التاكسي من المطار لوسط لندن

شكراً لكم أيها الأعزاء

اليوم بحمد الله وصلت لندن الساعة 5:30 ص ، وتيسرت اموري بشكل كبير، ما عدا موقف مضحك

وقفت في السرا حوالي 10 دقائق، وصار دوري عند وحدة متعاونة وغير معقدة.. فقط قالت لي انت جاي تدرس لمدة سنة؟ (حسب الفيزا) قلت نعم.. قالت شكرا لك ومرحبا بك في بريطانيا.. وعطتني الجواز وقالت رح استلم أغراضك..

بدون سؤال عن قبول
وبدون أشعة
وبدون كلاب تشمشم الشنط

بس صارت المشكلة إنه كنت متفق مع سائق تاكسي يوصلني للملحقية بـ 30 باوند، لأن الشنطة ثقيلة بشكل كبير.. وصعب أسحبها معي.. المهم لقيت اثنين من الشباب وقلت إذا بتروحون معي الله يحييكم.. وصرنا سوا وزدنا الضعف .. وصار على كل شخص 20 باوند إلى باب الملحقية..

السالفة إني خلصت قبلهم لأن ما عندي أشعة، ورحت أنتظر شنطتي توصل بالسير، وما شفتها، طبعاً كنت تعباااااان ما نمت من زماااان.. انتظرتهم وما حصلتهم، فقلت أكيد إنهم راحوا ... بعدين رحت للعامل اللي يشيل الحقائب من السير، وقلت له ما شفت شنطة مثل هذي ونفس لونها بس حجمها كبير؟ وأشرت على وحدة من الشنط.. قال لا.. وقال لي روح اسأل مكتب الخطوط السعودية.. رحت لهم ولقيت اللي معي دوبهم مخلصين الأشعة .. وانتظرنا الموظف عشان نعبي استمارة ضياع الحقيبة.. والمشكلة كل أوراقي كانت فيها..
بعدين قلت للي معي انتظروا شوي أروح أشوف يمكن أحصلها..
تتوقعون إيش اللي حصل؟ اللي حصل إن حضرتي نسيت شنطتي.. على بالي إنها أكبر من الحقيقة.. صارت هي نفس الشنطة اللي سألت العامل عنها
بس الظاهر صارت خيرة لأني انتظرت اللي معي، والا لو حصلتها من أول كان مشيت وخليتهم لأنه على بالي إنهم راحوا.. وأنا ما معي أرقامهم ..

أخذنا شنطنا وعلى طول على التاكسي اللي ينتظرنا ومباشرة على الملحقية.. حتى قبل يفتحون واحنا ندخل.. صلينا الفجر، وأفطرنا والحمد لله مع الظهر وأنا مخلص كل أوراقي..

الآن أنا في فندق صغير على ادجوار رود .. والحمد لله ..