النجدة.. يبوني أحول وانا ماعرف ولا شي عن كندا غير اسمها

أول شيء ارشح بريطانيا

كل اللي راحوها يمدحون فيها...وانتي اقري ويش اللي يناسبك

اللي اعرفه ان اكسفورد هي الوحيدة اللي تشترط ان التخصص يكون امتداد للتخصصك السابق

امريكا نصيحة لله وشوفي ولاية ماتكون باردة وامريكا ماتفرق عن كندا المسافة قريبه بالتوفيق

طيب تتوقعي لازم جيمات وشغلات زي كذا.. او شلون

شكراً عزيزتي..انا ماعندي رغبة في امريكا.. بعيدة وتطفش هي ونظام فيزها.. وبعدين رحت كل الدول المممنوعة واحتمال كبير ما قدر اخذ فيزا وماعندي استعداد اغامر
والمرافق اخوي درس وعاش في امريكا سبع سنين وماله نية ومايبي اني اختارها

لا ما عندي خلفية عنها لسه أنا بطلع بفبرير

سلام عليكم
أول شي بالنسبه للدراسات العليا في كندا عقبات
1-مسألة القبول في الجامعات تكاد تكون مستحيله للي معدله أقل من جيد جدآ
وان فرضنا تم القبول بمعدل أقل من جيد جدآ تأكدي انه راح يكون فيه سنه ونصف تحضيريه قبل ما تدخلي على برنامج الماستر
2- بالنسبه للفيز تطول شوي
3-غالبية جامعات كندا تطلب جيمات
مع العلم بان تخصص التجاره الالكترونيه في جامعة أوتاوا برنامج الماستر ما يطلب جيمات
4-الماستر في كندا ما يقل عن سنتين هذا اذا ما كان في سنه ونصف تحضيريه اذا المعدل نازل
يعني الماستر+السنه ونصف التحضيريه=تقريبآ خلينا نقول 4 سنوات
أمريكا أتوقع الحال مثل كندا الا في القبولات قبولات أمريكا أسهل من كندا الفيزا تطول
أمريكا وكندا بالنسبه للمعيشه معقوله الى حد ما
بالنسبه لبريطانيا القبولات سهله الفيز ما تطول الجامعات عندهم مافيها جيمات الماستر عندهم سنه بس المشكله في الغلا
لكن بما أنك راح تدرسي سنه واحده فقط اللي هي للماستر ممكن تضغطين على نفسك في المصاريف شوي خصوصآ بعد الزياده
بالنسبه لأستراليا أتوقع القبولات سهله الفيزا حاليآ أسرع من كندا الماسنر سنه واحده
بالنسبه للمعيشه أرخص من بريطانيا وأمريكا وكندا
اذا أحتجتي أي شي أنا في الخدمه

رحم الله والديك يا محاضرنا الغالي أبو هبة الله
الله يوفقك وتخلص الدكتوراه في التجاره الالكترونيه

تحياتي

يعطيك الف عافية وجزاك الله خير.. كلامك ميل راسي نحو بريطانيا.. بقي الحين اختار المنطقة
مادري تنصحوني بمدينة او منطقة معينة..
ابي مكان آمن.. حلو.. متوفر فيه كل شي.. اقدر اخذ شقة بروحي او استوديو.. قريب من الملحقية عشان لاصار لي شي اكون حول المنطقة
وهل اقدر اختار ماجستير بدون بحوث.. يعني فيه تدريب.. او تطبيق شي زي كذا... تقدر تنصحني بجامعة معينة

اختي GUSSES موضوع مهم

متابعه لكل تطورات موضوعك
وعن الاسئله اللي ابيها هيّا نفس استفساراتك

ياااارب تتوفقي ويتوفق الجميع

بسم الله الرحمن الرحيم

احم احم <<<<<<<نفر الحين سوي كلام كلو انفار سوي يسمع هههههههههههههههههههه

قبل كل شي الله يوفقك ويسهل كل امورك

انتي حيرتك كانت بين كندا وبريطانيا <<<<<قبل لا يجي بريطانيا كان في نفس الحاله

المهم

الناس اللي تكلمو بالتفصيل عن بريطانيا وكندا ما قصروا

واصعب شي اللي يعطيك راي ولا يعطيك اسباب يحيرك اكثر

انا اقول وبالله التوفيق

اول وجه للمقارنه : الدراسه
في بريطانيا سهله جدا.............في كندا صعبه جدا
السبب : الجامعات في كندا كلها مدعومه من ماديا الدوله <<<مثل السعوديه يعني ما يفرق معاهم كثر الطلاب ولا قلوا باختصار مهم حقين بزنس في الدراسه
دقيقين جدا جدا جدا في الدراسه وصدقيين
بريطانيا : اهم شي عند الجامعات الفلوووووووووووس
بس مو معناتها ان الدراسه عندهم سايبه بس ماهي صعبه
الماستر انواع في بريطانيا في كورسات وفيه بحوث على حسب التخصص وعلى حسب الجامعه
القبول في بريطانيا عالاقل في يوم وعالاكثر اسبوع
القبول في كندا علاقل اسبوعين وعالاكثر شهرين
الجو :
ابدا غير مهم <<<رأي شخصي

الاحوال الماديه :
اللي يقولك كندا ارخص اقوله صح
بس اللي يقولك اللي في بريطانيا تعبانين ماديا اقوله غلطااااااااااااااااااااااااااان
المكافاه الان 1168 باوند بسعر صرف ثابت تقريبا 6 ريال سعودي للباوند
يعني انواع الفشخره بالراااااااااااااااااااااحه
انا شخصيا ساكن باستديو وسيع بـ 400 باوند شهريا واخوياي باستديو اوسع واحلى بـ 350 باوند شهريا
الاكل والشرب : انا شخصيا اصرف 300 باوند شهريا
خليها 500 لو انتي ما تطبخين لنفسك يعني لو تبين جميع وجباتك من المطاعم

الباقي سوي فيه اللي تبين

الحال فله ماديا ابدا يعني البلد غاليه بس المكافاه تكفي وزياده

وبعدين انتي ما شاء الله مجرمه بيكون معك مكافأة المرافق اللي هي 890 باوند تقريبا

يعني انواع البذخ
استاجري فيلا مو ستديو

ادري انك قررتي على بريطانيا بس انا اكتب اللي يمليه علي ضميري ويريح بالك ان شاء الله

وصلتي مرحلة المدينه

اهم شي في هالنقطه الجامعه
اذا لقيتي تخصصك في جامعه وشفتي المواد اللي بالتخصص وعجبتك روحي
يعني على حسب الجاااااااااااااااامعه
سالفة المدينه هذي سالفه ما اشوف انها مره تحير ليش
انا اقولك ليش
لان اغلب مدن بريطانيا متشابهه
يبقى رغبتك انتي في كثرة العرب والعوائل العربيه والسعوديه والشباب من عدمها

حسب معلوماتي
المدن اللي فيها كثرة سعوديين وعوائل سعوديه :
مانشستر
اغلب مدن ويلز
برايتون
بورموث
بورتسموث
اكسفورد
كمبريدج
ساوثامبتون
ليدز
اكسيتر
واكيد فيه غيرهم بعد بس هذولي من اشهر تجمعات السعوديين لدرجة ان كل مدينه من هالمدن فيها شارع اسمه شارع العرب

مثل ما قلتلك اهم شي الجامعه
بعدها شوفي رغبتك انتي

من المدن اللي اعرف ان ما فيها عرب ولا سعوديين بكثره يعني ينعدون عالاصابع ولا فيها منطة عرب هي مدينة بليموث

طبعا اذا جينا نتكلم عن لندن :
لندن ما فيها انجليز اصلا
كلها اجانب = جميع جنسيات العالم
طبعا لندن وما حولها اغلى من ناحية الاسعار بكثير من المناطق الاخرى
بورموث رخيصه
بليموث رخيصه
الشمال رخيص
طبعا اذا تبين خضره ومناضر ماني عارف كيف بس برررررررررد ولغه صعبه روحي اسكتلندا
الوزاره والملحقيه قاعدين يرغبون الناس فيها
السعوديين فيهم قليل
بس النهار عندهم 3 ساعات في الشتاء والاكسنت عندهم متعب

مدري وش باقي
المهم هذا كل اللي عندي
والله يوفق الجميع

والله يانفر سعودي.. كلامك حيرني زود.. لأن شبه استقريت على لندن تجي تقولي مافيها انجليز.. اشدعوة اجل بتكلم وشي؟؟ والله موضوع يجنن

الجامعة مابعد لقيت القبول عشان كذا مرحلة اللغة بعتبرها مرحلة مؤقتة للسكن
والي يقول قبولاتكم يوم يومين.. المكتب له اكثر 15 يوم وللحين ماجاب قبولي حق اللغة بس خليها على الله وكل يوم ازعجهم بعد.. اجي بجيب لنفسي قبول بس المشكلة لازم ادفع اون لاين.. يعني مالقيت للحين معهد كويس يسجلني بدون رسوم تسجيل
وبعدين وين بأي مدينة هذي الي الأستوديوا ب 400 بس

وبالنسبة للمكان .. انا ابي مكان حلو يرد الروح اذا تضايقت طلعت .. فيه انجليز.. عدد السعودين لايغزوا المكان.. اللكنة حقتهم حلوة وتعليم المعهد يكون ممتاز.. هل المدن الي ذكرتها انت تطابق هالوصف

بالنسبة للمكافأة حقة المرافق.. انا معاي مرافق بس الظروف تحتم انه مايسكن معاي يعني بدفع اجاره واجاري