سؤال يهم الكل بخصوص الابتعاث الى بريطانيا

وعليكم السلام ورحمة الله وبركاته ،،
انا قرأت التصريح على اساس انهم متشددين للذين يدرسون على حسابهم ان يجتازوا 30 ساعه .... الخ
للإنضمام للبعثه والدراسة على حساب الدولة ،،
ولكن المصرح لم يتطرق للمبتعثين على حساب الدولة من خلال التقديم في برنامج خادم الحرمين الشريفين ،، يعني اتوقع ان الابتعاث لبريطانيا للمتقدمين العاديين مفتووح والله اعلم
ان شاء الله احد الأعضاء يكون عنده خلفيه كامله عن المووضوع ويفيدك ،،
تحياتي لك

مشكور يا مصعب ..

ظنيت انك فهمتني غلط بس طلعت فاهمني

المشكلة ما ابي اضيع وقتي في الوزارة الا لما اتأكد ان فيه احد ظبطت معه انه راح وابتعثوه الوزارة وهو خارج البرنامج ..

مازلت منتظر تجربة احد

استخير احسن شئ . . واذا على الوزاره خذها مني وقتك كله بيضيع

اخوي الساحر .. /

اسمح لي اسألك معليش ماكنت ادري ان فيه طريقه للابتعاث بهالشكل !!
انا ابي ادرس ماستر ولو بنتظر المرحله الرابعه بتروح علي سنه كامله
عشان الاجراءات و الحوسه = (
الله يخليك قلي بالتفصيل كيف اقدر ادرس ببريطانيا بهذي الطريقه ..؟

انا بانتظار الرد ..

الطريقة لمن ليس لديه المقدرة على استخراج الفيزا بنفسه لانه لا يملك الضمان المالي

زيارة الوزارة وزارة التعليم العالي
احضار الاوراق التالية:
قبول جامعي من الدولة اللي ترغب في دراستها
صورة من اخر مؤهل مع كشف الدرجات ويفضل بلغة انقليزيه لاني ما ادري اذا بيقبلون العربي
صورة الجواز

مقابلة مدقق الاوراق الي اسمه ناصر البشر .. مسؤول مشاريع التحطيم لنفسيات الطلاب
بعد ما تقابل ناصر بيخليك تكره شي اسمه دراسة ويحاول يقول انك تحلم بالبعثة وشوفة الدكتور علي العطية من سابع المستحيلات ويجي بعد ساعتين ويناقض نفسه وشغله طويله

الللي تسويه انك تقول له هالجملة وبس : دقق اوراقي وخلني اقابل الدكتور .. وتجاهل كل بربرته

تقابل الدكتور وتقول له انك تبي تدرس وهذا قبولي الجامعي ( ضروري يكون معك قبول جامعي)
ويعطيك خطاب للسفارة تقدم فيه عالفيزا
بعد ما تجيب الفيزا تعطيه الجواز يشوفه وتطلب منه طلب اركاب

وباذن الله تمشي امورك

اكون صريح معك هالطريقة هي الطريقة الطبيعية للابتعاث بما ان الكل يحق له الابتعاث دامه مطابق للشروط .. ولكن الوزارة لها قرارات هامشية مزاجية كل يوم تطلع وتتنفى بنفس اليوم وهذا الشي انا عاصرته بنفسي وشفته عشان كذا خلك واثق اشد الثقة ان فيه لوائح تفيد بان الطالب له شروط اذا طابقها يحق له الابتعاث


من اهم عوائق عدم القبول في الابتعاث :

عدم وجود واسطة
الدرجة الاكاديمية غير كافية .. يعني واحد نسبته 70% صعبة يروح يهوش ويقول ابي ابتعث لان ماله وجه
اهم سبب عدم التوكل على الله
ومن الاسباب المهمة عملية تضييع الطلاب وتدخيلة دوامه .. بينها صاحب هالدوامة يستقبل ولد عمه ويدخله لمكتبه ويخلص اموره كان ما فيه دوامه سواها لغيره قبل شوي

الله عليهم

وبس انشالله اكون كفيت ووفيت

انت ماتدري من العام الماضي وانا انتظر المرحلة الرابعه و معقله كل آمالي عليها ماكنت ادري ان فيه طريقه مختصره بهالشكل ...

الله يجزااااك خير ياخوي
و لك مني بظهر الغيب اصدق الدعاء

شكـــــ راً ^_^

كان الله بعونكم

انا مرافق لزوجتي المبتعثة لبريطانيا لدراسة الماجستير وارسلت استفسار للوزارو وقالوا هذا الكلام لا ينطبق على من يرافق زوجته المبتعثة

الله يكون بالعون