تجمع موظفين ارامكو المستقيلين والمبتعثين من قبل ارامكو(اجازه استثنائيه)

السلام عليكم إخواني الأرامكويين السابقين والحاليين المغادرين بمشيئة الله


الشباب اللي قدموا استقالاهم..
كم تأخذ الوقت اللي تأخذه إجراءات الإستقالات ؟
يعني لو سفري في فبراير مثلا.. متى أقدم استقالتي؟

ويعطيكم ألف عافية



أخوي حمزة
ممكن بعد اذنك تعطينا طريقة التقديم على قرض البيت ؟
أنا عازم أمشي قريب إن شاء الله, و أحتاج أعرف وش تحتاج المتطلبات للحصول على القرض؟ وخلال كم تحصل عليه؟ و إذا في أي شي متعلق بهل الأمور

السلام عليكم ...

أول شي ماتوقعت ألاقي هذا الكم الهائل من الموظفين اللي يبون يستقيلون ويطلعون يكملون دراستهم لكن ما أقول إلا صح عليهم و الله يوفقنا جميعا ^_^
أنا ان شاء الله بقدم أستقالتي نهاية هذا الشهر MARCH,2014 و خدمتي أربع سنوات وشوي ( مع الاي تي سي )

طبعا أنا درست بالأي تي سي على أساس أني بصير أدمن كليرك و تعينت بعدها على مسمى وظيفي آخر و وعدوني أنهم يطلعوني عشان أجيب رخصة من امريكا تخص شغلتنا و إلى الحين (سنتين) و ماطلعت كل سنه يقولون اللي بعدها ... المهم أنا راح أقدم أستقالتي لأسباب كثيرة أهمها اني أشتغل شغلة لمدة سنتين وهي شغلة واحد قريد 11 و أنا قريد 6 و مافكرو بالهشي و التقييم M و فكرت أنه من الافضل أني أطلع ادرس برا و أرجع يصير معاي شهادة وخبرة ...

للي بيقولون ارامكو و ما أرامكو لا يدخلون الموضوع رجاءا لأن ماراح تعرف أرامكو إلا لما تدخلها يعني أنا تخيلو كانت أمنيتي أدخل أرامكو بس لما دخلت أنصدمت الصراحه ... صحيح فيها مميزات لكن فيها مساوئ أكثر بكثييييير من أهمها :
1- كلمة السوبرفايزر هي اللي راح تمشي في كل شي يعني أنت تصير زي العبد
2- التقييم السنوي ( الزيادة السنوية ) تعتمد على الواسطات و حب السوبرفايزر لك إلا من رحم ربي
3- علاقاتك الأجتماعية راح تنقطع بسبب الكرف اللي يجيك و خصوصا اللي يداومون شفتات <<< بالنسبة لي أنا ما أنطبق علي هالشي لأن ال Z تايم صار عندي شي عاادي هههههه
4- ماكانت الشركة واضحه معانا من البداية يعني كل يوم يطلع لك قانون جديد
و أسباااااب كثيرة لو بعددها ماراح تخلص

المهم ندخل في صلب الموضوع بالنسبة لأجرائات الأستقالة , تقدر تقدم على الأستقالة لو بغيت بكرة مافيها أجرائات ولا شي لكن الأستقالة لها ثلاث حالات :
الأولى : اللي هي الأستقالة مع 30 يوم أنذار للشركة قبل الأستقالة يعني ترسل لهم الأنذار قبل 30 يوم من تاريخ استقالتك
الثانية : الأستقالة مع الأعفاء من 30 يوم أنذار للشركة و الأعفاء هذا يكون عن طريق المانجر
الثالثة : الأستقالة بدون 30 يوم و لا أعفاء من المانجر لكن سوف يتم خصم راتب شهر من حقوقك

طبعا في كل الحالات يتم رفع الأستقالة للرئيس المباشر و هو يرفعها لفوق و يرسلها للبيرسونيال ....


بالنسبة لحركة السكن أرامكو تدري عنها وهي أصلا تبي الموظف يسوي هالحركه ^_^ لكن نصيحة أذا أنت مو في حاجة الفلوس لاتسوييها لأن أذا خذيتها و طلعت و بعدين رجعت لأرامكو مايمديك تقدم مرة ثانية على قرض السكن ....

آآآخر نقطه : للي يسأل إذا طلعت من أرامكو وبعدين رجعت تقدم عليهم هل يقبلونك او لا .. أي نعم إذا هم محتاجينك بيقبلونك و لك الأفضلية في التقديم و فوق هذا بعض الأوقات و أنت في دراستك يدقون عليك و يعرضون عليك أنو إذا خلصت و تبي ترجع لنا حنا قابلينك من الحين و صارت لواحد من أخوياي يعني مو كلام ...

و بالتوفيق أيها الأكس أرامكويين ( يعني المستقيلين ) و بالتوفيييق للجميع و أتمنى أن الشرح يكون وافي و كامل للجميع

السلام عليكم ورحمه الله وبركاته
يا اخوان انا موظف ارامكو تخصصي انسترومنت , لي اربع شهور متوظف ودرست سنتين وست اشهر
يعني انا في ارامكو لي ٣ سنوات ، وابي اكمل دراستي
١ وش يترتب علي اذا استقلت من الشركه ؟ من اجراءات واضرار ؟
٢ هل دراستي اقدر اعادلها في السعوديه ؟
والله تعبت اسئل ولا احصل جواب لاني خايف اقول اللي عندي ولا تضبط اموري واتضرر في العمل
حاولت اكلم شؤون الموظفين كرشني يقول انت تستهبل وراح اعرف منو انت ومن هذا الكلام.

والله موضوع محيرني ومتعبني .. انا موظف بأرامكو حالياً على قريد 11 ومقبول بالمرحلة العاشرة ماجستير الحمد لله .. بيئة العمل مو 100% ولا هي سيئة جداً لكن الضغوط تخليك في كثير من الأحيان تفكر تغادر الشركة حتى لو عندك العلم انك ممكن تخسر وظيفتك وممكن ما تقدر ترجع للشركة مرة ثانية .. بنفس الوقت الواحد يستلم راتب وأمان وظيفي ولله الحمد .. علماً بأني بديت مع الشركة بأكتوبر 2013 وافكر اطلع بأكتوبر 2015 علشان اكمل سنتين لعلها تفيدني كخبرة في حال التخرج بإذن الله .. هل خبرة سنتين تعتبر جيدة وقت التخرج لو فكرت ارجع للشركة؟ ...

الموضوع محير جداً .. ارائكم تهمني ..

------

ي شباب محد يجاوب ومحد عنده علم مو معقوله!!
اقل شي قولوا لي بيطالبوني بفلوس او لا؟

وعليكم السلام ورحمه الله وبركاته ،

١/ ما بترتب عليك اي ضرر اللهم انك تفصل بدون حقوق وبدون شهاده خبره

٢/ماني عارف اي دراسه تقصد تعادلها اذا قصدك على فتره itc ما تقدر لان ماعندك شهاده فيها واصلا ما يعطو شهاده عليها

ومن حقك يخوي تسئل وتعرف وضعك قبل ان تقدم على اي خطوه في اتصل على شؤون الموظفين في الظهران واستفسر عن اللي تبي حتى لو عرف اسمك ورقمك ما راح يضرك بشي

اهم شي لا تخبر اخوياك ورئيسك اللي معاك بالعمل بشي حتى تاخذ قرار نهائي وقدك مظبط جميع امورك من قبول من فيزه من قرار ابتعاث يعني اذا قدك جاهز من كل النواحي معاد يعطلك الا تقديم استقالتك ادخل على ريسك وكلمه في الموضوع هو راح يكلم ريسه وبعدها يجتمع معاك ويحاول يقنعك واذا شافك صامل يقلك اوكي كمل الاجراءت اللي هي تقديم طلب رسمي عن طريق السستم

واذا قصدك تطلع تدري على حسابك خلي بالك الوضع الان تغيرر بالنسبه للانظام للبعثه مو مثل اول ٤ شهور وتنظم الان طالب اللغه لا يتم الحاقه بالبعثه والطالب الاكاديمي لا بد تكون مخلص ٩ ساعات وكمان مو اكيد تنظم ، يعني خلي في بالك المصاريف ، والافضل اذا تقدر قدم على المرحله الحاديه عشره تم تمدديها لاخر الشهر ان شاء الله تكون مطابق لها

اهم شي استخير واستشير والله يكتب لك مافيه الخير ،



بالتووفيق ان شاء الله

طيب مب مطالبيني بفلوس؟

حتى لو طالبوك ما بجبروك تدفعها ، واحد من الشباب قالو له مطلوب من حوالي ٤٠ الف مشى وما دفعها ومحد قاله شي ولكن تبقى مديونيه عليك في سجلات الشركه ،

هاا ما اخبار من المستقيلين؟
هل صحيح وقعوا مع الشركة مرة ثانية اللب جالسين يدرسون
المشكلة اللي بيستقيلون الحين ما نقدر ناخذ ونسوي حركة قرض السكن وغير كذا موضوع الالحاق صار صعب

كلام غير صحيح , اذا مادفعتها ماراح تاخذ منهم مخالصه ولا شهادة خدمه وراح يبقى اسمك في التأمينات الاجتماعيه كموظف عندهم وبالتالي ماراح يتم الموافقه على دراستك من الوزاره ولا الحاقك لأنك موظف على رأس العمل.

وايضا ماراح تقدر تتوظف في اي شركه ثانيه لأنك لاتزال موظف عندهم. العلم 100% وعن تجربه