افضل جامعة في تخصص الهندسة الكهربائية ؟؟ بلييز ؟؟

أخوي أفضل جامعات العالم مستحيل تنقبل فيها إذا كنت ما تعرف عنها ولا إسمها..
آلاف الناس غيرك حلمهم دخول الجامعات هذي ومخططين لسنوات كيف يحصلون قبول فيها.
أيضا القبول في هالجامعات صعب جدا وتنافسي بشكل خرافي، يعني مثلا عندك MIT ينقبل فيها 150 من 3000 طالب. أيضا ممكن يركزون على أشياء أنت مستحيل تفكر فيها (مثلا النشاطات الإجتماعية والهوايات)، يكفيك تعرف واحد من أصدقائي راح يقدم على MIT يقول الأفريج في التوفل 120!! وأيضا سمعت أن الأفريج في ال GRE هو فل مارك. يعني أنت قوي وما شاء الله عليك بس فيه مليون واحد زيك وكلهم مقدمين على نفس الجامعة..


طبعا أفضل جامعات العالم في الهندسة الكهربائية وفي معظم -إن لم يكن كل- فروع الهندسة هي MIT>> كثير من أصدقائي مستعدين يجلسون سنوات على أساس يأخذون قبول في هالجامعة، طبعا MIT موجود في كامبريدج في بوسطن.
بعدها عندك جامعة ستانفورد في كاليفورنيا قريبة من سان فرانسيسكو، جامعة مشهورة جدا على مستوى العالم ومن أقوى الجامعات في الهندسة..
أيضا عندك جامعة كاليفورنيا في بيركلي جامعة قوية ومشهورة جدا.لكن سمعت أن مشكلتها هي أن مدينة بيركلي غالييية جدا جدا، وما تنطاق.
عندك جامعة ميتشيغان في آن آربور في ميشغان.أعرف ناس كثير فيها وهي من أفضل الجامعات في العالم، وتتميز أنها موجودة في مدينة جامعية كثير من سكانها أجانب ومثقفين.
عندك أيضا كالتيك في باسيدينا في كاليفورنيا.لكن سمعت من بعض أصدقائي أن ما فيه ولا سعودي إنقبل فيها.
عندك جامعة كارنيجي ميلون في بتسبرغ جامعة قوية جدا ومشهورة.
أيضا عندك جورجيا تك في أتلانتا جامعة مشهورة في الهندسة..

عموما في أمريكا -على ما أعرف- يعتمدون تقييم USNEWS لتقييم الجامعات حسب التخصصات وممكن تطلع على أفضل الجامعات من هذا الرابط.

طبعا لازم تعرف أن ما فيه شي مستحيل، وأنك إذا كنت تستاهل وكان عندك اصرار راح تحصل اللي تبي، لكن لازم تعرف أن فيه جامعات قبولها أصعب من جامعات ثانية، وهذا ما يعني أنها أفضل، ولكن ممكن يكون عندها اعتبارات ثانية، يعني مثلا أنا أدرس هندسة اتصالات وإلكترونيات في جامعة الملك سعود، وحسب كلام أصدقائي اللي تخرجوا من الجامعة فإن الحصول على قبول ماستر (بالنسبة لخريجي هذا القسم من هذه الجامعة) في جامعتي University of Michigan (Ann Arbor) أو جامعة Carnigie Millon مضمون بمجرد ما تكون جايب معدل طيب و قدرت تجيب درجات عالية في GRE و TOFEL، ليه؟!! لأن كثير من طلاب الملك سعود درسوا في هالجامعتين وتخرجوا منهم بتفوق، و الجامعتين عارفة مخرجات جامعة الملك سعود (العام الماضي جاء عندنا عميد كلية الهندسة في جامعة ميتشيغان يتكلم عن الكلية وعن خططها وعن القبول فيها)، طبعا لو كنت مصر ممكن تنقبل في أي جامعة ثانية (أعرف طالبين من قسمي يدرسون حاليا ماستر في ستانفورد)، لكن القبول فيها أصعب من الجامعات اللي عارفتك..


طبعا المعلومات اللي فوق ممكن يكون فيها أخطاء كثييرة، لأني ما زلت طالب في الرياض، وممكن جدا أكون سمعت معلومة وما ضبطتها صح.
لوتبي عندي مواقع فيها تركات للحصول على قبول في مثل هالجامعات..