سولف مع رجهـ...

شكراً لك من الأعمـاق أخ عبد العزيز وعلـى ما تقـدمه لإخـوانك.

حياك الله اخوي و اشكر لك فتح المساحة للتعبير و المناقشات
انا عندي نقطة ملاحظها على اغلب المبتعثين
وهو " ابغى مدينة مافيها سعوديين"
وانا و الله بالعكس اشوف النقطة هذي مهمة لان محد راح يفهمك و يوقف معك الا السعودي
انا مصاحب ناس كولومبيين وصينيين و و و بس ما استغني عن اصحابي السعوديين لسبب اني اكون متطمن على اهلي
لو حدث اي شي لا سمح الله ان في احد قريب راح يساعد
و ماظن ان كثرة السعوديين حاجز لتعلم اللغة لان الي بيتعلم اللغة بيتعلمها ولو هو في السعودية
و اعرف ناس جابوا التوفل وهم وسط السعودية بس بالجد و الاجتهاد

أنآ كنت من متآبعين يوميآتك من حين لآخر
وإنشآء الله رآح أتآبع سوآلفكـ هنآ ورآح أشآرك معك ومع الأخوآن

تقبل تحيآتي

زيزوو

روح الله يوفقك

بالتوفيق يارب
كلامك يدخل القلب الله يحفظك لاهلك
..
تحياتي

بصراحه انا ودي وماودي اكشف ولا لا ومحتاره مره كيف اكون؟؟؟\


افكر وتعبت تفكير ؟؟؟

موفق اخ عبد العزيز ........

لكل من شكر ودعا بالتوفيق اقولكم بارك الله فيكم وجزاكم الله خير على كلامكم الطيب ورحم الله والديكم...

وانتو صراحه تعطون الواحد دافع انه يستمر..


شكرا لكم من اعماق القلب
تحياتي لكم..

الله يعافيك اخوي ويحييك
اول شي انت فتحت موضوع كنت بتكلم فيه لكنك سبقتني
انا معك في وجهة نظرك ..
الاسباب اللي ذكرتها انا معك فيها .. وانا بطرح وجهة نظري بعد اذنك.

شوف انا من الناس اللي تعلمت الانقليزي في السعودية
حبيت الانقليزي من اول مادرسته في اولى متوسط بس ماكنت ذاك الزود
حرصت عليه اكثر في الثانوي. واللي صراحه طور اللغة عندي الافلام.
انا من عشاق الافلام . كنت لما اتابع فلم طبعا يكون مترجم لكني ارفع الصوت احاول القط الكلمة واقرا الترجمة في نفس الوقت .. منها اعرف كيف نطق الكلمة ومنها اعرف المعنى من الترجمة .
بعدها صرت اتابع الفلم مترجم انقليزي وعربي في نفس الوقت اذا حصلت طبعا. بعدها بالترجمة الحرفية الانقليزية . صحيح اني ماافهم الفلم كامل لكن على الاقل عرفت كيف تكتب الكلمات ونطقها وكذا.
والحين الحمدلله مايحتاج ترجمة الا في افلام الخيال العلمي اللي يكون فيها مصطلحات صعبة وكذا .

يعني اول شي لازم تحب الشي عشان تتعلمه.
الشي الثاني انت طور نفسك بنفسك ابحث واقرا وفيه مواقع بالهبل في النت تعلمك انقليزي.
الشي الثالث زي ماتفضلت اخوي انه حتى لو كانت المدينة فيها سعوديين برضو راح تتعلم اذا انت تبي تتعلم.
يعني انا عندي وجهة نظر ان المعهد يعطيك 40 في المية والباقي عليك انت. الدولة لما ابتعثتك برا تدرس وعطتك سنة لغة وتقدر تمددها الى ست شهور كان معهم حق وانا اشوف انها كافية وزيادة اذا الواحد حرص.
من رأيي محد عنده عذر يقول سنة ونص ماتكفي. لانك برا السعودية انت في دولة تتكلم انقليزي يعني اختلط مع الناس روح اطلع تعرف تكلم حاول قد ماتقدر .
صحيح ان كثرة السعوديين في بعض الاماكن يكون صعب شوي . لكن محد اجبر احد انه يختلط معهم طول وقته . يعني انا بصراحه مدينة مافيها سعوديين ماارتاح. والله العظيم ان في اغلب المواقف ماراح يفيدك فيها الا السعودي.
لكن زي ماقلت مو اي سعودي ترى بينفعك .. اعرف من تصاحب .. لاتثق في احد بسرعه لانك ماتعرف الادمي ولاعشت معه . اعرف طباعه اول وشف الادمي وبعدين احكم . ياخي في ناس وقسمن بالله اخوتهم تنشرى . شفني طول عمري بالسعودية لكني كسبت اخوان هنا ماكسبتهم في السعودية. الغربة تطلع معدن الرجال .


انا من الناس اللي صراحه ماني اجتماعي مع الامريكان لعدة اسباب ... اولها واهمها انو اغلب الامريكان يكون راعي شراب وحفلات وكذا وانا الحمدلله ماني من هالنوع ولا احب كذا .. الشي الثاني اني انسان بيتوتي واحب اجلس في البيت والامريكان الغالبية منهم اذا تمسكو في الواحد نشبوا له . وغير كذا انا من الناس اللي مزاجي مدري وش يبي يعني كذا فجأة بدون مقدمات ابي اجلس لحالي ولا اكلم احد . ف افضل اني مااتعرف على امريكان والحمدلله الناس السعوديين اللي تعرفت عليهم فيهم الخير والبركه ويغنوني عن الامريكان.

تبقى هذي وجهة نظري الشخصية واتقبل انتقاداتكم .
تحياتي لكم .