انا في مشكلة مع السفارة وخائف من المسائلة ابي مساعدة عاجلة من الاخوة الي لهم خبرة

June 23rd, 2011, 06:17 AM

السلام عليكم ورحمة اللة وبركاته

اخواني الاعزاء ابي اسرد لكم قصتي ووالله انني في هم مايعلمه الا الله
انا قدمت على احدى الجامعات الامريكيه وتحديدا جامعه ولايه اوريغون المهم جاني منها قبول معهد وقلت ابي انتظر قبول الجامعه لين يجي عشان اقدم على الفيزا وهذا ترا من غبائي الفاحش وانتظرت وانتظرت وانتظرت وطول القبول الجامعي وقلت ليه ماقدم بالمعهد واخذ الفيزا المهم قررت اقدم على فيزا بقبول المعهد لان الجامعه طولت ويوم جيت اقدم اكتشفت ان قبول المعهد انتهى ويبي تجديد المهم ورحت وراسلت الريجيل وقلت جددوة وقالو مايحتاج لان قبول الجامعه يبي يوصلك خلال ايام وقدمبه احسلك قلت حلوووووو
واستنيت لين جاني قبول الجامعة وبديت في اجراءات لفيزا المهم صلحت موعد مع السفارة وبعدين تفاجئت ان الاي ونتي حق الجامعه الي هو القبول ينتهي بعد موعدي مع السفارة بسته ايام يعني موعدي كان 13 جون مع السفارة والاي تونتي ينتهي 19 جون على مأظن وقلت انشالله تمشي عليهم ويوم جيت في موعدي وصلحو معي مقابله قالي الخواجه الي هو الامريكي قبولك ينتهي بعد سته ايام قلتله خابر غير عندك شي قالي ايه عندي شي اذا ماوصلتك الفيزا خلال سته ايام لازم تجددالقبول وترسله لنا
واعطاني ورقه صفرى فيها الايميل موضح يقول ارسل الاي تنونتي على هذا الايميل وقلنا طيب ياخواجه
ووالمشكلة انا الروقه الصفراء مكتوب فيها(((( تم رفض تاشيرتك في الوقت الحاضر وذالك لاننا بحاجه لمستندات اضافيه لكي نستمر في البت في معامله تاشيرتك )))))
وقلنا نبي نجدد قبول الجامعه وراسلنا الجامعه وقالو لنا مانقدر نجدد القبول لان دراسة الصيف بدت ولازم تنظر لين ينتهي الصيف ونجدده لكم قلت لهم ياناس انا ابي تجديد القبول لان فيزتي موقفه بعدين ماهمني دراستكم انا ابي ادرس معهد لمدة سنه ونص وبعدين لاحقين على الجامعه قالو لي اسفين تجديد قبول الجامعه مانقدر نعطيكيه الى بعد الصيف يعني اذا انتهى الترم الجامعي الي هم بادين فيه وهذا اكبر غلط مني المفروض اني رايح للسفارة بقبول المعهد لان تجديده سهل وهو الي علية العلم
وانا في حيرة من امري وحاولت اني اتصل بالسفارة يوم الثلاثا والاربعا الي هو امس من 3 عصرا الى 5 مساء ولاكني ماحصلت اي رد منهم دقيت ودخلت رقم التحويله الي هي 9661 بعد الرقم ولالقيت سنع يدق لي يفصل
وشرايكم احبتي في الله وخاصة الي لهم خبرة او تجربه في هذا الموضوع هل اجدد المعهد وارسله لهم علمن ان الي عندهم قبول الجامعه الي يبون عليه التجديد ول فيها مسائله قانونيه لان في ناس قالو انا هذا تلاعب ويمكن يعرضك للمسائله

ولا وش اسوي اكنسل الطلب واسحب جوازي من السفارة وابدى اقدم من جديد بقبول المعهد يعني اي تونتي جديد وسيفس جديد وموعد جديد ولا وش اسوي علما اني حتى ماادري كيف اسحب جوازي من السفارة يعني انا لاني وراء ولاني قدام لاني مقبول ولاني مرفوض يعني صرت معلق وفيه ناس قالو لي اصبر وانشالله تجيك الفيزا بس اصبر ايام.... ودي اصدقهم واستنى بس الورقه الصفرى الي اعطونيها السفارة هي الي مجننتي وخصوصا الجمله الي تقول(((( تم رفض تاشيرتك في الوقت الحاضر وذالك لاننا بحاجه لمستندات اضافيه لكي نستمر في البت في معامله تاشيرتك ))))) ياهلحوات الغانمة السوات ويش والله اني مارقد الليل ومثل ماذكرت لكم سابقا افكر اشتري لي شاص واروح اهرب على الحدود مع اليمن من زود الفراغ وكثر التفكير
ارجوكم افيدوني ارجوكم افيدوني ابي اجابات واضحه وجوازي كيف اسحبه من عندهم الله لايبارك فيهم

• نشر عبر تويتر
• نشر عبر فيسبوك
• نشر عبر جوجل