سولف مع رجهـ...

شوفي اختي ..
الكلام اللي بكتبه وجهة نظر ولاافرضه عليك .. واللي خلاني اقول كذا لاني في اليوميات لما كتبت عن الغطا والكشف ومن هالامور في ناس شبت فيني وتكلمو وانتقدو وخرابيط .. وانا من الناس اللي اقول رأيي بصراحه ولااجبرت احد انه ياخذه..
على العموم
بكون معك صريح .. الغطا ستر للمرأه ومايختلف على كذا اثنين لانه من الشرع .
والافضل انك تتغطين الا في حالة انو فيه مشكله عليك .. وانا قريت فتاوى تجيز للمرأة انها تتحجب وتكشف وجهها في حالة انها خافت الفتنة . ابحثي عن هالموضوع وراح تلقينه.
وبالنسبة لي اشوف الغطا افضل ... يعني تراعين ربك قبل كل شي وتبعدين عن الشبهات واللي يرضي ربه أكيد الله بيكون معه ويعينه على اموره كلها.
اما اذا كانت مدينتك فيها مشاكل وعنصرية وممكن تتعرضين لأذى وامور ماتقدرين عليها ف تحجبي اسلم لك .. طبعا اقري الفتوى اول وشوفي الحكم لاتاخذين بكلامي .
الشي الثاني واللي للأسف جد جد يعور القلب انو صراحه بعض الشباب السعوديين من يوم مايشوفون سعودية ياكلونها اكل بعيونهم .. سواءا متغطية او كاشفة او حتى بحري ماتسلم منهم ..
طيب ليه !! ياخي عندك الامريكيات رح طالع فيهم الين تنفقع عينك محد قال لك لا .. ليش على السعوديات !! والله العظيم حرام ياخي هالضعيفه تاركة اهلها وناسها وجاية تدرس وفي حال نفسها وش لك وش لها خلها في حالها .
جد في ناس سبحان الله الله يعافيهم ولايبلانا .

على العموم اختي اتمنى تتقبلين وجهة نظري وعسى الله يوفقك ويثبتك ويكتب لك الخير وين ماكان.
تحياتي

الكلام هذا اقراه كثيـر بالمنتديات ولا أصدق .. معقولة يسوون زي كذا !!
ياحليلي على نياتي والله ، وعن نفسي والله ماطالعت لا بأمريكية ولا بسعودية

من وجهة نظري الشخصيّة - ولا يجبر بالأخذ بها -
شوفي اممم .. يوم أشوف وحده منقبه خليجية بقولك شعوري
والله اني انصخف عليها لأن نظراتهم لها ماترحم مو نظرات كره وحقد وعنصرية لا
ينظرون لها نظرات حزن استغراب رجعية
أنا أقولك وجهة نظري إن شيوخ مو شيخ وحد افتى بجواز كشف الوجه طيب ليه ماتتحجبين ؟
ليه تصعبين الأمور على نفسك ؟
أنا أقولك حجاب .. النقاب والله بتعيشين دقيقة دقيقة على أعصابك وهذا يأثر على نفسيتك وتحصيلك الدراسي
الله يوفقك

رجة

كيفك ان شاء الله تمام

ممكن لو تدعم الموضوع ببعض الصور يكون افضل

تقبل مروري

والله ياخوك انت قريت بالمنتديات وانا شفت بعيني
وبعضهم يسوون اكثر من كذا .
والمشكلة ان نصحنا احد قالو لنا هذا ملقوف والا ...
عموما انا اقول كلمة حق واللي بياخذ بها اهلا وسهلا والا يتركها محد مجبور
مشكلتي صريح وخاصة في امور الدين
انا ماني ملتزم ولاني متشدد ولاشي . انا انسان مدخن وراعي طرب وضحك ووناسه. لكن مو معناته انو خلاص اسكت.
كلنا بشر وكلنا نخطي محد معصوم . اللي علي اني انصح واعطي رأي ووجهة نظر لا اقل ولا اكثر.

اسف على خروجي عن الموضوع لكن لانه وصلني كلام وحبيت اوضح . والله من وراء القصد.

تحياتي .

هلابك اخوي وحياك
والله ياخوك مدري يعني الموضوع الى الحين في بدايته وكذا عرفت وتونا نصايح واستفسارات وهيك شغلات.
نشوف وضع الصور اذا جا لها شي يستاهل انه يندعم بالصور.
على العموم تحياتي لك وان شاء الله ناخذ امر الصور بالحسبان

نورت

ارحبوووووووووا


نصيحة اليوم ..


اذا جيت تدور سكن وش تدور عليه ..

كالعادة الموضوع وجهة نظر شخصية بحته ... محد مجبور ياخذ فيها..

بالنسبة لموضوع السكن .
طبعا السكن حسب معرفتي وانا هنا اتكلم عن مدينتي اللي انا فيها فلاقستاف اريزونا..
مسالة اختيار السكن تفرق من شخص لشخص ..
البعض ماعنده مشكلة يدفع اكثر لكن يبي سكن نظيف ومتكامل.. البعض يستغني عن خدمات معينه مقابل سعر أقل.. البعض يدور الرخص فقط ويقول الامور الباقية يسهلها الله وهذا من حقه طبعا بحكم المكافأة.
انت شف اول شي انت كشخص وش رغباتك . وش طبيعتك . كيف مزاجك . هل تتقبل تسكن مع امريكان مثلا او تبي سعوديين هل يفرق معك السعر هل تهمك النظافة وهيك شغلات وبعدها احكم.

الشي الثاني وهذي نصيحة لوجه الله لاتخلي المكتب اللي جاب لك القبول انه يحجز لك سكن. ياكثر اللي توهقو . ياجماعة الخير ادخلو المنتديات قبل ماتختار المدينة قبل تجيب القبول ادخلو المنتديات وابحثو واسألو .
كثير قابلتهم هنا قالو رحنا لمكتب واختارلنا القبول وجينا والله ولانعرف وش وضع المدينة ولاعندنا اي معلومات عنها الا من المكتب. قلت لهم طيب والمنتديات زي مبتعث قالو والله مابحثنا ولا شي وياليتنا بحثنا كان تغيرت امور واجد.

نرجع لموضوع السكن. من وجهة نظري اشوف ان الواحد يسافر لبلد الدراسة اول واذا وصل هناك يروح يختار السكن بنفسه.
كثير من الناس يدخل مواقع ويدور عن سكن ويلقى له سكن ويشوف الصور كأنها جديده وتعطيك فخامه ونظافه وخرابيط ولما تحجز وتجي تنصدم باللي تشوفه.
كلماني واحد قبل فتره قال انا بجي قريب ولقيت في النت سكن اسمه كذا وكذا وانه حلو والصور روعه وسعره كويس . قلت له هالسكن جنبنا واعرف ناس ساكنين فيه ويقولون ان الموية احيان تطلع من الجدار اذا دخلو يتروشون !! وقلت له اني وديت له ناس كانو يدورون سكن وكنت اتكلم مع المكتب حق السكن وقالو لي ان السكن مبني ايام السبعينات .
يعني باختصار الافضل من وجهة نظري انك تجي وتشوف بنفسك قبل ماتسوي اي شي .

على العموم اتمنى اني افيد واستفيد .. ونتقبل وجهات النظر والاراء المختلفه

تحياتي لكم..

هيلووووو
<<< جايه متأخر لكن بتعلق ع الموضوعين
الموضوع الاول من جد اول ماجيت قلت انا ماراح اجلس الا مع اجانب مشان أحسن اللغه تبعي
لكن للأسف الشديد أتضح لي ان هالموضوع صعب يعني فقط اكون معهم بالمعهد وبعدها لا ليش ؟ هم دايم يقنعوني تعالي معنا واسهري معنا لكن سهرتهم وجلستهم ع شرب ورقص وووو
وصعبة جدا كوني كبنت مسلمة اروح اجلس معهم .
وكمان في السفر يقولون لي تعالي معنا لكنهم ياخذون فندق وينامون بنفس الغرفه اولاد وبنات . وهم مستحيل اسافر معهم مشان هذا الشئ
___________________

موضوع السكن أوافقك عليه 100%

وتشكرااااتي

واللي يعور القلب الاكثر انو الشاب السعودي( محاسب )على نظراته حتى لو كانت بدون قصد ،،، بما ان بعض السعوديات ممن يحملون ( ثقافة الوسوسه) و أن أي نظرة من شاب سعودي فهي ( غير بريئه) وبعض المؤيدين لهذه الثقافه من( الذكور) السعوديين (مثلك) ،،، فمرات صرت كل ما امشي بسيب وتمر قدامي سعوديه احط راسي بالارض او اطالع مكان ثاني خشيه انو ينقال عيني طويله وآكل السعوديه بعيوني اكل ع قولتك

لكن بعدها قلت ينقال اللي ينقال طزززززززززززززززززز انا واثق من نفسي الحمد لله وواثق من نظراتي ،،،،، لا والمشكله تلاقي انو نفس اللي يحملون هذه الثقافه تفسر اي نظرة من شاب سعودي انها غير بريئه وانها نظرة شيطانيه شهوانيه لكن بالمقابل تسولف مع الغير سعودي ( العربي) بكل اريحيه ويطالع فيها ويكون جنبها ووجه لوجها وتفسر نظراته انها بريئه وخاليه من الشهوانيه ( مع ان واقع العرب المقيمين في السعوديه يوضح لنا العكس، وما يحتاج اوضح اكثر انتم فاهمين طبعا !))))) ،،،انا اعتبر هذه حريه شخصيه عااااااااااااااادي لكن اكره ( التنااااااااااااااااااااااااقض)


( التناقض) في مجتمعنا السعودي شي يجيب المغص والقولون واي امراض لها علاقه بالاعصاب

طبعا علشان ما اعمم الحمد لله فيه سعوديات كثير واعيات وما عندهم هذه الثقافه (الوسواسية ) خصوصا معهدي السابق كان معنا بعض الاخوات السعوديات اللي وربي نظرتي ما كانت الا نظرة اخو لأخته وبعضهم متزوجات ،،، ما انكر كنت معجب بشكل وحده لكن نظرتي لها كانت عاديه مو ع قولتك آكلها بعيوني أكل ، ( وع فكره كثير من الاجانب العرب ينظرون للسعوديات بإعجاب) لكن سبحان الله ينقال نظراتهم بريئه وهم ملائكة على الارض حتى لو صار ابتزاز عادي هههه
لكن السعودي عيييييييييييييييييييييييييب يعجب بوحده وعييييييييييييييب مجرد تفكير انو يفكر مثلا يخطبها لأنو اعجب فيها ( ما قلت لكم تناقض)

عموما ما ابغى اطول بالكلام لكن ما اقول الا يارب يرزقني بالزوجه اللي تكون صالحه وتكون متفتحه وما يكون عندها هذه الوسوسه
وللتوضيح لأن دائما ينقال عني حاقد على الاجانب العرب احب اقول انو الوالده الله يحفظها ( سوريه)

هلابك اختي نورتي
يبيلك تصبرين ان شاء الله الين تلقين لك مثلا بنت مناسبة لك ودها مثلا تتعلم عربي وانتي ودك تتعلمين انقلش وتتعاونون
احنا عندنا هنا شي يسمونه بارتنر كونفرزيشن اللي هو يكون تقريبا كل اسبوع يجتمعون طلاب من جميع الجنسيات تعارف وكذا وبعدها يعني تكون علاقات
واعرف كثير راحو له واستفادو تعرفو على ناس ودهم يتعلمون عربي وصارو يجتمعون في المكتبة او في كوفي مثلا ويسولفون ياخذون ويعطون ويطورون لغتهم.
وان كانك تركتي هالناس عشانك مسلمة وعشان خوفك من الله ف ما اقولك الا ( من ترك شيئا لله عوضه الله خيرا منه ).
وعلى العموم الله يوفقك ويرزقك بالصحبة الصالحة اللي تعينك على دينك قبل دنياك.
بالتوفيق.