حوار السكن مع عائله : أبغى تجاربكم ؟ هل احد استفاد ؟!!!!

انا مع اخوي إياد
العوائل تختلف ... والاشخاص برضو يختلفون
انا اقولك اللي شفته
السكن مع عائلة
بالنسبة لي في البداية افضل اني اسكن مع عائله ... في العادة اوقاتهم منظمه ... المكان هادئ ... وأحيانا انت تحتاج من يكون معك عشان يجبرك على تنظيم وقتك
وقت العشاء ... المرأة الكبيرة تجلس تقرقر على راسي وتضحك ... مع ان السوالف ما افهمها ... بس انها ونيسه ... ومع الوقت تستفيد من لكنتها ومن طريقة كلامها
احيانا يقولون لي العائلة وش رايك تطلع معانا ... لمعلوماتك تراهم ما يجاملو زينا ... نطلع زيارة لعوائل ثانيه ... نطلع نتسوق ... نطلع نتمشى ... حتى اذا راحو للكنيسه يقولون تبغى تيجي معانا
بالنسبة للطبخ ... أحيانا يكون طبخهم مو حلو ... هم طبيعة اكلهم كذا فممكن تستغني عن وجبة العشاء والفطور وراح ينقصو بالسعر
انصحك انك تلتزم بالحضور لأوقات العشاء ... لان بالعادة يكونو كل العائلة بالبيت ... وعلى الاقل تسمع سواليف ... وتحاول تسولف معهم ... صح في البداية راح تجيب انواع الاعياد ... بس عادي راح يتفهمونك ... ويحاولو يصححو لك بعض الاخطاء

طبعا اذا طحت عند عائله مو كويسه عاد اطلع من عندهم ... ترى ما فيه لا عقد ولا هم يحزنون ... شهريا تقريبا ب 800 دولار

السكن لحالك
الله يعينك على الوسوسه مع نفسك ... يمكن مخك يضرب وتقول خلاص ابرجع للسعوديه


السكن في سكن الجامعه أو المجمعات السكنيه سواء مع رومييت او لحالك بالغرفه
يعتبر جيد وخاصة للناس الاجتماعيين ... خليني اتكلم عن المجمعات السكنيه وعادة تكون مؤثثة وقيمتها ما تعدي 700 دولار وممكن تحصل حتى ب 550 دولار في العادة يكون تصميمها كالتالي
صاله في النص كبيرة مشتركه ... مطبخ مع غسالة ونشافه وثلاجه مشتركه ... وحول الصالة مثلا اربع غرف او غرفتين على حسب التصميم .. هذي الغرف مستقله بسرير ودولاب وطالوة مذاكرة مع حمام خاص فيك ... واحيانا يكون الحمام مشترك فراح تحصل السعر اقل ... انصحك خذلك حمام خاص ... وباب الغرفه حقتك يفتح ع الصالة المشتركه
انصحك انك تسكن مع امريكان او من جنوب امريكا .. برضو عشان تستفيد منهم
بعض المجمعات السكنيه هذي راح تحصل فيها مسبح وصالة رياضية وصالة حديد وانترنت مجاني والكهرباء والله ما ادري مين يدفعها ... والدخول فيها فقط للساكنيين فيها او للي عنده زيارة عشان يمنعو السرقات

في مشكله في هذي النوعيات من السكن
ممكن تحصل فيها ازعاج من الغرف اللي جنبك ... ممكن ازعاج في السكن يشكل عام وخاصة اذا ما كان فيه مسؤل في السكن
كل شوي احتفالات واغاني وخرابيط

الاسعار اللي فوق تعتمد على مكان الولاية والمدينة

الاشخاص اللي بيسكنو مع العوائل
لازم تكون مرح ... مو نفسية ... تكون اجتماعي تتكلم معاهم مو ساكت طول الوقت حتى ما تحسسهم انك ما تبغاهم وجبور عليهم ... اطلع معاهم ... شاركهم في اي شيء يحصل في البيت مثلا لو بغو مساعدة في اي شغله

ياشيخ والله لو اسكن عند عائله لروح معهم وين مايروحون
بالنسبه لي اجتماعي بس ابعدني عن النت > اجلس 10 ساعات ولا امل ،^


اللي فهمته منك انت وزياد إنها على نفس الشخص يعني حسب تقبله العائله والعكس صحيح ؟
لاكن نرجع للسؤال / هل تستفيد اكثر من الإستفاده لحالك ؟ يعني زي وضعي
احس اني اداوم بـ معهد الزرقاء بالرياض
يعني مافيه اختلاط ابد
كل اللي اقابلهم سعوديين

طبعا هذي بعد من مشاكل النت تخليك مو اجتماعي

طيب يا بندر قولنا وين ساكن يمكن احد يدلك على سكن مع عائلة حلو

اذا حصلت عائله كويسه لا تفرط فيها ابد ... فيه شباب مع عوائل لهم اكثر من سنتين ومره مرتاحين
يقول مثلا اذا نزلت المكافئة احيانا اعزمهم في مطعم سعره عادي ... عاد هم يحبو الشيء البلاش ... وما يحتاج تلزم عليهم على طول يوافقون
ويقول احيانا اذا طلعنا نتمشى ... احاول اشتري اي شيء اجيبه معي ... لانهم يطلعون بالسيارة حقتهم والبنزين غالي ... فاحاول اشارك باي شيء
ويقول مره طبخت لهم بالبيت ... طبعا جالسين يجاملون وبالعافيه اكلو
ومره قالهم وش رايكم نطلع نشوي والدجاج ولوزم الطلعه علي
طبعا انتبه لا تطيح عند ناس استغلاليين وينتفو جيبك ... يفكرو ان كل واحد عنده بير بترول
وهو يحكيني حسيت انه جالس مع اهله

بالنسبة لي مع عائلة افضل

تصدق اتمنا إني احصل العائله اللي انت تتكلم عنهم
ياشيخ لدلعهم كل شي علي اهم شي يحبوني >


وبصراحه فيه كثير ناس سمعت عنهم انهم مرتاحين بالعائله بشكل كبير جدآ
وفيه ناس العكس
لاكن انا كلامي على مدى الإستفادهـ هل هي افضل ام الطريقه التي استخدمها وجودي بالشقه لحالي ؟؟؟

أخوي بندر تحياتي لك اولا
ثانيا اكيد بديهيا العائله بتستفيد اكثر اذا كان هذفك لغه يعني مو خلاص بديت الجامعه
اساسا اكثر الشباب تلاقيه يسكن مع عائله وقت اللغه عشان الفائده وبعدين لابدا الجامعه يدور سكن لوحده
واللي يرتاح خلاص ماوده يطلع حتى في دراسة الجامعه ! لكن عندي لك حل ممكن يساعدك باقل الخسائر وتستفيد ويجيب لك فلوس بعد
بس بصراحه ماجربته ولا اعرف احد جربه اللي هو انك تشوف لك روميت واحد او اكثر حتى اذا كانت شقتك كبيره
فيه مواقع تحط اعلانك فيها او تعلق اعلانك بمكان الاعلانات وشوي والعالم تتصل عليك شوف اللي يناسبك منهم وخله يسكن معك ويدفع لك
او حتى ممكن انت تشوف اي واحد كويس ولغته كويس امريكي وتعرض عليه صدقني حتلاقي
مجرد راي اسال وشوف يمكن يفيدك

^
احترم وجهة نظرك
بس انا ماحب احد يسكن معي يعني انا قصدي هل العائله مفيده لدرجة إنو اي شخص يجي امريكا لازم يسكن عند عائله ولا يقدر يطور نفسه حتى لو كان لحاله !!!!

ههههههههههههههههههههههههههههههههههااي
والله مت ضحك من " معهد الزرقاء بالرياض هههههههههههههههههههههههااي

صراحه ي خوي بندر .. انا اتمنى اطيح في عائله كويسه .. عشان ما افارقهم وانا ابي اصير بينهم .. زي الطعس - دايم تحصلني فاتح فمي واضحك على اي شيء - قلبي ابيض والله
بس مع هذا احب السوالف والضحك والفله - بس المشكله .. مابوه لغه كويسه تخليني ادخل مع العوائل بشكل عرضي او طولي


الله يكتب لنا الخير .. وين مانوجه

أمين

جلعه دوم هالضحك


سؤال/ انت الحين عند عائله ؟؟
وكم صار لك !! ؟

ماهي السلبيات اللي شفتها ؟ + الإيجابيات ؟؟

لا والله لسا .. سفرتي بعد شهر وحدود الـ 8 ايام
وانا صراحه انسان متفائل جداً
يعني حاس اني ابي اطيح في عائله كويسه - لا اعلم لماذا
لان بشكل عام يمدحون تعامل الامريكـــــــــان - عندهم انسانيه ب زيآده
ف المستشفيات بالسعوديه ألاحظ تعامل الامريكان افضل بكثير من تعامل السعوديين نحو المريض

دمت بود

والله ياخوي شوف بس حبيت انقلك تجربتي

العوائل حظوظ وشوف حظك كيف وانا مجرب هالشي

كنت ساكن عند عائله الغرفه تمام وكل شي والحمام اعزك الله والطعام يجيبون اللي ابي من االلي اطلبه

بس يوم جيت حسبتها من الاخير ماني جاي والله اكل واشرب جاي اسولف واكتسب لغه جديده

وعندي صديقي طاح له بعائله من 6 اطفال >>حشى صارت حضانه خخخخخخخ

دق علي قالي تعال شوف الوضع صحيح في ازعاج شوي بس الطفل يحب يعرف ويسال عن اي شي وكل شي

وانت مضطر انك تبحث عن اجابته ولذلك اللغه مااخذت معاه 4 شهور الا الاكسنت امريكي

ولغته توب التوب

بالمختصر المفيد

دور على عائله فيها لوطفل واحد وتشوف الفرق زين


اتمنى لك التوفيق والنجاح

دعواتك لي