و بحمد الله وصلت واشنطن

July 11th, 2011, 01:54 PM

السلام عليكم

انا اكتب الموضوع الأن وانا في فندق كمفورت في واشنطن

الحمدلله الرحلة كانت ميسرة ورح اكتب لكم ملخصها وبعض النقاط اللي حاب انكم تنتبهو لها

انا رحلتي كانت من مطار الملك عبد العزيز بجدة والأمور والحمدلله مشت بسلاسة , وصلت المطار قبل الرحلة ب 4 ساعات كما هو مطلوب وكان في قبلي تقريبا 7 مسافرين يعني اتوقع انهم يفتحو الكاونترات قبل الرحلة بأكثر من 4 ساعات
في نقطة مهمة انتبهوا لها لما تقطعو البوردنق وهي ان الموظف رح يطلب منك اسم الشارع اللي رح تسكن فيه في واشنطن فلازم تكون تعرفه وانا حاولت اجيب لكم عنوانه عشان ما تتورطوا زيي واتوقع انه كذا 45515 Dulles Plaza
Sterling, VA 20166
هذا العنوان اللي موجود على الأيصال اللي استلمته من الفندق لاتنسو تسجلوه

بعد ما خلصت البوردنق طبعا اتوجهت لتختيم الجوازات وبعدها لصالات المغادرة وفتحو البوابة قبل الرحلة بساعة ونصف وطلعنا الطيارة بس الشي اللي تعبني هو التفتيش لأني مرتين فسخت جزمتي وانتو بكرامة والغريب في الأمر اني لما وصلت واشنطن ما شفت التفتيش اللي اتفتشته في جده!!!!!!!!!!!!!!!!!!!

انا طلعت عالخطوط السعودية رحلة رقم 35 استغرقت الرحلة اقل من 13 ساعة كل شي كان ممتاز والحمدلله لكن قبل نهاية الرحلة بكم ساعة واجهتنا مطبات هوائية قوية لعبت فينا لعب الله لا يوريكم والله حسيت ان روحي بتطلع
طبعا في الرحلة قدمو لنا وجبتين فطور وغدا وطوال الرحلة كان فيه زي البوفيه طاولة صغيرة فوقها سندوتشات جبنة ودجاج بالتوست وبعض العصيرات وشوية فواكه

عند الوصول لواشنطن كانت الأمور ما شاء الله سهااااالة لاحد يضحك عليكم ويهولكم الموضوع انهم بيفتشوكم ويعذبوكم والله انا ومجموعة كبيرة من السعوديين شباب وعوائل كلنا ما حد فتشنا ولا قلنا شي
فقط موظفة سألتني ايش الطعام اللي معاكم ؟؟ انا قلت لها ما معانا شي وفعلا ماكان معاي اي طعام لأني كله ناوي اشحنه من السعودية

طبعا اول ما تخرج من الطيارة رح تمر على موظف الجوازات تختمها وبعدها تخرج على السير حق الشنط وبعدها رح توقف في ممر فيه اكثر من طابور وهوه هذا اللي سألتني الموظفة عن الطعام اللي معاي بس ترى ما حتوقفوا فيه اكثر من 10 دقايق

اذا عديت الطابور ذا كذا تكون خلصت رخ تخرج تلاقي الناس رافعين لوحات انت تدور على لوحة الملحقية السعودية , اعطوني اوراق وقالولي اخرج تلاقي الشباب حقوننا, خرجنا ولقيت موظف تابع للملحقية اتوقع انه سوداني وطلعنا مع شنطنا الباص حق الفندق وعلى الفندق

لما وصلنا الفندق وهو مرة مو بعيد عن المطار لقينا موظف ثاني من الملحقية اتوقع انه مصري عبينا الأوراق واعطيناه صور من الأشياء المطلوبة ( جوازات , وثيقة تخرج , قرار الأبتعاث , اجازة المرافق , كشف الدراجات , صور من الهوية وكرت العائلة ) ولا تخافو ترى اذا ما عندكم صور لذي الأشياء ترى هو يصور لكم من نفس الفندق عندهم مكينة تصوير

بعد ما تعبو الأوراق اللي اعطوكم هي في المطار تعطوها هذا الموظف اللي في الفندق ورح يطلب منكم ورقة فيها اسمك ورقم السجل المدني والأيميل وانا انصح انكم تكتبوها من بدري عشان لا تحوسو زيي اكتبوها من وانت في السعودية واطبعها لأني لما جيت اكتبها في الفندق في كورنر فيه كمبيوترين مع الطابعة وحدة من الطابعات اللي كنت عليها انا ماهي راضية تشتغل وكان الوضع زحمة فليش الواحد يدوش نفسه اكتبها وانت في بيتك وخليها معاك اريح لك

هذا تقريبا ملخص الرحلة وارجو من اللي جايين يقرو موضوعي بدقة وانا والله ما كتبته الا عشان ما ابغى احد يتورط في الأشياء اللس اتورطت فيها

طبعا انا انصح انكم تاخذو معاكم في الشنطة لوزين وكرواسون وفطاير وشوية عصيرات عشان لما توصلوا الفندق ترى ما في بقالة قريبة منه
خاصة العوائل انا بنتي جننتني عطشانة ومسكت معاها تبغى عصير على بالها الأخت في السعوديه فاضطريت انا اروح بالتكسي من الفندق ب 5 دولار للبقالة ورجعني

ادعوا لي
وبالتوفيق

• نشر عبر تويتر
• نشر عبر فيسبوك
• نشر عبر جوجل