يامن مريت على واشنطن ....ساعدني بمعلومة

علما اني رايح على حسابي الخاص على الخطوط البريطانية أملا انه يتم الحاقي

شوف يا صاحبي .. اذا تبي الكلام الصحيح

الالتحاق بيد الله قبل اي شي ، و اذا انت من شباب الماجستير او الدكتوراه ، فإذن الله ان حظك اوفر من اصحاب البكلريوس الي مالين امريكا

فأنصحك بالتالي :
1 - اطلع مع الخطوط السعودية رغم ان طياراتهم متهالكة و حالتهم زفت و من اردى الي اردى ، ولكن علشان تلاقي سواق الملحقية بوجهك و يوديك للفندق
2 - لا تحجز ولا شي ، اذا رحت مع الخطوط السعودية بتحصل سواق الملحقية و بيوديك فندق ليلتة 90 الي 100 دولار ( تخفيض للطلاب سواء على حسابهم الخاص او مبتعثين ) و الاهم من كذا مشاويرك كلها مع سواق الملحقية ( من المطار الي الفندق الي الملحقية و نفس الاتجاه .. قسم انه صار حافلة ههه )

و الي يميز الخطوط السعودية انها ارخص من باقي الخطوط .. الحمد لله حجزت المقعد و لكن ماسددت لسع ، و طلع على قيمة المقعد 1699 ريال فقط ! اما الاماراتية ماحصلت طيارة توديني في نفس اليوم لامريكا و بالظبط مطار دالاس

انتبه يا عزيزي .. مطار دالاس هو المطار الي تحصل فيه سواقين الملحقية غير كذا بتطر انك تاخذ تكسي + تحجز بـ 200 دولار و فوق في الفنادق .

و الامر لك بالاخر

جزاك الله خير وما قصرت ياالأجودي
أنا جاي على الخطوط البريطانية إن شاء الله ، ما لقيت حجز على الخطوط السعودية
ننتظر بقية الشباب والأحباب يجاوبون على بقية الإستفسارات الهامة

أخي العزيز .. مايحتاج تحجز فندق وتخسر ولا تتعب نفسك ولا شي ,
وحتى لو كنت جاي على أي خطوط ماهوب لازم الخطوط السعودية ,

أول ماتخلص من الجوازات والهجرة في مطار دالاس بواشنطن ,, وتطلع راح تلقى موظف السفارة قدامك .. طبعا حاطين لوحه كبيره وواضحه .. من يوم تشوفها راح تعرف انها السفارة السعودية.

راح يسألونك انت سجلت في الموقع؟ قولهم ايوه .. سواء سجلت أو ماسجلت.. يعني لو ماكان اسمك موجود في القائمة .. راح يخلونك تكتب اسمك .. والله يطول عمر أبومتعب .. خيره للجميع وماهو لناس دون ناس !

وراح يوصلونك بسيارتهم للفندق واسمه (دبل تري ) فندق ممتاز ومناسب,
طبعا في الطريق راح يعطونك أوراق عشان تعبيها وتختصر الوقت واذا وصلت الفندق تسلمها لهم .. ولو ماعبيتها وسلمتها راح يطلبونها منك من البكره الصباح من شان يسلمونها للسفارة .. وينفتح لك ملف.

ومثل ماتفضل الأخ .. الملحقية راح تاخذك من الفندق للسفارة والعكس .. وكل مشاوريك راح تكون معهم .. ومجانا.

بالعربي .. هم يتكفلون بكل شي .. الله يعطيهم العافية - والله يطول عمر أبومتعب ويمده بالصحه والسلامه ويخليه لنا -



تحياتي,,

والله ماعندي معلومه


بس ياجماعه الخير انا لحد الان مااعرف حأكون بأي ولايه ومرررره حااايسه يعني تتوقعوا ماراح يقبلوني ولا ايش لان لحد اللحين ماستلمت قبول المعهد ... ساعدوني وش الحل

وصلنا واشنطن يوم الاحد 12 ديسمبر على الطائر الميمون السعوديه والعكس الطائرات جديده وتحس فيها بالفه مع الناس الي حواليك وحصلنا الملحقيه امامنا لانه يوجد معنا خمس طلاب مبتعثين(الطالب على حسابه الخاص الملحقيه غير ملزمه باستقباله وهذا الكلام رسمي) الا في حالة وجود طلاب مبتعثون يشيلونك مع البيعه زي ما سوو فينا والملحقيه ما تشوفها بعينك يجيبون الاوراق لك وتعبيها ويرسلون لك رقمك في الملحقيه عن طريق ال اي ميل كذلك المشرف او المشرفه الدراسيه. الفندق دبل تري قريب من مطار دلس 10-15 دقيقه الملحقيه 40 دقيقه عن الفندق وهذا الذي سكنونا فيه 96 دولار- فيه دبل تري اخر امام الملحقيه غالي شوي-------- ولا احد يخلط بين الملحقيه والسفاره السفاره مالها شغل معك ولا تقوم باي دور في هذه المرحله- الشئون الدراسيه شغل الملحقيه وبصراحه ما قصروا معانا والسلام

الملحقية حول قلب العاصمة مو على الأطراف زي مانت متخوّف
و الفندق اللي يودوك له الملحقية بيلته بـ 93 زي ما أسلف الأخ فوق
وحولك الأسواق الكبيرة لا تقلق أبد
لكن في حركة ذكية رح تضطر فيها إنك تسحب على سواق الملحقية
الطريقة هي لازم يكون معك فيزا كارد وتبحث عن فنادق ليلتها ب70 دولار ومن خدماتها تستقبل في المطار
لأن سواق الملحقية بيجمدك لأن في غيرك مبتعثين جايين ولسى ما خلصو أمورهم وهو ما يقدر يوصلك ويرجعلهم
و في نفس الوقت الفندق اللي بيوديك له يمديك تلقى أرخص منه خاصة وأنت قاعد في واشنطن حول 3 أيام بتفرق معك

مشكورين يالغاليين
عزيزي kfoo أخاف اذا سحبت على سواق الملحقية يسحبون علي لاقدر الله
طيب كيف أروح للملحقية وأرجع يعني كمصاريف أخاف بعدين يطلع علي أغلى مما لو أستأجرت في فندق دبل تري ورحت مع سواق الملحقية!!!

السلام عليكم
انا عندي استفسار لان زي ما فهمت من كلامكم ان الواحد لازم اول شي يمر الملحقية قبل لايروح الولاية اللي بيدرس فيها سواء كان ع حسابه الخاص او مبتعث؟ صحيحة المعلومه؟
وهل معلومات المشرف والدراسه نستلمها من الملحقية ؟
ومتى اقدر احجز التذاكر؟ علما ان دراستي تبدا 4\4\2011
وباقي ما حجزت موعد بالسفارة
اتمنى الحصول ع الرد واشكر سلفا من يجيب