والله من جيت لاحد يومكم وعيوني ماوقفت افكره ارجع السعوديه

توكل على الله وكمل شوف مستقبلك ، راح تتحسف بعدين تقول ياليت وياليت وماتنفع كلمة ياليت

الحمد لله ربي رزقك بعثه وسخر لك كل شي
تحياتي ،،،

-

أولاً أذكر ربك .. وصلي صلآتك و توكل على الله
ثانياً .. انت جيت هنا عشان تتعلم أنجليزي .. وتطور نفسك .. وتطور عائلتك .. وتجعل مستقبلك أنت ومستقبل دولتك أفضل و أحسن
فـ هالأمور كلها هذي .. يبيلها تضحية يبيلها شغل على نفسك

كلنا جينآ هنا مانعرف الأحرف الأنجليزية ومانفرق بينها أبداً .. وفجأه صرنا نتكلم وصرنا نقضي حوائجنا وصرنا نضحك وصار عندنا أصحاب كثير من الجنسين ومن عدة جنسيات
بس وش سوينآ .. ضغطنا على أنفسنا .. كل يوم نحفظ كلمات وكل يوم نذآكر وكل يوم نحاول نفهم غصصب القرمر .. وان مافهمنا نبحث بالأنترنت وتلقى شرح وافي بالعربي من عدة مواقع يسهل عليك المهمه
و متى ما أصبحت قآدر على فهم المتحدث عليك بأهم شي .. حمل أفلام أمريكية .. مترجمة أنجليزي !!
تسمع الكلام وتشوف الكلام مترجم قدآمك !! وأي كلمة ماتعرفها رح أبحث عنها وطلع معناها وسجلها بـ نوته عندك
وصدقني بتكون خلال 6 ششهور جآهز لأختبار الأيلس !!

توكل على الله .. وتذكر اهلك الي بالسعودية الي تركتهم عشان شهآده !!
لا تخيبهم و تشمت الناس فيهم

الله يوفقك ويسعدك ويسهل دربك ويثبتك يآرب

ياخوي طبيعي اللي يصير معك صار معى الكل وهذي بداية فترة تسمى الهوم سك يعني تحن لاهلك وناساك بس رح تعدي ان شاء الله بعد فتره ويجي يوم والوالده تقولك لاحصلت اجازه ارجع ابغى اشوفك

وانت تقول لا امكن ارجع مدري افكر

وتاكد انك باذن الله في الطريق الصحيح لان اي طريق تواجهك مشاكل هو الطريق الصحيح بعكس الطريق اللي ماتواجهك فيها مشاكل

ربي يوفقك وييسر امرك وصلاة الوتر الله اللله

يااااااخي ترا غيرك يتمناها .. احمد ربك
بعدين الغربه تراك مارحت بنقلادش
رايح امريكاااااااااا
على الاقل لو سياحه وتغير جو

اللي تبكي عليهم اليوم بكرة إن شاء الله يفتخرون فيك وتفرحهم إذا رجعت لهم بالشهادة ..
ربي يثبتك ويهون عليك الغربة ويطوي أيامها بسرعة ..

اللي يصير معك طبيعي
انا كنت مثلك اول اسبوع اصيح مثل البزر و ابي ارجع بيتنا
مع اني كبير وجاي ادرس ماستر
لكن مع الوقت كل شي صارعادي
و كنت و لازلت بالكلاس ما افهم انقلش كويس
بس احفظ كلمات و القط الكلمات اللي يقولونها وما اعرفها و اروح اترجمها بالبيت
و شوي شوي وصرت افهم ثلثين كلامهم و قريبا ان شاء الله راح اتكلم مثل البلبل.
صدقني هي فترة بسيطه و بتعدي لكن قوي ايمانك بالله و اطلب ربك في صلاتك.
و اذا رجعت البيت ابحث عن "الجمل" التي تستخدم بشكل يومي سواء بالمطعم
او بالكلاس او مع العائله ، و اذا معك ايفون او بلاك بيري خلك فاتح على قوقل
الترجمه و اذا ما عرفت كلمه ترجمها بوقتها و استخدمها
و الله يوفقك و يسهل عليك

لاتكبر الموضوع في نفسك خلك أكثر سهوله في خطاب نفسك

لاتواجه نفسك بالأسئلة وش بسوي وشلون متى برجع ...... إلخ

حاول تكون إيجابي وخاطب نفسك بالمهام الي قدامك حدد لنفسك

أهداف طويلة المدى ومتوسطة المدى وقصيرة المدى .

1- طويلة المدى : لازم أخلص اللغة بسنه أو أي مده تشوفها مناسبة لك .

2-متوسطة المدى : حط لنفسك درجة معينة بالأختبار الشهري لازم تجيبها .

3- قصيرة المدى : لازم تخلص الأسبوع هذا كل دروس الأسبوع مراجعة ,

بتقرى جزء أو جزئين من القراءن , بتصلي الوتر ثلاث أيام بالأسبوع , بشوف

أربع أفلام . (ووزع وقتك عليه ) .

^^^
طبعا هذي كلها أمثلة

بالطريقة هذي تصير أهدافك هي هاجسك النفسي الدائم وهذا الهدف

أن يكون مخك مشغول في أشياء تفيدك , ويروح من عقلك الهاجس

الي يحبطك والي يضيع وقتك ويشغل مخك بدون فائده , وقيم نفسك

كل فترة .

بس النصيحة الي بتريحك ومتأكد بأذن الله :

ألصق جبينك بالأرض في وترك بالليل كل ماضاق صدرك

وطلع كل الي بقلبك له سبحانه وصدقني هو الوحيد الي

فاهم دمعتك وحاجتك والقادر على الإجابة عن كل طلباتك

أبكي له وأدعيله وبتتيسر كل أمروك أنا متأكد منه سبحانه .


الله يشرح صدرك وثبتك وييسر أمرك

يارجال اذكر ربك وقل لا اله الا الله وصل كل يوم والضيقه بتروح

والانجليزي 80% يجون ما يعرفون الا yes و no وكلها 3 او 4 شهور وتنطلق بالانقلش

انت الحين بالبيت بس احفظ كلمات ومعانيها , وفي المعهد ركز على القرامر وان شاء الله بتفهم بسرعه

وحاول تكون لك قروب تطلع معاهم علشان ما تحس بالوحده والافضل اجانب علشان تتعلم بسرعه

بس صدقني بتتعلم لان مافي واحد مايتعلم في سنه ونص ولا سنتين بامر الله ..

والله الغربة صعبة صعبة صعبة
و إذا تفكر ترجع للسعودية هذا اكبر مشكلة
اخوي شف ابو هنود يجي عندنا ما يفقه شي و يطلع احسن من بتال القوس في الحوار
ركز و أحسن شي عط نفسك عهد إنك ما ترجع للسعودية إلا مخلص اللغة بالطيب بالغصب بالف والدوران اهم شي لغة يعني لغة
انزل تحت عند العائلة وسولف قصص حياتك بإشارة يعني نزل يدك لحد ركبتك معناها يومك صغير
قرطب اصبعك ( فرقع ) معناها جلدك ولد الجيران حميد
وهكذا و تطلع بلغة على كيف كيفك لأنهم راح يسألونك اسألة يحبها قلبك يبون يعرفون و ش تتكلم عنه