قصتي و أسئلتــــي ..!!؟

طبعن انا حعطيكم قصتي من طق طق لي سلام عليكم .. و بعدها أسئلتلي إلي اتمنى الاقي اجوبه منكم ..

انا اول شي بدأت افكر في موضوع الدراسه خارج المملكه لقيت إنو امريكا افضل مكان و من الاساس حلم ليا إني ادرس في امريكا .. و انا بصراحه استخرت ربي و يقولو و اكيد ماخاب من استخار .. و الحمدالله كل شي اتسهل معايا ..

طبعن بدايتي كانت إني ادخل المنتديات و اشوف اصحابي و أقاربي إلي في امريكا .. عشان اشوف افضل ولايه من جميع النواحي بيئه دراسيه و معيشيه و ترفيهيه و كل شي .. مهما كان الواحد لازم إنو يشوف حياه جديده ولا يكئب نفسو مهما كان هذي غربه .. و استقريت على 3 مدن ( اورلاندو في ولاية فلوريدا - تينك تعتبر ضاحيه من ضواحي نيويورك - شارلوت في ولاية نورث كارولاينا ) و في الاخير بعد بحوثات و مسائلات استقريت على مدينة شارلوت لأسباب عديده بصراحه .. و برضو الله يسهل الامور ..

رحت كلمت الوالد الله يحميه يا رب .. و عرضت الفكره و جلست اقنع الوالد و اقتنع و اتحمس و وافق .. و بدأت اشووف مكتب لي دا الموضوع إلين لقيت مكتب مستعد يتكفل بكل شي حتى الفيزه و يجبلكم قبول المعهد و الجامعه و السكن و كل شي .. يعني من جده إلى امريكا .. اللهم انتا تدعي و تروح المقابله في السفاره و بس ..

المهم الحمدالله جاني قبول المعهد و حيبدأ في 7 مارس 2011 و دحين بستنا موعد السفاره يوم 26 يناير 2011 و الله يسهل الامور و بستنى قبول الجامعه ..

لانو مني ناوي اسافر من هنا إلا و معايا كل شي و ملفي كامل ..

نصيحه :

الواحد يرتب أمورو من بدري لا يكون مستعجل ابداً يتوكل على الله يخلي املو في الله كبير يحاول يجيب قبول الجامعه و المعهد من هنا و من بدري ..

أسئلتي :

1) لو جيت ابغا افتح ملف تنصحوني من موقع الوزاره ولا لمن اروح هناك واشنطن اسلمهم الملف و الاوراق يد بيد ..!؟

2) الفندق إلي هوا دبل تري إلي في واشنطن .. إيش في اماكن قريبه الواحد ينصح يروح يتمشى فيها و الدفع يكون كاش ولا فيزا ..!؟

3) لو رحت الملحقيه في ايت دور اسلم الملف او ايش اسم المكتب او لمين اسلم الملف ..!؟

4) في الفندق في ناس يكونو معانا يقولوللنا ايش نعبي و ايش نسوي ..!؟ و الاوراق إلي نحطها في الملف تكون الاصليه ولا كلها صور ..!؟