فقدت حماسي للبعثه ؟؟ ساعدوني

اختي تبين النصيحه اللي راح تساعدك لا تفكرين في اشياء سلبيه بالمررره
مثل ابفقد ابوي و امي ابفقد اصحابي والطلعه معهم ..... من هالاشياء
انا مثلك بس ان شاء الله طالع وعلى حسابي و ما ادري تكفي الفلوس والا لا ؟هل ابلتحق علي البرنامج او بيطول الموضوع
وبعدين انا موظف و راتبي 11000 بس راح اخليه واطلع شفتي المخاطره كيف
لانه حلم حياتي اني اكمل ماستر في امريكا من زمان
من اول ما تابعت كآس العالم في امريكا 94 وانا ماسكه معي على امريكاp
فلا تفقدين حماسك نهائيا
اخر كلامي استخيري ربك وشوفي الله وش يخيرك فيه
والله يكتب لنا الخير

^
^
هات وظيفتك واعطيك مقعدي!!!

ما راح توصل شي بذي الوظيفه بالبكالوريوس
راح اكمل ماستر واجي واصير مديرك و باستقعد لك

أطلب العلم ولو بالصين
وأنت يا أختي رايحة لأمريكا راح تواجهين سعوديات وسعوديين وعرب وراح بأذن الله تتأقلمين مع البيئة الجديدة
والأمور متيسرة والدنيا بخير وأنت رايحة تاخذين شهادة وتجين وهذه خلاصة الموضوع ,,,,,,,
وكوني دائماً قدوة لأخواتك السعوديات والمسلمات في أمريكا بالحفاظ على دينك وكوني فخورة بأرضك التي هي مهد الرسالات ................

شوفي ياأختي شيء طبيعي نفقد حماسنا في هذي الفتره الطويله <<عفوا إنتي تحسبي نفسك مبتعثه معهم ؟!

لكن صدقيني الأيام تجري ويقرب الموعد المنتظر من شهور وهي رحلتك إلى أرض الأحلام (أمريكا)

من يوم ماتطلعين من بيتك العزيز

هنا راح يبدأ الأكشن والحماس تجربه ماراح تنسيها طول حياتك

أنتي قبلتي في البرنامج فأحمدي الله تعالى أن الله أختارك عشان تمثلي بلدك .

وربي لا يحرمنا من حماسكم يامبتعثين .

وتذكري أن الآمال العظيمة تصنع الأشخاص العظماء .....


بالتوفيق يلا أشوفك في أمريكا << لحظه ! إنتي شكلك ناسيه إنك منتي مبتعثه كم مره أنا اقول !!!

بسم الله وعلى بركة الله .

موضوعك هذا كلنا مرينا فية خصوصا اذا وصلنا لمرحلة الجد وقرب السفر ..
كل واحد لة تجربة وانا راح اقول اللي مريت فية ..
كنت متحمس ومندفع خلال التقديم على الفيزا وقدمت تضحيات ذاتية بدون مساعدة من احد ولم يوقف معي احد ولك ان تتخيلي حتى نماذج السفارة انا اللي عبيتها بنفسي بدون مساعدة من احد وبعد ذلك رحت المقابلة ورغم تخويف الشباب مشت اموري على احلى مايرام وعديت وصرت انتظر الفيزا على احر من الجمر..

مرحلة انتظار الفيزا اول مرحلة في الاحباط**

قدمت تقريبا بشهر 9 ميلادي ومر علي فترة 4 اشهر وانا ماني عارف هل راح تصدر الفيزا او لا خصوصا انا موظف والوقت محسوب علي واخاف العمل يغيرون رايهم ويكنسلون وكل القريبين مني ماشجعوني بالعكس تحطيم وانا مااسمع لااحد واجلت المعهد ثلاث مرات حتى المعهد طفش من كثر تاجيلاتي المهم في شهر واحد صدرت الفيزا ووصلنا للمرحلة اللي بعدها ..

مرحلة السفر ***

هنا بداء الشيطان يوسوس لي اني ماراح اتاقلم مع امريكا وغيرها من الاشياء وكان مايزيد الطين بلة كل من حولي يحاولون يثنون من عزمي بعدم السفر وانا للامانة من داخلي احس اني توهقت بس اكابر على نفسي واخذت المسألة مثل العناد وصرت اتمنى الايام تطول قبل السفر عشان ماسافر بس يكون سبب خارج عن ارادتي

ساعة الصفر**

خلاص عقدت العزم وجهزت اموري والنفسية في وضع يرثى لها لكن الواحد يتوكل على الله حاولت احجز من الرياض مالقيت اقرب رحلة من قطر مرورا بفرانكفورت الى دنفر توكلت على الله وحجزت وسافرت ووصلت وصارت الامور سهالات والحمدلله ..

الان **

احتجت تقريبا الى اسبوع او اكثر حتى تأقلمت على المكان والاجواء والناس وطبيعة المكان خصوصا اني جيت من مكان صحراوي مثل الرياض وفجاءة طبيت في ثلوج كولورادو لكن توكلت على الله وتسهلت الامور وهذه تجربتي وانا متأكد ان 90% منكم جميعا مر بهذا الشعور والاحساس وهذه الفوبيا ولكن بالعزيمة والاصرار والتوكل على الله تتسهل كل الامور

ياااارب الله يسمع منك~

والله استخرت كثير وماازلت ~... الله يكتب اللي فيه الخير ... مشكور ع النصيحه


والله ارتحت لما عرفت انو في ناس زيي كنت متوقعه اني لحالي .. ياررب تعدي هالفتره ع خيرر ..مشكور ع الرد اخوي~

يااارب تكون الاحلى ..
يسلمو ع المشاركه~

انا الحين امر بحالة ارق مستعصيه من كثر التفكير اروح او لا .. بنجح او بفشل .. بقدر اجتاز العقبات او اتراجع !!
كل هالمور جننتني ..
قبل لما قدمت كنت متحمسه لاني شايفه الوضع هنا لازم قبل شهادتك الجامعية تسبقها توفل او اجادة اللغه تحدث وكتابه ومع الحاسب وهالاشياء ماكانت متوفره عندي فهالشئ اعطاني دافع اواصل بس للاسف لما قربت من الحقيقه اختفى الطموح
بس والله كلامك رد فيني روح التحدي ... الله يسهل دربك وين ماتروح

ياااااارب تكون مرحلة عااابره ماتترك اثر كبير ... بما ان البعض مر بهالمرحله فـ ان شاءالله تكون طبيعيه.. بس يمكن محتاجين لبعض الحماس وقصص النجاح اللي تعطي دافع انو مانتكاسل ..

اسعدني مرورك ,,

اااااااااه الله يفرجها علينا ويسر امورنا ... والله حتى التظاهر الكذاب اللي قاعده امثله ع اهلي طفشت منه بس وش اسوي مجبوره ع التمثيل عشان خاطرهم ..

ان شاءالله تتغير نفسياتنا للافضل باسرررع وقت يااارب

الله يكتب لنا الخير اجمعين
مشكورررررر على مشاركتي همي .. الله يسر امورك

الله يسعدك دنيا واخره ع الرد... شكلي محتاجه خبطه ع راسي عشان امشي عدل..

من جد الافكار السلبيه هي اللي تضعف الواحد وتخليه يتراجع ... والله كلامك يعطي داافع بالذات انك تخليت عن وظيفتك وراتبك ماشاءالله حلو عشان الماستر ..فاكيد انك ماضحيت الا انت متاكد ان القادم افضل~
الله يوفقك ويسر امورنا...

مشكور ع المشاركه .. بس مشكلتي اني فقدت الحماس مو خوف من روحتي والحياه هناك ~

ياقلبي عليك والله مشاركتك وسعة خاطري ... الله يسر لك امانيك ويحقق لك كل اللي تبغينه
وكلامك حمسني والله ..
وان شاءالله قريب تصيري مبتعثه يااارب

الله يسهل عليك يااارب
جد اكتشفت انو الاغلب مر بهالمرحله يعني مو بس انا ... ان شاءالله تعدي ع خير ...

ياجماعه والله هذا الموضوع جا على الجرح

حتى انا كنت متحمس وفرحان لاني بكمل الماستر في امريكا مع العلم ان كل من كان حولي كانو معارضين الا القليل منهم فكنت اسمع الكلمات السلبيه بشكل دائم

ولم اكن انظر ليها بل كنت مصرا على ما انا فيه مع اني لغتي الانجليزيه ضعيفه مع ذالك اقول سوف اجتاز

ومع اني باذن الله عندي توقع كبير قبولي في التعليم في هذه السنه لان معدلي قوي وعندي شهادة خبره
فكانو يقولون لي انت ستذهب الى امر مجهول لا تعلم مايكون عليه المستقبل (اظمن الوظيفه)

ولكن لم قرب موعد السفر ذهب الحماس الذي كنت اتحلا به وانا الان في حاله يروثى لها وكلما حاولت جمع افكاري المشتته تتبعثر من جديد
ولكن مايصبرني الان على هذا الوضع ماورد عن النبي صلى الله عليه وسلم( ما يصيب المسلم من نصب ولا وصب ولا هم ولا حزن ولا أذى ولا غم حتى الشوكة يشاكها إلا كفر الله بها من خطاياه ) فارجو من الله ان تجتاز هذهي العقبه وان ييسر الله لي ولكم كل الخير اين ماكان

السلام عليكم ورحمة الله وبركاته

أختي الغاليه هذا والله أعلم من الشيطان، يريد أن يضيع لك حلمك، ويوهمك بأنه غير جدير بالأهتمام.

الأبتعاث يتمناه كثير من الطلاب و الطالبات، وكونك طالبه على باب الابتعاث أحب أن أهنئك و أبشرك بأن حياة جديدة مليئة بالنجاحات أن شاء الله ستبدأ من عند أقلاع طائرتك

فلا تجعلي من الشيطان أن يتولي عليك، او يضعف من عزيمتك في تحقق حلمك .

تمياتي لك بالتوفيق