تخصصك رياضيات؟؟ تبغا جامعات بدون GRE؟؟ طيب أتفضل عندنا..

هادي البوابة الرئيسية للجامعة



أحد ممرات الجامعة الرائعة



أحد أماكن الجلسات الجميلة المتوفرة في جميع أرجاء الجامعة




هادا التمثال في منتصف الجامعة




مساحة خضراء جميلة , الطلاب دايما يلعبوا هنا









أحد المناظر الخلابة المطلة على نيويورك ونهر الهيدسون << متعود دايما جلس هنا , أي واحد يبغاني دايما يجي يحصلني هنا







هادي المنطقة الأقدم في الجامعة , المنطقة عموما تسمى بالقلعة , وهنا بالتمام كانت قلعة Steven's وهوا نفسوا الرجال إلي أنشأ الجامعة , وسميت بإسمه
طبعا منظرا خرافي برضوا دايما أجي أجلس هنا أشم هوا وأغير جو




ملعب الجامعة , وللمعلومية كل جامعة لها إسم حيوان تسمي بيها إسم فريقها الرسمي , ونحنا البط خخخخخخ
Ducks

تابع >>>>>>>>>>>>>>
>>>>>>>>>>>>>>>
>>>>>>>>>>>>>
>>>>>>>>>>>

هادا أقدم مبنى موجود بالجامعة , ومن أجملها




هادا مبنى قسم الرياضيات




هادا المبنى فيه كل المكاتب وألأمور الإدارية , وفيه كمان الكافتيريا , طبعا الكفتيريا نظام بوفيه مفتوح , بـ 7.75 وأكل مفتوح بصراحة يحبو قلبك , في أقسام متنوعة وكتيرة ( حلويات - مكرونات - سندوتشات - عصيرات ومشروبات ساخنة - قسم الإفطار - قسم البيتزا - قسم اللحوم والدجاج - قسم السلطات والخضروات - غير فواكه وحلويات ) وطبعا كل يوم شي مختلف عن اليوم إلي قبلوا , بصراحة شي مرة حلوة , والأكل محترم وعلى أعلى مستوى من النظافة والترتيب والجودة




أحد مباني الجامعة




مبنى تصميموا حضاري وجدا رائع , الواجهة كلها زجاج عشين تكشف على النهر وعلى نيويورك (لو تشوفوا مباني نيويورك , هناك كانوا التوأمين)



منظر من الجامعة ممكن تشوف الإمباير ستيت



الصالة الرياضية في الجامعة كبيرة وحلوة ومختلف الأنشطة والألعاب فيها




بعض المباني حق الأقسام والمحاضرات




مدخل المكتبة الجامعية , في هادا المحل أقضي أغلب وقتي مذاكرة , واجبات , فيس بوك , أكلم ماما .... D:



أتمنى تكون الصور عجبتكم

ما شاء الله طرازات معمارية راقية
الله يوفقك ان شاء الله وجميع المسلمين

صور اكثر من رائعه

هلا وغلا زعفووور .. وش اخباارك زمااان عنك

كيفك وكيييف دراااستك..طمنا عنك ويعطيك العاافيه ع التقرير الراائع عن الجاامعه

صوور مرره رااائعه..بغيت اسالك هل تنصحني اني ادرس مااستر بنفس جاامعتك؟؟

وش اسم المعهد اللي درست فيه ووينه؟؟

هاليومين قااعده انتظر يجيني قبول اللغه وابي اشووف ايش المعهد والجاامعه الافضل لتخصصي

فايش نصيحتك لي..؟

اي واللهـ


مبطي يا زعفوور ما عطتنا اخبار ؟

عندي استفسار .. الحين مطلوب منك رسالة للماجستير ؟
طيب الحين مثلآ مادة على سبيل المثال تحليل حقيقي

كيف طريقة التقييم ؟ نعرف بالجامعة اختبار دوري ومشاركة و 60 نهائي

عندكم كيف طريقة التقييم

وعطنااا جديدك .. مواقف .. اختبارات .. صعوبات

بالتوفيق

آمين يارب ويوفقك يارب ويسعدك
شاكر مرورك
إنتا الرائع بتعليقك شكرا لك

أهلين أختي نجلاء , الحمد لله الأمور طيبة هنا , عاد أدعولنا الدراسة ماهي هينة والله يعين
بصراحة جامعتي بالمرة حلوة ومافيها عيب واحد , والبرنامج حق الدراسة مرة حلو , البيئة كمانة تساعد , الناس هنا مرة طيبين , أكيد أنصحك تجي هنا , لكن برضوا الواحد مايدري في يكون نصيبوا , ممكن الواحد يحصل جامعة أحسن من هادي وأسهل منها مدري , عاد أنا خبرتي في هادي الجامعة والمدينة

أنا درست اللغة في University of Colorado at Boulder , بصراحة مدينة وولاية ولا أروع , أتمنيت أجلس فيها وأكمل الماجستير لكن ربنا ماكتبلنا

ربنا يوفقك إنشاء الله ويكتبلك الخير في أحسن ولاية وأحسن معهد , عاد إنتي حيجيكي قبول اللغة أول , أنصحك تركزي في اللغة وما تفكري نهائيا في الجامعات وقبولاتها للماجستير غير بعد 6 شهور على الأقل. خلي تركيزيك في تطوير لغتك بعدين أبدأ في الجامعات (عاد وكل شي جاهز هنا , عندك الجامعات السهلة والقبولات البسيطة جاتك على صحن من دهب )
ربنا يوفقك
هلا بالغالي رداوي كيفك إش أخبارك , إيه والله على قولة أهل الرياض مبطين شوية العذر والسموحة
الجامعة حقتي (رجعنا لهرج أهل مكة ) ماتطلب مني رسالة ماجستير , الجدول 10 مواد وبمجموع 30 نقطة وتتخرج من الجامعة , طبعا أهم شي تجيب 30 نقطة ولو أخدت 20 مادة .

طريقة التقييم تختلف من دكتور لآخر , في دكتورين قالولنا حيعطونا Take Home exam يعني يعطونا الأسئلة النهائية تقريبا من 4 - 6 أسئلة نحلها في مدة أسبوع بعدين نرجعها لهم , ويكون كمانة على الواجبات نسبة في التقييم النهائي , في دكتور أعطانا إختبار نصفي وحيعطينا كمان إختبار نهائي , أصحابي في تخصصات تانية , ماعندهم لا إختبار نصفي ولا نهائي , بس تسويلهم رسالة بحث ومشروع للمادة وصلى الله على محمد.

مواقفنا وحكاوينا كتيرة , بعضها حلو وبعضها لا , بعضها يحفز فيني , وبعضها يحبط فيني , أخاف أصارحكم بالأشياء إلي بأمر فيها ساعتها تقولوا هادا زعفور حبطنا وخلانا مهمومين والكلام دا , بس الله كريم , الواحد يتوكل على الله ويبذل إلي يقدر عليه وفي الأول والأخير التوفيق من ربك
الله يكتبلنا الخير يارب ويسعدك ويوفقك

وكل عام وإنتوا بخير << عيدين أضحى وعيدين فطر بعيد عن أهلوا , نصيحة محب أستمعتوا بكل لحظة مع أهلكم , راح يجي اليوم إلي تشتهوا فيه ريحة أمكم وحضنها وزعيقها وصياحها ومقاضيها وكل شي

مشكوور يااازعفوور ع تعاوونك معنا .. وعيدك مبارك وعسى اياامك تباارك

الله يووفقك ان شا الله وييسر اموورك وترجع للاهل بالشهااده ورفعة الراس .. وانت فعلا ما قصرت قدمت لنا افضل خدمه بموضوعك
الراائع جزيت خيراا علييه..

بس بغيت اسالك اذا عندك خبر ايش افضل الجامعات لدراسه ماستر الرياضيات بامريكا لاني ع هذا الاسااس باحدد خياراتي
وانا بحثت كثير ولا لقيت اجابه .. فاذا عندك معلومه لا تبخل علينا بها الله لا يهينك

ومررره ثاانيه يعطيك ع العااافيه ع تعااونك..دمت بحفظ الله

نجلاء..!

أهلين أختي نجلاء وشاكر كلامك الحلو والمحفز
بالنسبة لأفضل الجامعات هادي مليانة وكتير في أمريكا , أغلب الجامعات تشترط توفل 83 وإختبار الـ جي أر إي , لو أتوفرت فيكي الشرطين هادي , راح تعطيكي إمكانية كبيرة تدخلي في أحسن وأقوى الجامعات الأمريكية.

موضوعي هادا والجامعات في الصفحة الأولى , هيا أسهل الجامعات في القبولات , وهادا مو معناتو إنو الجامعات ضعيفة أو شي لا بالعكس , جامعة نيويورك من أقوى الجامعات على مستوى أمريكا ولها سمعتها , جامعتي جامعة ستيفينس تعتبر أول وأقوى جامعة في الهندسة , بس أنا وضعتها لتسهيل البحث ولسهولة قبولاتها وإعتقادي بسهولة البرنامج.