تجمع طلاب وطالبات الرياضيات

عادي يأخوية تقدر تدرس التخصص دا ماعندك أي مشكلة , بس للمعلومية أي تخصص في التعليم (education)شروط القبول فيه بصراحة مرة صعبة , يعني أكيد حيشترطوا عليك GRE والتوفل يكون في حدود 90 وممكن 100 (حسب ماشفت بنفسي) غير كدا كمانة الدراسة لا يغرك بتكون أصعب
لأنك بتدرس رياضيات وأيضا حتكون عندك رسالة بحث وأيضا في إحتمالية كبيرة إنك تدرس طلاب بكاوريوس في الجامعة نفسها وأكتر من مرة

أنا بصراحة أشوف هادي كلها كتيرة وماتستاهل التعب دا كلو , ترا لو تتخصص في الرياضات نفسها يكون أسهل بكتير
طبعا هادا رأيي إنتا كمانة أبحث وشوف وأستشير غيري والله يوفقك

الله يوفقك ويكتبلك الخير
شكلك لسع ماطلعتي أمريكا ومنتي دارية عن الطبخة خخخخخخخخخ

أولا GMAT هادا خاص لطلاب البيزنس, وGRE هادا لعموم التخصصات , هادا إختبار زي التحصيلي إلي في السعودية (طبعا إختبار تاني غير اللغة) , وهوا خاص لطلاب الماجستير فقط, وأغلب الجامعات تشترط إنك تدخل الإختبار دا وتجيب درجة معينة عشين تصير مقبول عندهم (الإختبار قسمين قسمي لغوي وقسم مسائل حسابية عن الرياضيات)
للمعلومية هادا الإختبار جدا صعب بشهادة الأمريكان نفسهم والمدرسين إلي كلموني عنهم . حتى الأمريكان بعضهم مايقدر يجيب الدرجة المطلوبة حتى في القسم اللغوي
أغلب الجامعات تشترط الإختبار دا عشين تنقبل عندهم , وقليل جدا تقبلك عادي بدون الإختبار دا (اطلعي على موضوعي عشين تشوفي الجامعات إلي تقبلك بدون GRE)

بالنسبة للتخصصات عندك طرق تدريس رياضيات , رياضيات بحتة , رياضيات مالية , رياضيات تطبيقية
طبعا كلها تنفع للقطاع العام في التدريس بجامعات , رياضيات مالية ممكن تساعدك أيضا في القطاع الخاص وقطاع البنوك أيضا

بالتوفيق

طيب اخوي زعفور، وش مسمى تخصص طرق تدريس الرياضيات بالإنجليزي، ووش أسهل الجامعات اللي تقبل التخصص هذا و يكون القبول فيها ميسر و سهل، وياليت تكون الولاية مناسبة واسعارها مو غالية.و شاكر لك جهودك و اهتمامكو اتمنى لك التوفيق.

الله وش ذا كله صراحه اول مره اعرف هالمعلومات ربي يسعدك
شكللي يارياضيات ماليه او تطبيقيه او محاسبه مدري ليه داخله بمخي



طيب سؤال مو الوزارة هي الي تختار الجامعه سواء فيها GRE او اقدر اغير عادي لجامعه مافيها GRE

طبعا المسمى يختلف بعض الأحيان من جامعة لأخرى لكن عموما زي كدا
Mathematics in Education
دايما تحصلها تحت قسم الـ Education وأغلب الجامعات حسب شفت مداك تتخصص تعليم أطفال إبتدائي مثلا
أو متوسطة أو ثانوي , يعني تكون خبير في تدريس فئة معينة من الطلاب

بصراحة عشين ماكنت مهتم في طرق تدريس الرياضيات مااتطلعت على شروطهم وكيفية القبولات فيها
أعذرني في هادي

بالتوفيق يارب

طبعا الملحقية مالها دخل في الجامعة إلي نحنا نختارها (على الأقل ماتكون موقفة عندهم أو ماهي معترف فيها)
إنتي تختاري الجامعة إلي تبغيها سواء تعتمد GRE أو لا , إشبك لأنو في جامعات قوية تطلب الإختبار GRE من كل الأقسام ما عدا الرياضيات أو ممكن تطلبها من الرياضيات وما تطلبها في الفيزياء , فالموضوع عادي أختاري والله يوفقك
(طبعا الجامعات في اللستة حقتي فوق كلها معتمدة من الملحقية ومعترف بيها)

الله يسهل ويوفق

السلام عليكم واسعد الله صباحكم بكل خير واخص بالشكر زعفور_145 وmr math الله يوفقكم ويسعدكم يااااارب
اتمنى انكم تفيدوني انا بكالريوس رياضيات وابغى الماستر تقنيه حيويه او مختبرات لاني احب الاستكشاف بالمعامل والبحوثات يعني مااحب النظري ومستعده اني ادرس مواد اضافيه فهل يقبلوا بها او لا

ولكم شكري وتقديري

الله يسعدك ويوفقك يارب
بالنسبة لحالتك إنك بتغيري تخصصك , هوا عادي في جامعات (لكن مو كتير) ممكن تقبلك في تخصصات غير الإمتداد للبكالوريوس , لكن حطي في بالك الملاحظات هادي:
1. لو الجامعة قبلتك بتخصص تاني غير الرياضيات , راح يعطوكي مواد من البكاوريوس عشين تدرسيها وتفهمي الطبخة إلي بتصير في الماجستير , طبعا انا مابأتكلم عن مادة إثنين أو ممكن 3, أتوقع أقل شي بيكون 6أو 7.
2. خلينا نقول إنتي مرة متحمسة وموافقة أوك, لكن أحسها بصراحة حرام وكبيرة من الكبائر بالنسبالي إنك تضيعي سنة ونص من دراستك عشين بس تبدأي في دراسة الماجستير. يعني بعد سنة أو سنة ونص دوبك تبدأي في الماجستير , بصراحة أحسو مضيعة وقت. غير إنك ممكن في سنة ونص بس تكوني مآخدة الماجستير في الرياضيات!!
3. الشي التاني ممكن الملحقية ماتوفقلك تغيري التخصص. يالله نقول جات منهم وغيروا تخصصك , طيب إش تسوي في المدة حقت الإبتعاث. إذا لغة سنة , وسنة بالكتير قولي حقت المواد الإضافية(لو إنك شاطرة وعديتيها كلها بـ B من أول مرة). تبقالك سنة وحدة بس للماجستير!! بصراحة مرة مو كافية!!

انا مو قصدي أحطمك أو شي , لكن الواحد كدا المفروض يحسبها يمين ويسار , ويفكر بالمستقبل قبل يتخد قراروا
والرأي رأيك

الله يوفقك

السلام عليكم

أنا صراحة اول مره اكتب

أنا خلصت بكلريوس الحمد لله رياضيات معدل 4.65 من 5 (( ما شااااء الله ))

انا مره محتاره لأنه
1- أبغى اعرف اش اسوي عشان ادرس برا ؟؟
2- اش احسن الجامعات في التخصص ؟؟
3- اش اسوي من الألف الى الياء .. سنه لغه (( وفين )) وبعدين الماجستير
وهل اللغه في نفس الجامعة او مثلا في نفس المدينه ولا كيف ؟؟
4- اش افضل الدول و(( المدن )) للسكن لأني مستحيل اشيل حجابي (( حتى الغطوه ))؟؟
امريكا - بريطانيا - كندا - استراليا -..... الخ
5- زوجي وبنتي بيروحوا معايا هل ممكن زوجي ياخذ قبول في معهد أو شي كذا قبل ما أروح ..
6- انا ابغى اتوظف في الجامعة اش افضل التخصصات .. ولا لا أشغل بالي فيها الحين
7- اللغة .. هل آخذ دورات هنا .. ولا تمشي الحياة وتكفيني السنه هذي لأني شايله هم لغتي مش مره بقدر اقول كم جمله بس صعب افهم اللي يتكلم معايا


أعرف طولت بالأسئله بس مررره محتاره

ارجوكم طمنوني

السلااااااااااام عليكم جميعا
موضوع رائع وتجمع اروع

اختي ام اروى لا يفوتك التسجيل للابتعاث الخارجي يبدا قريب انتبهي عليه واذا تم قبول ان شاء الله ترا الحكومه تعطي زوجك سنه لغه على حسابها بس انتي للتسهيل تجيبي له قبول قبل لا تروحي يعني قبل لا تسافري طبعا انتي تشوفي وين تبغي تروحي اي دوله وعلى اساسها تختاري المدينه ثم الجامعه واذا لغتك زينه ادرسي بمعهد الجامعه واذا تحسي انوا لا يبغالك اكثر ادرسي جنرال في اي معهد خاص ثم ادخلي الجامعه
اذا حددتي الدوله اللي بتدرسي فيها اقري عنها بالمنتديات واسالي عنها يعني صراحه صعبه نقول افضل المدن في كل الدول اللي ذكرتيها

بالنسبه للحجاب تراه سهل جدا انا امشي بعباتي السودا وغطوتي عاااااااااااااااااااادي جدا ( الواحد يتوكل على الله)
الله يسهلك ان شاء الله