مسؤول صحفي يتواصل مع مبتعث ويطلب منكم كتابة شكواكم حتى ينشرها!

لو حد قالي إن الي كتب هالكلام مشرف وخايف من الشكوى كان بأصدق على طول اخوي هد أعصابك باقي شوي ويجيك جلطة
هذي الكلمات كشفت كثير كان مخفي .. تمسك نفسك في سطر ولا سطرين لكن رغبتك الشديدة في إفشال إيصال صوتنا تظهر في السطر التالي .. والسبب!
الله أعلم .. أنا بأكون أطيب وأطلق منك ولا راح أدخل بنواياك رغم إنها مكشوفة

تقول بردك

جعله مادخل من هنا إلى يوم الدين .. أنا ماكتبت الموضوع عشان أقنعك أو استميلك
أنا كتبت موضوع واضح وصريح ...
الي عنده شكوى يبي يقولها حياه الله الي مايبي .. الله لايهينه يورينا عرض كتافه ويخلي المساحة فقط للناس الي عندها مشاكل..
مو شرط كل شوي تقعد تتنطط على الموضوع رايح جاي تقعد تشكك وتتهزا
ترى نقدر نتهزا مثلك ... لكن مجاراتك ستجعل مننا مشابهين لك .. وهذا أمر أربأ بنفسي عنه
المهم وجهة نظرك وصلت .. وفهمنا وش تبي ..
وعشان أعيده مرة ثانية
ياجماعة الخير .. الأخ العزيز يحذركم بأقوى قوته ويقول انتبهوا تقولون شكاويكم ..
انطموا وانثبروا .. ولو قالك المشرف ياغبي .. قله أنا غبي + متخلف
وإذا قالك هولد شهر .. قله تكفى خلها شهرين
ولو تأخر عليك ضمانك المستحق ثلاثة أسابيع .. ارسله رسالة وقله تكفى خلها خمس أسابيع
وإذا لك سنة وماعمره جاك منه رسالة أو سمعت صوته .. فعنك ماسمعت ولا عنك درست... أصلا وش جابك لأمريكا كان انثبرت عند امك وابوك ودخلت التقنية ولا توظفت على بند الإجور
ونتبهوا ترى احتمال هذا الموضوع كمين وراح يضركم
شي ثاني طال عمرك؟ ولا خلاص بتقعد مداوم في الموضوع وكل شوي تسجل حضور وإنصراف؟

أنا ماادري وش علاقة أسئلتك بموضوعي؟
ولا أدري أصلا وش مزعلك من الموضوع
لكن بأجاوبك عشان بس اعلمك إنك "عايش جوك" في الجدل الي قاعد تصنعه بدون سبب

الكلام قلته بالموضوع .. الإيميل جابته الأخت القلب الصادق بعد مراسلتها لعدة صحف عندما قرأت مشكلتي بموضوع سابق ووعدت بالتحدث مع مسؤولين وأوفت بوعدها وارسلت لي رد الصحفي قبل يومين وأحببت الجميع يشارك

جاوبتك قبل كذا وعلمتك إن مشكلتي ذكرتها سابقا وأصلا أول شي سويته هو نشر مشكلتي وهذا رابطها
http://www.mbt3th.us/vb/forum8/thread287122.html
والكلام بالموضوع هو نفس كلام الشكوى الرسمية الي كان على طاولة الملحق الثقافي وتم تجاهله

واحد موقف راتبه شهرين بدون سبب .. وراسلت المشرف مرات عديدة + الملحق الثقافي + نائب الملحق + رئيسة الاقليم + مسؤول الشكاوي وكلهم ماحد رد علي ولا على رسايلي .. وش تبيني اسوي افصل طال عمرك؟
واسطتي ماتحايلت على القانون .. ولا حتى اسميه واسطة .. هو شخص راح للمشرف وقاله ( ياادمي وش فيك على الطالب حاط له هولد ولا ترد عليه) .. وطلع المشرف مخطي ورفع الهولد كذا بكل بساطة! وبدون شرح ولا حتى اعتذار!

عرفت ياحبيبي وش المشكلة؟
بعد كل هالشرح اعتقد إنك واحد من ثنتين يا إما أنك كنت فاهم غلط وأتمنى الحين تصحح الموقف
أو إنه لك مصلحة إن الوضع المعفن بالملحقية يستمر على ماهو عليه .. مثلا ماتبي ( بابا أو عمو ) يجيه مشاكل من الشكاوي
آخر مرة راح أرد عليك بس حبيت أحط النقاط فوق الحروف فلا أريد الموضوع يتحول لجدل

خاتمة:
قال الأوزاعي : ( إذا أراد الله بقوم شراً ألزمهم الجدل ، ومنعهم العمل )

لذلك دع الجدل ياعزيزي, واعمل هنا أو اذهب واعمل ماكنت تعمله في مكان آخر