المركز الثقافي ابتعاث السعودي مدري وش اسمه ؟
كل المصاريف الدراسية تكون على حساب الملحقية + راتب شهري



٥-زي ماذكرت لكم حالتي ماديه شبه سيئه كم مكافأه الطالب هناك وهل تكفيني ؟
٢١٨٤ باوند شهريا هذا مجموع مكافئة المرافق والمبتعث (بالنسبة للماجستير ماعندي علم كم بالتمام) هذا لطالب الباكلوريوس



٦-هل اذا رحت المركز او الجامعه الي بتتكفل بالمصاريفي راح تجهز لي المعهد والجامعه لاني مابي اختار لاني ماعرف شي ابيهم يختارون لي افضل معهد وجامعه كويسه لاني جدا مانيب متفوق مره ؟
لا
هذا الشي انت اللي تقوم فيه يعني تشوف الجامعات وتشوف تصنيفها السنوي او تسال الطلاب اللي يدرسون فيها او عن طريق مكتب تثق فيه ممكن يجيبلك قبول



٧-انا خايف من طلاب صراحه اخاف يهينوني ويهينون اسلام زي ما سمع في المنتديات واخاف اواجه مشاكل ؟
هنا كل واحد في حاله واصلا عيب عندهم انك تسال عن ديانة الشخص وحتى لو تعرضت لكلام عن دينك سو نفسك انك ما سمعت شي وصدقني انك باقي تشوف المبشرين ودعاة للاسلام في مكان عام كل واحد يتكلم للناس عن دينه ولا يفصل بينهم الا امتار ولا احد يتعرض للثاني وبالنسبه لي انا شفتهم هنا في بريطانيا يعاملو المواطن زي الاجنبي ما فيه اي فرق وحتى في الدين ياكثر ما صلينا في الاماكن العامه والشوارع والله ما عمره احد ضايقنا او ازعجنا باي شي لا مواطنين ولا شرطه



٨-انا جدا مرتعب اخاف افشل لاني مادري ايش اقول لكم ماتعودت اللقي خطابات وكلام قدام جمهور راح اواجه مشكله اخاف قروب الي انا بكون فيه اخرب عليهم علما ما اتحمل وراح يضيق خلقي !! ؟
يضيق؟
اذا بتستحي وتتعب بسرعه فالبلد هذي والله صعب تعيش او تتعلم والله معنا ناس يجو بالشهور وتلقاه من المعهد للشقه وللاسف انه ما يستفيد اي شي وتلقى لغته مثل اول ما جاء لازم تكون جريء وتراهم هنا اذا شافو لغتك ضعيفة يحاولو يساعدوك ويبسطولك كلامهم بحسث انك تفهم عليهم وما يضايقهم هذا الشيء ابدا بلعكس يحبون يتكلمون مع الشخص اللي توه يتعلم لغه
مره انا وصديق لي كان يدخن وجا شخص طلبه في ولاعه اعطاع ودخن وبدا يتكلم معنا يوم خلص قالنا واهو يمزح (your accent is rabish but I really like it) معناه= لكنتكم سيئة بس انها اعجبتني
طبعا قالها واهو يبتسم وضحكنا معه وبلعكس دقيناه معه صحبه وصار خوينا



٩-الدراسه صعبه ام سهله ؟؟؟
بالنسبة للغه انت لا تقول لنفسك انها صعبه ومنب متعلم بسرعه بلعكس خذها باريحيه تامه وترا الانجليزي موب صعب والله وسهل جدا انك تتعلمه
اما الجامعه فما عندي علم والله لاني باقي في مرحلة اللغة ولكن حسب كلام الشباب اللي معي فهمت انه يعتمد عليك اول شي وبعدين على الجامعه والتخصص الل بتدرسه

ان شاء الله غيري يفيدك فيها احسن



١٠- هل يحتاج تكون متفوق في دراسه عشان تعرف تسلك معا ناس لان انا انسان اذا طالعت ناس ممتازين تجيني ضيقه بالصدر اني ابدا مومثلهم واخاف جدا افششل لان الدراسه هناك مختلفه جدا ! ؟
لازم تتعب على نفسك وبلعكس المفروض اذا شفت الممتازين مفروض انك تحاول تقلدهم وتسمع منهم وتشوف وتاخذ بنصايحهم عشان تصير زيهم او احسن حتى



١١-الخوف الي شايل همه هو اسكن معا عائله اخاف اواجه مشاكل معهم وعندي سؤال واقسم بالله اني منحرج جدا وجدا آسف آسف آسف بس والله ثم والله محتاج اجابه ومالقيت احد اسأله ولحد يضحك
والله شوف ترا العوايل مثل الشغالات انت وحظك بس اذا اخترت عايله تقدر تحدد موعد معهم وتروح تزورهم وبيعرفونك على انفسهم ووش اللي بيكون واللي عليك لو عجبك نظامهم وسعرهم خلاص توكل ما عجبك تقدر تدور عايله ثانيهوتسوي معهم نفس الشي



١٢-اللحين هل الغرب حماماتهم الله يكرمكم مافي الا المغسله فيها ماء والباقي مافيه
يعني معقوله يستخدمون مناديل زي الي اشوفه في افلام الله يقرف عدونا ؟؟
هههههههه للاسف انه ما عندهم الا كذا بس انا عندي الدش افك الراس حقه واستخدمه واذا جيت اتروش ارجعه والامور ماشيه الحمد لله هههههههه
لكن في الاماكن الثانية الله يعينك جهز معك قاروره وعبها مويه هههههههه



١٣-واذا بروح للعايله شلون يعني اروح لهم يعني هل في شركه او مؤؤسه يروحون عوايل يقدمون عليهم يبغون طلاب يسكنون عندهم بالمبلغ رمزي وكم التكفله السكن عندهم ؟؟
انا ما جربت عايله لاني ماخذ شقه مع اختي بس اللي اعرفه انه غالبا يكون عن طريق المعهد او فيه مواقع انترنت تحط المدينه حقتك وتحط شروطك وعليها يطلعلك العوايل
وانت تتواصل معهم وتحددون متى تزورهم عشان تتعرف عليهم بالنسبة للتكلفة كل عايله ولها سعر (ياليت اللي جربو العوايل يفيدونا بتجاربهم)



١٤-في الجامعه هل راح يساعدونا شلون نقدر نسوي برزنتيشن ؟
ما عندي اي فكرة والله وسوالك مهم والله

الشباب يفيدونا



١٥-هل يقدرون الطلاب يعني دكاترهم مافيهم لعانه زي الي عندنا ؟؟
طبعا هنا ما تقول للدكتور يا دكتور لازم تناديه باسمه بدون اي لقب وطبعا يقدرون الطلاب ونص بعد وحقك ما يضيع ان شاء الله وفيه احتماله كبيره اصلا ان الدكتور يكون صديقك يوما ما على فكره



١٦-واذا صار شي لاقدر الله مرضت واحتاج اروح للدكتور هل اتعالج مجانا كما سمعت اذا انت منظم في ابتعاث ؟
الله يبعد عنا وعن كل مسلم كل مكروه
فيه تامين طبي شامل للمبتعث والمرافق ويشمل اسنان ونظارة طبية كل سنة فلا تشيل هم العلاج ابدا



١٧-اي البنوك امريكيه عندا فروع في السعوديه هل سامبا امريكيه عشان لو اهلي بيحولون فلوس لي ؟
في حالة ان اهلك بيحولون لك فلوس فبتكون حواله دوليه عن طريق اي بنك فالسعودية





واي سؤال ثاني تفضل وان شاء الله ما احد يقصر

وكل اللي اطلبه منكم دعوة لي بالتوفيق في دراستي ودعوة لوالدي ووالدتي-حفظهم الله-.


والسلام عليكم ورحمة الله وبركاته

وعليكم السلام ورحمه الله وبركاته

والله أنصحك أخوي روح وبقوة وإن شاء الله كل شي فيك بيتحسن
حتى خوفك وترددك ونفسيتك كلها بتروح

وصدقني مع الأيام بتزيد ثقتك بنفسك حبة حبة لأن الغربة تعلم وأنا أخوك

وتراك منت بأقل مننا بشي كلها عايشين بالعكس فيه ناس ضروفها أخس منك والحمد لله عايشة ومرتاحة

أهم شي صلي صلاة الإستخارة والله يوفقك

انت قصتك طويلة
تعال على الوت ساب او ادق عليك
انا في بريطانيا مبتعث ارسل رقمك لي خاص يبيلك جلسة انت
راح اساعدك بكل شي لاتخاف امورك سهلة