أبي رايكم وأنا أمكم ؟

هلا بالوالدة .. خخخخ

أمريكا من ناحية تعدد الجامعات أفضل .. ولهجتهم تقريبا هي السائدة في العالم .. والكل يفهم عليها
ما اظن فيه اختلاف بالدراسة .. لأن كل الجامعات المعتمدة من وزارة التعليم العالي .. جامعات قوية

لكن ::

بتفرق معه المعيشة كثير .. كندا بلد متعدد الاعراق .. اي نعم لن يجد العنصرية .. لكن كثرة الاعراق تعني كثرة اللغات واللهجات
مما يعني تعلم اللغة بصعوبة شوي

أمريكا بلد تلقين فيه النون وما يعلمون .. يعنيكل شيء خاطرة فيه بيلقاه .. ويقدر يغير المدينة والجامعة اذا ما عجبته

لكن كندا جامعات محددة .. ويمكن تخصصه ما يلقاه بسهولة في جامعة ثانية .. واذا لقاه يمكن تكون الجامعة مو معتمدة من وزارة التعليم العالي

أما امريكا من ناحية الدراسة + الحياة والمعيشة + المصاريف و الاسعار

تتفوق على جميع الدول كندا وبريطانيا ونيوزلندا واستراليا وكل الدول

لأن هي الدولة الوحيدة التي تجمع كل هالصفات التي تسهل الحياة في المدينة

ملاحظة ::

لو ارتاح الشخص بالمعيشة راح يعطي أفضل بالدراسة حتى لو كانت أصعب جامعات العالم
اما لو كان مو مرتاح .. لن يتقدم خطوة في الدراسة أبدا

شكرا

قل أمين ياوليدي جعل ربي يسهل امورك وينجحك وتطلع الاول يارب العالمين الله يسعدك ويردك لامك رافع راسها بشهادتك وعلمك شكرا لك ياوليدي اللي جبرت بخاطري وأنا أمك


مازالت أمكم تحتريكم لاتبطون علي بالردود ....

الله يسمع منك ويسهل لولدك ان شاء الله

نقطة بضيفها :: كندا جوها لا يطاق في الشتاء ..

بانتظار باقي الاعضاء

هلا بالغاليه

انصحه على طوووول يروح لامريكا ولاتخافين ترى الامور هنا الحمد لله تحسنت كثير

وبعدين فيه نقطه مهمه جدا

اذا ناوي يدرس على حسابه الخاص لازم يختار امريكا لان امريكا باب الالحاق فيها مفتوح ان شاء الله في البعثه

بس اذا كان طالع على حساب الحكومه فما عليه خوف من سالفه الالحاق في البعثه يعني بيطلع على حساب الحكومه وهو مرتاح

لذلك انصحك انه يختار الولايات الجيده في امريكا والامنه

ونسأل الله لنا ولكم التوفيق ان شاء الله ،،،

هلا بوليدي سعود عسى ربي يسعد قلبك بالايمان وطاعة الرحمن تسلم على الرد المطمن لكن ياليتك وأنا أمك علمتني وشي الاولايات الجيدة والامنه ( امنك ربي عن كل شر ) ياطيب ....

حبيبتي دامه وده بامريكا توكلوا على الله

كندا قبولها صعب ودراستها بعد صعبة مرة ,

القبول مطلوب درجة بالتوفل حوالي 90 وهذي درجة مو سهله ابد.

بينما امريكا تطلب مابين 61- 68 للبكالوريوس بهالحدود
وبعض الجامعات اذا درستي بمعهدهم يعفيك من اختبار التوفل.


امريكا اسهل بكل النواحي . بعدين امريكا قارة ممكن تلاقي فيها كل اللي تبغينه .. مناطق دافية مناطق باردة مناطق سياحية او مناطق رخيصة ..... الخ

وشي اخير السعوديين ماشالله في كل مكان صاروا يعني ماراح يضيع لا تخافين ,, والشعب الامريكي فرندلي ومتعاون.


لو تقري في المنتدى عن الولايات ومميزاتها وتختارين الجامعة اللي تناسب تخصصه وتعطيه قبول مشروط
راح تستفيدين كثير من هالمنتدى ان شالله

واذا عندك استفسار عن جامعة معينة او ولاية معينة الاخوة مايقصرون


والله يوفقكم يارب

الله يسعد قلبك على هالدعوه ويجزاك خير ،،،

شوفي يالغاليه فيه مواضيع هنا مثبته للعديد من الاخوان عن جميع الولايات يعني ابد دوري على راحتك وبتشوفينها بالصور بعد
وامريكا قاااااره كبيره جدا

ومكونه من ثلاث اقسام
الولاايات الشرقيه <<< مثل فلوريدا وفرجينيا والاباما وغيرها
الولايات الوسطى<<<اوهايوا والينيوي وغيرها
الولايات الغربيه <<< مثل كاليفورنيا وغيرها بس

لذلك اهتمي اكثر شيء لما تختارون الولايه الى ثلاث نقاط مهمه
مستوى المعيشه
مستوى الامان
تعامل الشعب مع الاجانب هل هو جيد او لا

وعموما شعب امريكا طيب في الغالب ولكن عليك بالسؤال قبل لاتختارين الولايه والجامعه ولاتاخذين بنصيحه شخص واحد بس
خذي بنصيحه اكثر من واحد "

مثال/ انا واحد نصحني في الجامعه اللي انا فيها الان وخلاها بنظري جنه الله في ارضه من كل شيء
ويوم جيت هنا انصدمت لامطاعم ولا مساجد ولا اسواق ولاتكاسي ولاباصات ولا حدائق ولا يوجد الا الجامعه وسكن الجامعه لدرجه اني ماصرت مركز في دراستي من الطفش مافيها اي شيء الا انها ارض خضراء وبس ويوم اسأل الرجال لقيته حول الى كندا وهقني وطلع؟؟؟
عشان كذا طبعا انا جالس ادور لي قبول في جامعه ثانيه وفي ولايه ثانيه
عشان كذا نبهتك في الاختيار

وعسى الله ييسر اموركم ان شاء الله ،،،

والله انا اشوف كاليفورنيا وبس

الولاية الوحيدة اللي ما تطق تسبد الواحد بها .. يعني عيبها الغلاء عن باقي الولايات ..
بس مع الوقت الواحد يتعود ..

ولا من ناحية الامان .. هذا اهم شيء .. فهي آآمنة جدا والسكيورتي منتشر فيها بكثرة

ومن ناحية الجامعات من اقوى الجامعات بها

ومن ناحية جمال المدينة .. فهي مدينة توسع الصدر .. ما ودك تطلع منها ابد

ومن ناحية الشعب .. راقي جدا في تعاملة .. وحبوب مع الطلاب ويساعد الطلاب في التعلم بعد

بالمناسبة .. كاليفورنيا حلم بعض الامريكيين الوصول لها .. وهم امريكان .. لأنها ولاية تعد من أجمل الولايات بالعالم

وفيه ولايات جيدة للدراسة .. لكن لابد من ان ينقصها

مثل تكون الولاية عنصرية >>> يعني مشاكل الله يبعدنا عن المشاكل وعن هالولايات

او الولاية ما فيها شيء .. >> يعني بعد سنة بالكثير الواحد تطق تسبده من هالولاية

أو تكون الولاية نسبة الامان فيه مو ذاك الزود

أو تكون الولاية مليانة لراسها من السعوديين .. وهذي اللي من جد ابعدوا عنها

فأ انا اشوف كاليفورنيا وبسسس

مساء الخير يامنا

الله يسهل امورنا واموركم وامولد ويوفقه يارب


الشباب ما قصروا ووفو وكفو

واحب اضيف نقطه معينه

كندا مشهوره بالشهادات والتخصصات الطبيه فقط ,, يعني اذا ولدك بيدرس طب او شي له علاقه بالطب يتجه لكندا لكن تخصصات البزنس وغيره يتوجه لامريكا ,,,

وعسى الله يفرج عليه ويوفقه بالدنيا والآخره يارب

( انا ماشي لامريكا الجمعه الجايه ان شاء الله ,,

لا تنسينا من دعواتك الله يخليك


تحياتي