الطب في بولندا على حسابي الخاص لمن عنده اي خلفية يتفضل ارجوكم تعبت وانا ابحث والله

يرررررررررررررررررفع

وين الردود

20 مساهده ولا ررررررد معقول

طيب اللي عنده خبره بالمجر يقووووووولي

والله اخوي انا نفس قصتك انقبلت السنه الي راحت وغيرت راي قبل لا اسلم اوراقي
وفكرت اقدم ذي السنه لقيتهم رفعو شروط الابتعاث ٨٠ قدرات ٨٠ تحصيلي
الشروط تمام معاي بس ناقصتني درجتين تحصيلي !!! جايب ٧٨ !!
وشكلي والله اعلم طالع علي حسابي الخاص
بس الي اسمعه ان الاتحاق يطول ومااعرف كيف
المهم ان شاء الله الاخوان يساعدونا انا محتار بين كذه دوله من بينها بولندا

متاكد انت المرحلة السابعة طالبين 80 معقول

يب متاكد ادخل الموقع ترى قريب حدثو الشروط بس الله يعين

بليز هات لي الرابط والله خوفتني 80 ياويل حالي هههههههههه

الله يعين قبل امس اختبرت يالله يارب انها 80

وعليكم السلآم

انا بقول لك كل اللي أعرفه وانشالله أقدر أفيدك..

أول شي الله يوفقك وتجيب الشروط المطلوبه وتبتعث بدل مآتروح على حسابك.. وصح كلآمكم الدفعه السابعه تتطلب 80 وفوق بالقدرات والتحصيلي.. الله يعينكم من جد



بالنسبه لرسوم الجامعه مدري اي جامعه انت تبغى بالضبط.. بعطيك الجامعات بالترتيب حسب الأفضليه على ماسمعت من الطلاب والشعب نفسه.. عندك جامعة وارسوا " العاصمه " هذي معروفه انها أفضل جامعه ببولندا بس طبعآ دراستها صعبه.. وبعدها تجي جامعة فروتسواف هذي بعد مستواها حلوو واقل صعوبه بشوي وغير كذا في جامعة قدانسك بعد حلوه وبعدها لوبلين..

الرسوم بعطيك رسوم جامعة وارسوا بعدين تقدر تعرف رسوم كل جامعه من موقعها ع النت.. بالنسبة للسنه الأولى طب تكلف 11 ألف مية يورو = 55 ألف و 500 ريال

" اليورو = 5 ريال ، الزلوتي = 1 ونص ريال "

ومعرف شي عن سكن الجامعه.. اذا بتآخذ شقه بغرفه وحده بالعاصمه أجارها يكون بين 1800 الى 2600 زلوتي يعني 2700 الى 3900 ريال بالشهر..

والمعيشه للشهر.. أكل وشرب بين 2250 الى 3000 ريال بدون ترف يعني بالمعقول

اما أشياء ثانيه تحتاجها مستلزمات وكذا حوالي ألف ريال..




اما بولندا كـ بلد العيشه فيها مرره حلوه ترتاح فيها.. العنصريه فيها قليله جدآ.. والشعب متساعد بس آنتبه تروح لشآيب وتسئله اذا يتكلم آنجليش او لا .. يعصبون يآخذونها على أنك تستهزئ فيهم لأن نآدر ماتلآقي شآيب ويتكلم اللغه..
والدراسه بعد حلوه وماهي معقده مرره ..

الأنضمام للأبتعاث.. انا اللي أشوف هنا الدارسين على حسابهم يجون دآيم بقبول معهد لغه يدرسون اللغه وأول مايبدون الدراسه يسجلون بالملحقيه انهم طلاب هنا وبعدين يقدمون طلب تحويلهم مبتعثين..

والتحويل يآخذ تقريبآ نصف سنه هذا لو أكثرت الطلب عليهم وبينت لهم اهتمامك اما لو قدمت الطلب ونسيته يمكن ياخذ حول السنه..

مدري اذا في أمكانيه انك تجي وتدرس على طول بالجامعه لأنه اللي أسمعه بس ماني متأكده من صحة هالكلآم انه لآزم تجي وتدرس لغه قبل ماتدرس بالجامعه ومنها تقدم على تحويلك لـ مبتعث.. وتقدر تشوف بموقع الوزاره شروط التحويل

هذا رابط فيه كل شي عن الدارسين على حسابهم

http://www.mohe.gov.sa/ar/studyaboard/Policies-and-Rules/Scholars-At-Their-Own/Pages/default.aspx



الطب في بولندا كله 7 سنوات ومافيها سنه تحضيريه

بس اذا انت تبغى سنه تحضيريه في جامعات تنظم سنه تحضيريه للطب..

الأختبار اللي تطلبه الجامعات هنا هو الآيلتس وبما انه ماعندك يصير لآزم تدرس لغه أول ماتجي وبعد ماتخلص سنة اللغه تختبر الآيلتس عشان تقدم ع الجامعه وتدرس سنه أولى طب على طول..

بما ان مستواك فوق المتوسط يعني مع سنة اللغه أكيد رح تقدر تجتاز الأختبار وأتوقع انه مع سنة اللغه يعطونك كورس تدريب على الأختبار يعني انشالله رح تجتازه..

أتمنى أكون أفدتك
وأي أسئله ثانيه تفضل ..

فروتسراف باي مدينه وقدانسك ولوبين ؟؟؟ وكل جامعه قولي وين تقع شمال بولندا ولا جنوب ؟؟ وكيف السعوديين بكل جامعه هل هم بكثره ؟

انت بأي جامعه وبأي سنه ؟

الملحقيه لازم يكون معي قبول جامعي عشان انضم وانا بمرحله اللغه للابتعاث ؟؟

وكيف اتعامل مع الشعب هل انت تواجهون صعوبه ؟

اقدر اخلي احد يستقبلني بالمطار ؟

كيف افتح ملف للالحاق بالابتعاث عن طريق النت ؟

فروتسواف وقدآنسك ولوبلين هذي أسماء جامعات على أسم المدينه اللي فيها الجامعه..

مدينة فروتسواف هذي بجنوب غرب بولندا.. بالنسبه لي أشوفها ثاني أحلى مدينه بعد العاصمه.. يعني تجي بعد العاصمه بالكبر.. الشعب متطور وتلقى ناس كثير تتكلم أنجليزي والمدينه متحضره وحلوه.. والمواصلات " الباصات والترامات " فيها متطوره زي بالعاصمه.. وتبعد عن العاصمه بين 5-7 ساعات بالقطار..

مدينة قدآنسك بأقصى الشمال.. مشهوره بالبحر اللي عندها هذا أحلى شي فيها.. انا صراحه ماشفت المدينه شخصيآ لآكن هذا اللي سمعت عنها من اللي يدرسون فيها.. اما المواصلات مدري بس سمعت انها مو متوفره بكثره زي بالعاصمه.. وتبعد عن العاصمه 5 ساعات بالقطار..

مدينة لوبلين بالشرق ومرره قريبه من العاصمه حول سعه ونص او ساعتين.. مدينه صغيره بس مريحه يعني مافيها رجة العاصمه..

اما تجمع الطلاب أكثر شي بـ جآمعة لوبلين فيها الطلاب بكثره وكلهم يدرسون بالسنه الأولى الحين بما انهم أول دفعه سعوديه بالجامعه وحتى ان الجامعه سوت برنامج سعودي للطلبه السعوديين يعني اي طالب سعودي يسجل فيها يخلونه يدرس مع باقي الطلاب السعوديين في قروب خاص فيهم مثل ماهو في برنامج أمريكي وبرنامج آسيوي.. وسبب كثرة الطلاب فيها أول شي ان الطلاب واجهوا مشاكل السنه الماضيه وتقفل التسجيل بأغلب الجامعات وأغلبية الطلاب ماسجلوا وكانت هالجامعه هي الوحيده اللي فاتح تسجيلها راح كل الشعب سجل فيها.. وغير كذا دراسة الجامعه سهله شوي يعني ماهي مثل صعوبة جامعة وارسوا وقبولها سهل مافيها اختبار قبول بس تتطلب درجة 5.5 بالآيلتس.. وغير كذا انها أقرب شي للعاصمه فـ الأغلبيه يبغونها وطبعآ طلاب هالسنه سجلوا فيها كثير بس عشان فيها نسبه كبيره من طلاب السنه الماضيه.. والتسجيل فيها لحد الحين مفتوح..

وغير كذا جامعة وارسوا بعد فيها طلاب سعوديين كثار بكل المراحل بس الجامعه صعبه وقبولها يتطلب انك تعدي اختبار قبول ومعروف عن أساتذتها أنهم شديدين وبعضهم فيهم عنصريه فـ مو كثير اللي يبغونها لهالسبب بس الحلوو فيها أنها أقوى جامعه.. بس التسجيل فيها للسنه الجديده قفل للأسف..

وجامعة فروتسواف فيها بعد طلاب بس مو مره كثير مدري والله كم بس أعتقد بوارسوا أكثر.. بس الأساتذه فيها مرره أحسن وتعاملهم أحلى ومافيهم عنصريه..

قدآنسك بعد فيها طلاب بس كلهم أتوقع من طلاب السنه الماضيه حول عشرين طالب تقريبآ.. ومعرف شي عن نظام الجامعه أو المدرسين..

وفي بعد عندك جامعة أولشتين في مدينة أولشتين بس هذي مره ما أنصحك فيها كـ مدينه.. هذي هي المدينه اللي حطوا فيها جميع طلاب السنه الماضيه يدرسون اللغه والمدينه صغيره وشعبها مرره مو متحضر فـ واجهوا الطلاب مشاكل كثيييييره مع الشعب سرقات وتحرشات لأن ماعندهم أجانب أبدآ وبعدين منتشر عندهم عن السعودي أنه مرره غني وهم شعب فقير.. بس كـ جامعه الجامعه ارتفع مستواها مره هالسنه وهم يبغون يرفعون من مستوى الجامعه أكثرر وزادوها صعوبه بس اللي أعرفه من طلاب السنه الماضيه مافيها غير حوالي 6 طلاب بس !! وهم أول دفع سعوديه للجامعه..

انا صراحه للحين مابديت بدراسة الطب المفروض اني أبدى السنه الماضيه بس واجهتني مشاكل مثل أغلب الطلبه واضطريت آخذ سنه تحضيريه في جامعة وارسوا وطبعآ الجامعه اصلآ ماتسوي سنه تحضيريه بس الملحقيه طلبت منهم ينضمون برنامج لنا لأنه كان في طلاب كثير مالهم جامعات وتوهقوا.. نظمت لنا الجامعه سنه تحضيريه ودرسونا بالبدايه كنا 13 طالب وبعدين كل شي زدنا طلع في غيرنا متوهقين بس مادروا عن سالفة السنه التحضيريه وغير كذا جوا يدرسون معنا الدارسين على حسابهم..


ولما تكون بمرحلة اللغه مو شرط أنه يكون عندك قبول جامعه عشان تنضم للبعثه مدري لو الأمور تغيرت بس عادي انت لاجيت هنا تسئل وبتعرف أكيد بيكون فيه طلاب كثير نفس وضعك..

اما الشعب البولندي شعب مرره متعاون من جد وبعدين ينبسطوون مرره ع العرب يحبونهم أكيد بتلآقي بعض المضايقات بس الأغلبيه بيكونون متساعدين.. بس نصيحه عشان تبعد عن المشاكل لا ترجع بالليل متأخر لأنه عندهم شي غبي بس تبدى الدنيا تظلم ماتلاقي عوايل كلهم راحوا بيوتهم وبس في شباب ويبدون لك بالشرب وتقوم المشاكل بالذات لو كنت تمشي لحالك يشوفونك أجنبي وعلى طول يتحرشون.. فـ الأفضل تقعد مثلآ لحد العشآ وترجع بس ماتطول او تسهر بره.. ع الأقل حد ماتتعود ع البلد..
وطبعآ ببتفاجأ ان البلد أصلآ مافيها نسبه كبيره يتكلمون أنجليش بس الشباب اللي يتكلمون تقريبآ لأن الشياب حقينهم كلهم متعلمين اما ألماني أو روسي والبلد عندهم الشياب بكثره بتشوفهم تحس أن شيابهم أكثر من شبابهم..
وبس مافي صعوبات بالتعامل معاهم الحمدلله ماعدى بعض الأحيان نتوهق لاجينا نتفاهم مع شخص مايفهم ولا كلمه انجليش..


الأستقبال بالمطار.. السنه الماضيه كان عندنا الأستاذ عبدالقادر الكردي كان هو مسؤول الطلاب وكان مدبر كل أمورنا بس شالوه ولا جابوا لنا واحد غيره ووقتها من جد تبهذلنا.. مافي الا المشرفين الدراسيين بس مايفيدونك بهالشي.. تقدر تكلم المعهد اللي رح تآخذ قبول منه وتعطيهم الوقت اللي رح توصل فيه وهم أكيد رح يستقبلونك..
حتى لو مالقيت من يستقبلك انت طبعآ رح تكون حاجز الفندق قبل ماتجي هنا خلاص توصل ومعك الحجز وعنوان الفندق عند المطار رح تلقى وش كثر التكاسي خذ لك تاكسي وتعطيه العنوان وبيوصلك على طول..
بس أول ماتوصل لازم تشوف لك مكتب عقار وتبدى تدور لك على شقه مناسبه عشان تنقل بسرعه بدل ماتطير فلوسك على الفندق.. وفي مكاتب عقار يتعاملون معها أغلب الطلبه اذا تبغى..

اما كيف تفتح ملف هذي معرف عنها أي شي لأنه أول ماوصلنا كان عندنا الأستاذ عبدالقادر وهو دبونا بكل شي وسوا لنا كل شي وحنا ماندري هو وش سوى :/
تقدر تسئل اي طالب جاي على حسابه اذا تعرف أحد مدري هم كيف فتحوه..

وبالتوفييييق