شرح فلفل أسود .. مقطوع .. قدر ضغط .. هيل !!

ياليت والله يفيدوننا الاخوان والأخوات، أنا إلى اللحين أفكر أخذ معي قدر ضغط وقهوة وتمر ولا لا .

وعليكم السلام ورحمة الله وبركاته

هلا فيك اخوي ..

ماشاء الله عليك ماخليت شي ماجبته معك والله يسهل عليك امورك ويوفقك يارب

..
بخصوص المفرش ماله داعي يا الغالي ومتوفره هنا ورخيصه بعد ..

بخصوص القهوهـ والشغلات كللللها الي ذكرتها .. موجودهـ يا الغالي
لان فيه محلات خاصه بالشرق الاوسط وفيها كل شي
بس طبعا راح يكون سعرها غالي مو دبل الي عندنا .. دبل الدبل بعد

..
فالنصيحه الي انا ابقولها لك .. وهي الي انا والله مسويها لنفسي

اغراضك وعزبتك وشغلك الي ماله لزمه .. حطه ع جنب وارسله بالشحن على البريد السعودي .. ماراح يكلفك كثير مقارنه بالي راح تدفعه اذا وصلت وبالقلق الي راح تحصله من اسئله وغيرهـ

..
جهزها يا الغالي عند اهلك واول ماتسافر وتوصل بالسلامه ان شاء الله ارسل لهم العنوان .. وخلهم يرسلونها لك وتجيك زي الحلاوهـ
او اذا قدامك احد ارسلها من الحين وريح بالك

لان داخل امريكا .. الوزن الزائد ياخذ منك تقريبا حوالي 100 دولار ,!!
احسبها من عندك لو ترسلها من السعوديه اقل تكلفه واريح نفسيا لك

عاد انت اخبر بنفسك
هذي نصيحه اعجبتك الحمدلله ما اعجبتك كبها بحر ^_^

وتوصل بالسلامه يارب

عبدالله الجاسر هلا بك والله ومشكور على المشاركة

Next
لبى قلبك وشورك
مشكلة البريد وأنا خوك هو إنه أغلى رحت قبل البارح اسأل عن الأسعار قالوا لي
30 كيلو لأمريكا بـ900 ريال ولازم كل قطعة ماتتعدى 30 كيلو !
وسمعت إن الطيار ياخذ عالكيلو 10 أو 11 ريال بس ماتأكدت بنفسي !
الشحن فكرة حلوة وهي أقرب شي ببالي فعلاً صح غالي بس زي ماقلت أضمن لي وأفضل من إني اروح أمريكا ويدبلون دبل الدبل علي ومادري عن الخامة كويسة ولالا أصلاً !
عموماً مشكور مشاركة فعلاً مفيدة
وننتظر رأي بقية الإخوان

والله كل الاغراض اللي ذكرتها أنا إن شاء الله بآخذها معي

ولكن يلزم إنها تغلف ويكتب عليها المنتج وتاريخ البداية والنهاية
والرفاعي يقوم بهذي المهمة

ماعدا المفرش

وهذا اللي أحترت فيه
ولكن نكست رد علينا


كيف أمورك يانكست

لازلت حافظ رسالتك في جوالي
الله يوفقك ويوفق جميع المسلمين

هلا وغلا
هلا والله بالغالي ..
هلابك وكيفك وكيف امورك يابعدي .. عساها تساهيل يارب ؟

انا ابشرك كل شي تمام ومامن خلاف الحمدلله وامريكا مانقصها الا طلتك يا بعدي ما ابي اطول في موضوع الرجال بينا رسائل ان شاء الله

..

وبخصوص الارسال .. لاتاخذ الله يهديك الممتاز خذ الي اقل منه ان امكن
او عندك خطوط الطيران خابرهم يشيلون في طياراتهم

والله يا الغالي انه اصرف لك
يا اخي ابقولك شغله

انا لما طلعت من واشنطن ع الولايه حقتي ياهم سوو لنا تفتيش ياهو تفتيش وخل عنك انواع البهذله
والشنطه الي شاحنها محيووسه حوس ومبعثره
وفيه عيال لاقين شناطهم مكسوره .!!
فتخيل عاد وانت مدخل عليهم زعفران .!!!!

الله يسهل امرك ..

السلام عليكم جميعا
يالاخو (طرفي )هاك العلم ههه
بلاشحن بلا ورعنه وخوف ودلع ورعان
انا كنت والله خايفه بس خوفي ذا مااغناني عن اني اخذ هالاشياء ذي اللي ذكرتها لمن سافرت الاسبوع اللي راح لان امي قالت تكفين يابنتي اخذيها
اخذتها كلها ماعدا قدر الضغط نسيته هههه -بليزز جيبيلي معك واحد -
شف ياطويل العمر انا ومرافقي لنا 4 شنط خليته ياخذله شنطه به اغراضه وانا كذالك
طبعا يبقئ لك شنطتين وش سويت انا هنا قمت انا ياطويل العمر وامليه اكل طبعا معك ميزان بالبيت لايتعدى 23 خلها بشنطه شوي صغيره عشان العفش مايكركب واقسم بالله مااحد فتح فمه00 جايبه اكل عيشتكم ماتنوكل 00حتى جبنكم به خنزير وع وع وع وع حتى جبت تمر معي ماهو مكتوب عليه الانتهاء والانتاج يابن الناس وربي سهاله
وجبت زيت شعر لاحتى حطيته بعلبه ثانيه موعلبته من زود الحرص والله محد درى عني
اقول لاتروعون الناس خلوهم يجيبون اللي يبونه
واقسم بالله حتى التفتيش اللي يقولونه ماصار معي وربي مااخذت بالتفتيش الا ثواني وانا طالعه واقول لمرافقي لاتفرح حبيبي بيجينا تفتيش يقولي يابنت خلاص قلت لا فيه غرفه بيددخلونا فيها ووووووو وطلع ماعندك احد --وربي مافيه احلى من تفتيشهم يالله لك الحمد0000
انا مااقول ان الربع كذابين بس الله ولي التوفيق والله لو دريت ان تفتشهم كذا كان جبت معي ساكتون هوااااا عندهم طيور خياليه-- هههههه
ماعلينا يابن الناس اذا كان فيه تفتيش فالناس اللي بيتفتشون همه اللي كاتبين عند الجمارك مامعاهم فووود اكل يعني -- اتوقع هيك احنا كاتبن يس معانا فووود فتحت شنطه وحده بس عند الدخول لامريكا والله حتى مااخذت ثانيه وسكرت قلت تعبتي نفسك 00ولاصار شي بالعكس مرت امرنا بسهاله فوق الخيال
يعني تعوذ من ابليس واخذ معك كل شيء والله ان ريحت اكلهم هنا تعورك ببطنك قبل مايوجعك راسك تتخيل ان اكلهم كله خنزير ولا رحت اسألهم قلت وش عندكم لحوم ثانيه غير الخنزير للبرقر مالقيت عنهم دجاج قالت لحم دوووق =كلب ياحظي قلت الله بس 000000 يخارجنا
***طيب لوشحنتها طول ذا المده ماتبي قهوه تلذذبها شوي؟؟تصبيره يعني الين يجيك الشحن --
يالله الخيار خيارك ماكل مايقال ستراه ا\\\\\\\\\\ أنتبه على عمرك من الجوع ايه تراني حملت معي جبن لاتنسى الجبن
يالله بالتوفيق للجميع

^
^
^

ياساتر .. وش بقيتي في السعوديه .!!!؟


شوفي اختى .. هما قالوها لي الشباب اكثر من مرهـ بس توني اتأكد من هالمعلومه ان الي معه مرافقه تمشي امورهـ وما يعقدونها معه

..
بخصوصنا حنى يا العزابيه ومو انا لحالي
انا لما جيت كان معي 14 سعودي غير الي قبلي وغير الي جايين بعدي
كلللللهم تعرضو لتفتيش
متى تم التفتيش
بعد ما خلصنا من واشنطن وكل واحد حرك على ديرته هنا تم التفتيش
طبعا انت دام شغلك سليم ماعليك من سالفة التفتيش ..
لاكن اني اقولك مافيه شي .. لا والله الا فيه تفتيش وتفتيش ماهو بسيط
والامر عادي دام امورك كلها تمام
ماراح يقدرون يسوون لك اي شي دام امور تمام

..
اما على الاكل والعيشه عندهم ..
الدوله نصارنيه ويغلب عليها النصرانيه
والله جل وعلي يقول ( وَطَعَامُ الَّذِينَ أُوتُواْ الْكِتَابَ حِلٌّ لَّكُمْ وَطَعَامُكُمْ حِلُّ لَّهُمْ )
طبعا غير ماهو معروف من لحم خنزير ولحم ميته وخلافه
وكذالك في امريكا يوجد اليهود .. وهذي انا اشوفها ميزهـ حسنه من ناحية الاكل
لان اليهود اكثر تشدد في الاكل .. فالمعروف عنهم انهم يقومون بنحر الذبيحه
وكذالك لا يأكلون لحم خنزير ولا اي شي يدخل الخنزير فيه

فعلشان كذا فيه كثير كثير من الاطعمه والمنتجات تراعي هذهـ المسأله
فالمنتج الي تحصل عليه حرف K او حرف U هذا يصلح لـ اليهود وهو يصلح لنا ان شاء الله
فالقصد من هذا كله .. ان مسألة الاكل هنا الحمدلله متوفرهـ فمايحتاج تتعبون انفسكم كثير

طبعا هي تقبى حريه شخصيه وقناعه وكل شخص حر في مايختار
: )

قدر الظغط موجود ما تحتاج تثقل على عمرك .. بس اغراض القهوة لا تنسها .. والله لي شهرين احوس ادور قهوة اللي انت خابرها والله ما لقيتها .. قاعد اشرب من القهوة التركية والعب على عمري فيها ..
شي ثاني اشتقت له .. بخور وعود والله تعطي الشقة جو خيال مجرد اقتراح

بالتوفيق وتوصل بالسلامة

وعلى فكررة في الـ I94 اذا كتبت انه ما عندك شي محد حولك ولا حد يفتح الشنطة ..

ههههههههه الله يسعدك ويوفقك
ترا لحم الدووق مو كلب .. هو نقانق ويسمونها Hot Dogاو بس Dogواغلب الاحيان تكون خنزير بس فيه منها لحم بقري ..
واي شي مكتوب عليه kosher ابلعيه وانتي واثقة