الى الامام ..الى الامام .. كـــورة كـــــورة كــــوووووورة!!!

June 26th, 2011, 10:57 PM

السلام عليكم .....

المنتدى نايم شوي .. بعكس أيام راحت كان المنتدى ناااااار وقضايا وشباشب (الله يكرمكم ) .. أشوى بس ما صارت ثورة وصار انقلاب هنا!!.. وكل هذي تصادفت مع أعضاء بعضهم ما يرحم .. قلنا ننتظر شوي الى ان يهدوا اللعب الاعضاء وأنزل موضوعي الرهيب!!
طبعا ماعندي سالفة .. بس موضوعي هذا يستهدف بعض الأعضاء اللي (يفتون كورة) "بتشديد التاء"!! أقصد يلعبون كورة أو يهتمون في الكورة.. لأن أي عضو ما يهتم بالكورة طبيعا بيقول : الحمدلله على نعمة العقل!

مالكم بالطويلة ... كل هالمقدمة الطويلة عشان أسلم من بعض الردود اللي ما ترحم.. لأني شاهدت وللاسف البعض وليس الكل يشوف أول رد ويبني عليه وهو ماله أي رأي!!

عموما.. أنا انسان ممكن قريبا أبتعث للدراسة .. ولما جيت أنبش في حياتي اليومية .. والعادات اليومية ..ووش ممكن افتقده ..كل شي ومقدور عليه ..لكن.....أنا شخص اتنفس كورة قدم .. اذا ما لعبت في الاسبوع 3 مرات .. يجيني اكتئاب!!
بالرغم أني محافظ ولله الحمد على مستواي الدراسي .. ولا أثرت الكورة على مستواي الدراسي..

طبعا أنا الى الان ما حددت اي ولاية راح اتجهه .. بس يا ليت تعطوني بشكل عام ..هل كورة القدم موجودة في كل مكان ؟؟

يعني هنا في السعودية لو أحد يسألني .. بقوله فيه لعب كووره في كل مكان تقريبا..
والسؤال الاهم : هل في اوادم يفتون كووره .... لأني من الناس اللي تنجلط من عك الهجمة

بصراحة .. هذا النوع الوحيد اللي امارسه من الرياضة ولا امارس اي نوع ثاني من تمارين او مشي او غيره..
وتتعتبر رياضة صحية وطريقة مثلى للمحافظة عالصحة واللياقة البدنية..
يعني لو افتقدت هالشي في امريكا .. أحس أنه شي سلبي !!
اعرف البعض بيقول ايجابي عشان انتبه عالدراسة .. لكن الصحة واللياقة البدنية مهمة جدا لنفسية المبتعث والتحصيل الدراسي "بالنسبة لي" ..


تحياتي للجميع ..

• نشر عبر تويتر
• نشر عبر فيسبوك
• نشر عبر جوجل