تقرير اليوم أجريت المقابلة في السفآرة ... شي رهيييييييب مخييييييف

بسم الله الرحمن الرحيم




كلنا نسمع المقابلة والمقابلة واسئلة ويسئلوك .. وتحقيق .. الخ

قريت ردود كثير من الاعضاء حسسوني ان المقابلة هم لازم تشيله وانه زي فيلم الرعب !!
هدا كلو والله كلآم فآضي طلع .. الاغلب يتخوووف وقررب الموعد .. اش اسوي ايش اقول ..
عن نفسي كنت متحمس للاكشن حق موعد السفارة .. ابغى اشوف واجرب كل شي ع حقيقته ..


بدآية .. عشان اتلافى الاخطاء البسيطة .. عملت لسته بمتطلبات الانترفيو كالتالي:

صفحة تأكيد ds-160 .. صفحة تاكيد السيفس .. ايصال سامبا .. قبول الجامعة+صورة .. الاي تونتي + صورة .. خطاب من العمل
شهادة بنكية وكشف حساب .. وثائق التخرج+صور مصدقة .. كشف درجات +صور مصدقة .. الجواز + صورة .. الهوية + صورة

كل خطوة اجهزها احط قدامها علامة صح ... لين اكتمل الملف 100%



طبعن موعدي كان 8.30 الصباح .. صحيت 7 وربع .. اخدت دش خفيف وفطور ورحت للقنصلية لانها جنبنا .. وقفت جهة بنك الاهلي ومشيت لين البوابة مقابل مواقف المستشفى خلف جدار الاسمنت ... في سكورتي سوداني معاه قائمة باسماء اللي عندهم
مقابلات اليوم .. يطلب صفحة التاكيد والجواز ... في دلوخ جايين بدون الجواز ورجعهم مع احترامي لهم طبعن .. خلصنا منه
في البوابة في غرفة تفتيش زي حق المطار اي عدة عندك مفاتيح جوال واجهزة تحطها في ظرف عندهم وتستلمها لمن تخرج.

خلصنا وخرجنا من غرفة التفتيش فيه خط مشآه تمشي فوقه يوديك لمبنى التأشيرات .. دخلت تفتيش بسيط جدن .. اخدت رقم
ودخلت غرفة الانتظار .. طلاب وسياح وناس بزنس في الانتظار .. جلست انتظر رقمي يمكن نص ساعه او اتقريبا 40 دقيقة.
طبعن منعا لاحراج نفسك .. في بنر مكتوب عليه الاوراق المطلوبة وطريقة ترتيبها .. نفذ المكتوب وريح راسك .. لان في كدا
واحد ووحدة مارتبو اوراقهم قعدو يفحطو قدام الشباك عشان يطلعو المطلوب .. نادو ع اسمي شباك واحد .. طلب الجواز+الاي تونتي+ايصال سامبا+صفحة السيفس+الجواز ... طويتها بطريقة معينة وسلمته اياها من تحت الشباك زي صرافين البنوك.
جااه واحد شايب مسكين مرافق لبنته ساعدته ودبست اوراقه وسلمتها للشباك .. المووهم قالي شكرن روح استريح وانتظر
ينادو ع اسمك ....


انتظرت تقريبا زي اول او اكتر بشوي .. ناداني بالانجلش اتوجه لشباك 3 .. رحت لقيته امريكي .. سلمت عليه ورد علي
بالعربي .. ويلا بدأنآ التحقييييييييييييييق خخخخخخخ

كيف حالك " بالعربي" ؟ قلت فاين بالانجليزي
هنا بدا يسال بالانجلش
ليش رايح لامريكا؟ رايح ادرس
تدرس معهد وحتكمل جامعة؟ ايوة
من كفيلك الي يصرف عليك؟ ابويا
عندك شهادة بنكية وكشف حساب؟ ايوة واعطيته
فين سافرت دوليا اخر خمس سنوات؟ البحرين قبل سنتين

قعد يهمممممهممهمهمممممم .. قال well, every thing it's OK
قلتله كل شي تمام .. اكيد؟ قال ايوة
سلمني الجواز واوراقي كلها ( هنا انا تحطمت )

اعطاني ورقة زرقاء فيها يوزر ورقم ورابط لموقع السفارة .. قال اجرءات التاشيرة تآخد تقريبا اكتر من اسبوعين
قلتله بس ترا دراستي تبدأ في 22 اوغست .. لسه ابغى احجز الرحلة !!؟
اخاف الوقت يصير ضيق !؟

يقول ادخل شيك بالنت .. ادا لقيت اكتملت اجرائات التاشيرة ارسل الجواز بالفديكس لعنوان القنصلية موجود في الورقة
واحنا حنرجع نرسل الجواز مع التاشيرة لفرع الفيدكس الي قريب منكم


** في بعض الطلاب سلمو الجواز للسفارة وعلطول عبو بياناتهم عند فيدكس وخلصت امورهم .. مادري اش الفرق بيننا؟؟
نقول كل تاخيرة فيها خيرة ..

بالرغم اني جهزت اوراق كثير .. بس شوفة عينكم ماطلبو غير اي تونتي والبنك وكشف حساب
لاخطاب عمل ولا كشف درجات ولا حتى الشهادات .. انتو جهزوها يمكن تطيحو مع واحد نكدي ويقعد يفصفص فيكم.


عمومآ وبكذآ يكون انتهينا من موعد السفآرة .. طبعن انا ماختصرته لانه والله مافيه شي جديد ولا غريب ولاشي يخوف
ع قولة اياد كاننا رايحين موبايلي نطلع شريحة ... وع فكرة رحت STC حولت شريحتي من مفوتر الى سوا لقيت
اجراءاتهم معقدة اكتر من السفارة خخخخخخخخخخ


و ان شالله اموري تخلص وتجهز بدري ونطير ع امريكا ونبدأ الحيآة الحقيقية.




((( دعوآتكم لي ولكم ولجميع الطلآب ان ربنا يسهل امور الجميع ويحقق لنا امنياتنا ويسهل ويعجل بالحاقنا بالبعثة
ونرجع لاهالينا رآفعين رؤسهم ومشرفين ديننا ووطنا .. اللهم آآآمين )))