++ تجمع معهد كابلن أسبيكت .....أدنبــــــــــرهـ ....!!! حياكم===

عشان ماتحشرنا كاتبته الموضوع وتقول ليش وماليش وعشان يمكن معد اسير مره ثانيه هنا لاني مدري شلون طحت على الموقع خخخخخخ
بقولها التجربه في كابلن اسبكت بشكل مختصر
الكتب بفلوس
يعطونكم ورق
الدروس مكرره
الاختبارات مره كل شهر
ومافيه معيار ابدا وماتقدرون تعرفون وش مستواكم وكم جبتم بالدرجات
لان درجاتي كل مالها تنقص بالاختبارات !!!!
كل يوم اثنين يجون طلاب جدد ويدخلون معكم وعادي يكملون شغلهم
يعني لو انتم جيتو والعالم بادين بالماضي المستمر مثلا يفوتكم الدرس ويطمرونه عادي
ماديين بشكل ماتتصورونه لذا لاتسوون غلطتي وخوذو ضمان 12 اسبوع على الاكثر
لانهم مرمطوني يوم بغيت اطلع قبل المده وللحين ماخلصت وانا طالع من شهر
السكن يوفرون لكم سكن
لايلعبون عليكم ويستقبلونكم من المطار لانهم غااااليين يعني ياخذون خمسين باوند على الاستقبال
بينما باص بـ 6 باوند يوديكم للسنتر !!
السكن عندهم ارتفع لذا انصح تتفقون مع عائله من الان او الشكوه لله تسكنون معهم فتره لين تظبط الامور
عندهم ست مدرسين
كيت << بطله بالتدريس ومملوحه بس وصخه ماتتروش العلامه الفارقه سنونها فيها من حلايا سعيدان (سكوتش)
كيتي << مملوحه وبطله بالتدريس ابطل شي بس ماتتروش بعد وتداوم بسيكل العلامه الفارقه شنكار بخشمها والشنكار هو اي شي حديد ينحط بخشم البقره (انقليزيه)
ماقي<< بطله بالتدريس وحبوبه معي لكن هواش انا واياها دايم تسب من بعيد لبعيد عن النظام السعودي ووضع الحريم عندنا لكن احشرها دايم ومعد صارت تتكلم معي الشباب يقولون انها عنصريه وصارت سالفه قبل معها لانها تكلمت ضد العرب السفاره السعوديه ماسووت شي السفاره الكويتيه خلتها تقدم اعتذار غصب وقعدت تصيح وانطردت شهرين ورجعت العلامه الفارقه شيفه ( سكوتش ولها اخو توم احيانا احس انها رجال)
ادريان << بطل بالتدريس لهجته صعبه عنصرري وحشاش لكنه يكابر يقول ماني عنصري العلامه الفارقه (مصلع ونظارات)
جيم << بطل ابطل شي بس من جمبها بالتدريس درس كوميدي وصلخ بالانقليز مايطيقهم وهو المسؤول عن الاكتيفيتي والطلعات الخارجيه العلامه الفارقه ( شايب وشعر كنه رامبو ) ويدوخ عند شرق اسيا وعنده ثلاث بنات وولد ويشجع فريق سيلتك وديانته رومن كاثوليك
اليكس<< عسل وبطل وحبيب وكويس العلامه الفارقه (دبدوب وطويل واشقر )
باقي مدرسين اثنين مااعرفهم فليبا (لطخه) وواحد رسمي مااعرفه بعد
المديره (السعلوه) جاكي
والدبه حقت الاستقبال جو حبيبه بالحيل تظبطكم في اي شي

الطلعات حقاتهم رقص اسكوتلندي- بار - مصنع الوسكي- القلعه
التدريس عادي جدا
ضرني اكثر من انه نفعني
لان كان عندي معلومات وحاسني حوس
انا حاليا في هاريوت وات صراحه لا يعلى عليه

واخيرا اللي يبي ينبسط يدخل كابلن اسبكت
واللي يبي يتعلم انقليزي راح يتعلم لو انه ف القويعيه << احترامي للقويعيه لكن طرت على بالي
واللي ماله نيه لو انه في قصر عجيزهم الملكه ماراح يتعلم << دايم نسمع ان احسن لغه انقليزيه بالقصر
وفقنا الله لنا ولكم لما يحبه ويرضاه

بقهر مدري وش اسمك وش تبي بالفنادق الله يجزاك خير !!!
اطلب من المعهد يدبرلك عائله بـ 140 باوند بالاسبوع او اقل بشوي او ازود بشوي
لين تدبر وضعك
عادي العائله متى مابغيت تنحاش تنحاش
بس انتبه لايتراكم عليك حساب العايله حاول تسدد اول باول
والمعهد على شارع الكوين ستريت وفيه فنادق وفيه على البرنس ستريت فنادق بس غالي ترا
بالنسبه للسبيكنق ماينفعك كثير
يعني الجامعه ماعليهم من السبيكنق عليهم من الرايتنق وبس
والاشياء الثانيه تجي مع الوقت
بس كابلن يطلق لسانك على طول ان شاءالله

مرحبا..
كلام الاخ bagor صح وان اللي اخذه معاي من السعوديه 60 كيلو بس وشنطتين باليدو لا تخافون كل شئ هنا متوفر.
بالنسبه للأخ برنس انت متواجد الان في ادنبره اذا كان نعم فانا و زوجي محتاجين منك مساعده صغيره ..
تحياتي

ايه متواجد

امري
بعدين اسمي لورنس مو برنس
وحاليا في البرنسس ستريت عند ووفرلي ستيشن مقابل برقر كنق

مرحبا..
سوري اخوي لورنس
اذا ممكن محلات اللحم الحلال
ثاني شئ كيف اخذت قبول المعهد اللي بهيروت وات انت رحت نفس المعهد او عن طريق الوقع الالكتروني و شنو اسم الكورس
شكرا مقدما
تحياتي..

محلات الحلال ياطويلة العمر كثيره والله
فيه بالنورث بردج
جمب المسجد
بالساحه اللي جمبها فيه حديقه
فيه هناك بقاله بسم الله ( هندي كويس) ويبيع لحم حلال ويقطعه قدامك
واللي جمبه مطعم كباب محل عندهم برياني لحم في المزااج
وبعدين جمبه بقاله المدينه (باكستانيين كويسين بعد ) ويبيعون لحم حلال ودجاج واضلع وحركات حلوه
وفيه وراهم بخطوتين بقاله البحر الاحمر ( حقت سودانيين زوله في المزاج) يبيع هذا بعد لحم حلال ودجاج واغراض المطبخ كلها وبضاعته سعوديه ذاك اليوم مسكت نبي زنجبيل مطحون لقينا عنده يعني فيه كلش ان شاءالله
وفيه بنفس الحاره بس على النورث بردج مطعم حلال سوري كويس والله شاورما وبيتزا ورخيص وخصم خاص للطلاب
وفيه بالليث وولك محلين يبيعون لحم حلال بس مدري وين الوصف بالظبط

بالنسبه لهاريوت وات فاتك التسجيل حق الترم هذا
يبيلك تسجلين من الحين للترم الصيفي المكثف اللي يأهلك لدخول الجامعه اذا حصلتي على درجه سي وتوصيتين من المدرسين
تقدرين تراسلين واحد اسمه فراس لبناني كويس بس مشغول دايم
هذا ايميله (تم حذف الإيميل لأن عرضه مخالف لشروط المنتدى)
وهذا رقمه 1314513769
طبعا هو يبي طلاب لان تجيه نسبه
بس عملية القبول سهله تروحين تعبين النموذج توقعين خلاص تنظمين
وبدون ضمان وبدون اي شي انا جبت لهم الضمان امس وانا دارس معهم من زمان خخخخخ

بالتوفيق

لورنس

الله يوفقك ويسهلك امرك من جد كانك رزق من ربنا طحنا فيه

لانك يمكن الشخص الوحديد والمتحدث الرسمي عن ادنبره

الله يعافيك

سؤالي عن اجراء التحويل من كابلن لانه قبولي فيه ومن جدخوفتني لاني مالي في حرق الدم كيف

الشيء الثاني ايش الاحياء الامنه والراقية حتي لو مايسكنا سعوديين غير ليبرتون وجليمترون

هل شبكه المواصلات سهلة وماتخوف لانه هي الوحيده الي بروح فيها

هل حقا ادنبره تستحق لكي نتحمل البرد والاكسنت الصعب

هل لو سكنت في بيت غير امن او ماتفرق لانه مالي نفس في شقه بيوتهم مرة حلوه

اتمني ماتنزعج من كثره اسئلتي ولكن سفري قرب وبدأت اتخوف من كثير اشياء

الله يوفقك ويفتحها عليك

لورنس

النجده يالورنس في كل اسئله الأخت / تالا
لأنه حتى انا بعد سفري قرب ودي اعرف الشي الكثير عن المدينه
واضيف عليه سؤال إذا سمحت
هل دراسه اللغه صعبه او سهله وخصوصاً في ادنبره
وتكفي 9 شهور.وعلى فكره انا في المعهد الحلو اللي قصته طويله .
مشكور مقدماً ويعطيك العافيه ..

طحنا عليك هههههههههههههههههههه
مو شغلنا دخول الحمام مو زي خروجه
س1 كيف احصل على قبول من جامعه هيروات لغه وماستر (سهل ولا صعب )
س2 اطلب الضمان 12 اسبوع وبعدين كيف اخبرهم برغبه التغيير واخد ضمان ثاني
س3 كيف الايجارات عندهم والجو
ملزم تجاوب

يا شباب المنطقه الي فيها معهدنا وش اسمها .. ؟
وهل هي منطقه مناسبة للسكن ولا لأ .؟
ابي شقه مو فنادق