موظف بالاتصالات محتار ؟؟

أخوي بصراحه وضعك صعب

لانك موظف ومو اي وظيفه يعني رابتك حلو وشركه الاتصالات على حسب مااعرف ممتازه من ناحيه الراحه والمميزات

وغير كذا انت ماتضمن اذا رجعت ممكن تلقى وظيفه زي وظيفتك الاولى

حتى لو معك ماستر

فيه ناس اعرفهم رجعو بماستر حاسب آلي ولحد الحين مو لاقين وظايف

ماابغى احطمك بس انت احسبها

إذا رجعت وش بيكون وضعي ؟؟
وهل انا قادر اني استمر في الغربه؟؟
عيالي وش بيكون وضعهم؟؟
مثلا فيه احد معتمد عليك كليا زي مثلا امك ابوك ساكنين معك او انت ولدهم الوحيد؟؟
وش بيكون وضعهم لو رحت
ايش مجالات الوظايف اللي ابلقاها إذا رجعت؟؟
هل راتبي ممكن يكون اكثر عشره الاف على طول اول مااتوظف
هل وضعي بالشركه او الوظيفه الجديده زي وضعي بالاتصالات
لازم على الاقل يكون احسن من وضعك الحين

علشان يعني تسوى عليك المرمطه والغربه والوقت اللي ضيعته بالدراسه وبالغربه

انت احسبها وشوف

مع انه انا نصيحتي لك اخذ اجازه مرافق حتى لو كانت مو اكثر من سنه على الاقل خذ لغه وبعدين تكون جربت الوضع وعرفت هل انت قادر تكمل او لا
وفي نفس الوقت ماتلوم نفسك انه جتك الفرصه وانت ضيعتها

وتكون راجع بلغه ممكن تفيدك في شركه الاتصالات
لانه اللي اعرفه اللغه مرررره مهمه في قطاع الخاص


يعني الزبده لا تقرر الحين روح فتره تجريبيه سنه وبعدها قرر أهم شي لا ااااااا تستقيل

والله الغربه صعبه وبتمر عليك ايام تقول انا وش خلاني اترك وظيفتي وديرتي واهلي كنت مرتاح

وفي نفس الوقت حلو انه الواحد يستغل الفرص ويطور نفسه

بالتوفيق

والله حيرة اخوي ولاكن استخر الله وان شاء الله بيتيسر امرك

استخر الله وان شاء الله بيتيسر امرك

الله يكتب لك اللي فية الصالح

عليكم السلام ورحمه الله وبركاته ...
الله يسهل امورك اذا عندك رغبه وطموح توكل علي ربك وادرس الرزق بيد الله .انا كنت موظف في الخطوط السعوديه بس كانت رغبتي في الدراسه قويه وتركت الوظيفه عشان اكمل طموحي .اهم شي استخر ربك وشوف وانت وين تشوف نفسك بتوفيق

السلام عليكم الاخ أبو تركي
انا موظف ايضا في الاتصالات وجات لزوجتي بعثه في المرحله الخامسة انا محتاااااار مثلك لاكن انا الي اعرفه انه ما يعطوووووووون أكثر من 6 شهور اجازة بدون راتب ولازم ترجع تداوم بعدين تقدر تجدد 6 شهور ثانيه
لاكن انا اشوف انه ما تسافر البعثة أو تسافر تأخذ لغه وترجع يعني مشاء الله راتبك كويس وانت لو سافرت واخذت الماستر ما اتوقع انه راح يفيدك انا لو راتبي في الاتصالات 10000 ما كان فكرت في البعثه لاكن اذا تبي النصيحه انا اشوووووف انك تروح تأخذ للغه وتعيش التجربه وهذا القرااااار الاخير في يدك والله يوفقك ولا تنسى الاستخااااااارة
وانا بالنسبه لي انشاء الله سوف اسافر انا عندي دبلوووووم وناوي اخذ البكالريوس واذا شفت الاوضاع ما تناسب بأخذ للغه وارجع

أخوك الســـمـــو

مشكورين اخواني ماقصرتو يعطيكم العافية .. الله يسهل امر جدا محير

السـﻻم عليكم..

أخوي أبو تركي.. أنا كنت في نفس وضعك

ترددت كثيييييير وفكرت أسحب على البعثة وفي اﻷخير رحت لمبررات تخصني ، لكن ترى ما فيه أحد بيفهم وضعك مثلك أنت

- يعني هل الماجستير الي بتحصل عليها مطلوبة في السعودية؟ وﻻ بيقولون لك الشركات مانبيك أنت فوق الحاجة! وتراها صارت. وممكن تكون الخبرة + الدورات الي بتحصلها إذا ما سافرت أفضل لك عند الشركات من الشهادة.

- وش بتسوي لو رجعت السعودية مبسوط وﻻ لقيت وظيفة ؟ عندك بدائل؟ وين بتسكن فيه (أنا مثـﻻً ابسكن عند أهلي الله يخلي لي أبوي) ، من وين بتصرف لمدة يمكن توصل سنة أو أقل أو أكثر بدون وظيفة (افترض اﻷسوء)؟

وترى كلمة رح كمل وواصل مشوارك سهلة ، لكن الي يقولها مهب صاير معك إذا رجعت بعدين.

المقصد أنا ما أثبطك ، لكن أقول أدرس الموضوع زييييييييين ، ثم صل صـﻻة اﻻستخارة ، وخلك دائماً متوكل على الله

ويارب أنك تختار ﻷبو تركي الي ينفعه في دينه ودنياه